ରାଜନୀତିରୁ ସନ୍ନ୍ୟାସ ନେବା ପରେ ପ୍ରଥମ ଥର ପାଇଁ ନିଜର ନିରବତା ଭାଙ୍ଗି ଏକ ବ୍ଲଗ୍ ଲେଖିଛନ୍ତି ବିଜେପିର ବରିଷ୍ଠ ନେତା ଲାଲକୃଷ୍ଣ ଆଡ଼ଭାନୀ। ଗାନ୍ଧିନଗରରୁ ଚଳିତ ଥର ଦଳ ପକ୍ଷରୁ ଟିକେଟ ନମିଳିବା ପରେ ସେ ନିଜର ପ୍ରଥମ ସାର୍ବଜନାନୀ ପ୍ରତିକ୍ରିୟା ଦେଇଛନ୍ତି। ଏହି ବ୍ଲଗ୍ର ସେ ଦଳୀୟ ନୀତି ଆଦର୍ଶ ଉପରେ ଆଲୋଚନା କରିଥିବା ବେଳେ ନିଜର ପ୍ରଥମ ବ୍ଲଗରେ କହିଛନ୍ତି ଯେ, ବିଜେପିର ରାଜନୈତିକ ବିରୋଧୀ ଯେଉଁମାନେକି ବିଜେପିର ଜାତୀୟତା ନୀତି ସହିତ ଅମଙ୍ଗ ସେମାନଙ୍କୁ ଦେଶଦ୍ରୋହୀ କୁହାଯାଇପାରିବ ନାହିଁ। ଆଡଭାନୀ ବ୍ଲଗରେ ଲେଖିଛନ୍ତି ଯେ ମୋ ଜୀବନର ସିଦ୍ଧାନ୍ତ ରହିଛି –ଦେଶ ପ୍ରଥମେ, ପରେ ଦଳ ଏବଂ ତାପରେ ନିଜେ। ସ୍ବଚ୍ଛ ଏବଂ ଅବାଧ ନିର୍ବାଚନକୁ ବିଜେପି ସର୍ବଦା ପ୍ରାଧାନ୍ୟ ଦେଇଛି। ସତ୍ୟ, ଦେଶ ପ୍ରତି ନିଜର ନିଷ୍ଠା, ଗଣତନ୍ତ୍ର ଏବଂ ସାଂସ୍କୃତିକ ରାଷ୍ଟ୍ରବାଦକୁ ବିଜେପି ସର୍ବଦା ପ୍ରାଧାନ୍ୟ ଦେଇ ଆସିଛି ଏବଂ ଏହ ସୁଶାସନ ପ୍ରତିଷ୍ଠା କରିବାରେ ସହାୟକ ହେବ। ଏପ୍ରିଲ ୬ରେ ବିଜେପିର ପ୍ରତିଷ୍ଠା ଦିବସର ଦୁଇ ଦିନ ପୂର୍ବରୁ ଏକ ବ୍ଲଗ ଲେଖି ଗାନ୍ଧିନଗର ଜନତାଙ୍କୁ ଧନ୍ୟବାଦ ଅର୍ପଣ କରିଛନ୍ତି, ଯେଉଁ ନିର୍ବାଚନ ମଣ୍ଡଳୀରୁ ସେ ୧୯୯୧ ପରଠାରୁ ୬ ଥର ସାଂସଦ ରହିଛନ୍ତି। ଚଳିତଥର ଗାନ୍ଧିନଗର ଆସନରୁ ବିଜେପିର ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହା ନିର୍ବାଚନ ଲଢିବାକୁ ଯାଉଛନ୍ତି। ସେ ଲିଖିଛନ୍ତି ଯେ ସବୁ ପରିସ୍ଥିତିରେ ମୋ ସିଦ୍ଧାନ୍ତରେ ଅଟଳ ରହିବା ପାଇଁ ଚେଷ୍ଟା କରିଛି। ଆଡଭାନୀ ତାଙ୍କ ରାଜନୈତିକ ଯାତ୍ରାକୁ ଏଥିରେ ମନେ ପକାଇଛନ୍ତି। ସେ ଉଲ୍ଲେଖ କରିଛନ୍ତି ଯେ ୧୪ ବର୍ଷରେ ପ୍ରଥମେ ଆରଏସଏସ ପରେ ଜନସଂଘ ଏବଂ ପରେ ବିଜେପିର ସଦସ୍ୟ ରହିଛି ଏବଂ ଦଳ ସହ ପ୍ରାୟ ୬୦ ବର୍ଷ ଜଡିତ ରହିଛି।
