67 ବର୍ଷରେ ବଲିଉଡ୍‌ ଅଭିନେତା ଋଷି କପୁର୍‌ଙ୍କ ପରଲୋକ

Published: Apr 30, 2020, 10:03 am IST

ମୁମ୍ବାଇ :  67 ବର୍ଷ ବୟସରେ ପରଲୋକ ଗମନ କରିଛନ୍ତି ବଲିଉଡ୍‌ର ଲୋକପ୍ରିୟ ବର୍ଷୀୟାନ୍‌ ଅଭିନେତା ଋଷି କପୁର୍‌। ମୁମ୍ବାଇର ଏକ ଘରୋଇ ହସ୍ପିଟାଲରେ ତାଙ୍କର ମୃତ୍ୟୁ ଘଟିଛି । ଗତକାଲି ବିଳମ୍ବିତ ରାତ୍ରିରେ ତାଙ୍କୁ ଏନ୍‌ଏଚ୍‌ ରିଲାଏନ୍ସ ହସ୍ପିଟାଲ୍‌ରେ ଚିକିତ୍ସା ପାଇଁ ଭର୍ତ୍ତି କରାଯାଇଥିଲା। କିଛି ଦିନ ହେବ ସେ ଅସୁସ୍ଥ ରହିଥିଲେ। ଋଷି କପୁର୍‌ କ୍ୟାନ୍ସର ପୀଡ଼ିତ ଥିବାବେଳେ ନିଃଶ୍ବାସ ପ୍ରଶ୍ବାସ ନେବାରେ କଷ୍ଟ ଅନୁଭବ କରୁଥିଲେ। ଏଥିପାଇଁ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା। କ୍ୟାନ୍ସରର ଚିକିତ୍ସା ପାଇଁ ସେ ଗତ ଏକ ବର୍ଷ ଧରି ଆମେରିକାର ନ୍ୟୁୟର୍କରେ ଚିକିତ୍ସିତ ହେଉଥିଲେ। ଗତବର୍ଷ ଆମେରିକାରୁ ଭାରତକୁ ପ୍ରତ୍ୟାବର୍ତ୍ତନ କରିଥିଲେ ଋଷି । 2018 ରେ କ୍ୟାନ୍ସରରେ ପୀଡ଼ିତ ଥିବାର ସୂଚନା ମିଳିଥିଲା । ନ୍ୟୁର୍ୟକରେ ସେ ଏକ ବର୍ଷ ଧରି ଚିକିତ୍ସିତ ହେଉଥିବାବେଳେ ତାଙ୍କ ସହ ତାଙ୍କ ପତ୍ନୀ ନୀତୁ ସିଂ ରହିଥିଲେ । ଗତ ଫେବୃଆରୀର ସେ ଦୁଇ ଦୁଇ  ଥର ମେଡ଼ିକାଲରେ ଭର୍ତ୍ତି ହୋଇଥିଲେ ।

1952 ମସିହା ସେପ୍ଟେମ୍ବର 4ରେ ମୁମ୍ବାଇଠାରେ ଋଷି ଜନ୍ମଗ୍ରହଣ କରିଥିଲେ । ଶ୍ରୀ 420ରେ ଶିଶୁ କଳାକାର ରୂପେ ନଜର ଆସିଥିଲେ ଋଷି । 1973ରେ ବବି ଫିଲ୍ମରେ ନାୟକ ଭାବେ ବଲିଉଡ୍‌ ଡେବ୍ୟୁ କରିଥିଲେ ଋଷି କପୁର୍‌ । ଏହି ଫିଲ୍ମ ପାଇଁ ଫିଲ୍ମଫେୟାରର ଶ୍ରେଷ୍ଠ ଅଭିନେତାର ପୁରସ୍କାର ପାଇଥିଲେ । ପିତା ରାଜ୍‌ କପୁର୍‌ଙ୍କ ମେରା ନାମ୍‌ ଜୋକରରେ ଶିଶୁ କଳାକାର ରୂପେ ଅଭିନୟ କରିଥିଲେ ଅଭିନେତା ଋଷି କପୁର୍‌ । ଶିଶୁ କଳାକାର ପାଇଁ ସେ ଜାତୀୟ ପୁରସ୍କାରରେ ସମ୍ମାନିତ ମଧ୍ୟ ହୋଇଛନ୍ତି । ସେ 1973ରୁ 2000 ମଧ୍ୟରେ 92ଟି ଫିଲ୍ମ କରିଛନ୍ତି । ଏହି ଫିଲ୍ମ ମଧ୍ୟରୁ 32ଟି ଫିଲ୍ମ ବକ୍ସ ଅଫିସ ହିଟ୍‌ ହୋଇଛି । 2008 ମସିହାରେ ଫିଲ୍ମ ଜଗତ ପାଇଁ ଉଲ୍ଲେଖନୀୟ ଅବଦାନ ଲାଗି ତାଙ୍କୁ ଜୀବନବ୍ୟାପୀ ସମ୍ମାନରେ ସମ୍ମାନିତ କରାଯାଇଥିଲା । ସେ ତାଙ୍କ ପତ୍ନୀ ନୀତୁ ସିଂଙ୍କ ସହ 12ଟି ଫିଲ୍ମରେ ଅଭିନୟ କରିଛନ୍ତି ।

ଋଷିଙ୍କ ଅଭିନୀତ ଫିଲ୍ମ ମଧ୍ୟରେ ରହିଛି ‘ବବି’, ’ଜିନ୍ଦା ଦିଲ୍‌’, ‘ରାଜା’, ’ଖେଲ୍‌ ଖେଲ୍‌ ମେଁ’, ‘ଲୈଲା ମଜୁନ୍‌’, ଦୁସ୍‌ରା ଆଦ୍‌ମୀ,’ ‘ଅମର ଆକବର ଆନ୍ଥୋନୀ’, ’ସରଗମ୍‌’, ’’ନସିବ୍‌’, ‘ପ୍ରେମ ରୋଗ୍‌’, ‘କୁଲି’, ‘ସାଗର୍‌’, ’ନାଗିନା’, ‘ଚାନ୍ଦିନୀ’, ‘ହିନା’, ‘ବୋଲ ରାଧା ବୋଲ୍‌’, ‘ଦିଓ୍ବାନା’, ‘ଦାମିନୀ’, ‘ଫନା’, ‘ଦୋ ଦୁନୀ ଚାର୍‌’, ‘କପୁର୍‌ ଏଣ୍ଡ ସନ୍ସ’, ‘102 ନଟ୍‌ ଆଉଟ୍‌’ ପରି ଅନେକ ଫିଲ୍ମରେ ସେ ନିଜର ନିଆରା ଅଭିନୟ ଦେଖାଇଛନ୍ତି ।

ଋଷି କପୁର୍‌ଙ୍କ ବିୟୋଗରେ ବିଗ୍‌ ବି ଅମିତାଭ ବଚ୍ଚନ ଶୋକ ପ୍ରକଟ କରିଛନ୍ତି ।

Related posts