ନୂଆଦିଲ୍ଲୀ, କୋଭିଡର ଦ୍ୱିତୀୟ ତରଙ୍ଗକୁ ସାମ୍ନା କରିବାରେ ପ୍ରମୁଖ ଭୂମିକା ଗ୍ରହଣ କରିଥିବା କରୋନା ଯୋଦ୍ଧାମାନଙ୍କୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଧନ୍ୟବାଦ ଦେଇଛନ୍ତି। ସେ କହିଛନ୍ତି ଯେ ଦେଶର ଦୂରଦୂରାନ୍ତରେ ମେଡିକାଲ ଅମ୍ଳଜାନ ପରିବହନ କରିବା ଏକ ମହତ୍ କାର୍ଯ୍ୟ। ମନ କି ବାତ୍ କାର୍ଯ୍ୟକ୍ରମରେ ଦେଶକୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଛନ୍ତି ଯେ ଡାକ୍ତର, ନର୍ସ ଏବଂ ଆଗଧାଡିର ଯୋଦ୍ଧାମାନେ ଦିନରାତି କାର୍ଯ୍ୟ ଯେପରି କାର୍ଯ୍ୟ କରୁଛନ୍ତି ତାହା ପ୍ରଶଂସନୀୟ।
ସେ କହିଛନ୍ତି ଯେ ଯେତେ ବଡ଼ ଚ୍ୟାଲେଞ୍ଜ ହେଉନା କାହିଁକି, ଜିତିବା ପାଇଁ ଭାରତର ସଂକଳ୍ପ ସର୍ବଦା ତାହାଠାରୁ ଅଧିକ ରହିଆସିଛି। ମୋଦୀ କହିଛନ୍ତି ଯେ ମହାମାରୀ ମଧ୍ୟରେ ସେବା ଏବଂ ସହଯୋଗର ସଂକଳ୍ପ ନେଇ ଭାରତ ଆଗକୁ ବଢୁଛି। ସୁରକ୍ଷିତ ଦୂରତା ଅନୁସରଣ କରିବା, ମାସ୍କ ପିନ୍ଧିବା ଏବଂ ଟୀକାକରଣ କରିବାକୁ ସେ ସମସ୍ତ ଲୋକଙ୍କୁ ନିବେଦନ କରିଥିଲେ।
ପ୍ରଧାନମନ୍ତ୍ରୀ କହିଛନ୍ତି ଯେ ଯେତେବେଳେ କୋଭିଡର ଦ୍ୱିତୀୟ ତରଙ୍ଗ ଆସିଲା, ହଠାତ୍ ଅମ୍ଳଜାନର ଚାହିଦା ବହୁଗୁଣିତ ହୋଇଗଲା। ସେ କହିଛନ୍ତି ଯେ ଶିଳ୍ପ ଅମ୍ଳଜାନ ଉତ୍ପାଦନ କରୁଥିବା ଅଧିକାଂଶ କାରଖାନା ଦେଶର ପୂର୍ବ ଭାଗରେ ଏଛି। ସେଠାରୁ ଦେଶର ଅନ୍ୟ ଭାଗକୁ ପରିବହନ କରିବା ଏକ ବଡ଼ ଆହ୍ବାନ ଥିଲା।
ସେ କହିଛନ୍ତି ଯେ କ୍ରାୟୋଜେନିକ୍ ଟ୍ୟାଙ୍କର ଡ୍ରାଇଭର, ଅମ୍ଳଜାନ ଏକ୍ସପ୍ରେସ ଏବଂ ବାୟୁସେନା ଯୋଦ୍ଧାମାନେ ଯୁଦ୍ଧକାଳୀନ ଭିତ୍ତିରେ କାର୍ଯ୍ୟ କରି ହଜାର ହଜାର ଲୋକଙ୍କ ଜୀବନ ରକ୍ଷା କରିଛନ୍ତି। ପ୍ରଧାନମନ୍ତ୍ରୀ ଉତ୍ତରପ୍ରଦେଶର ଜୈନପୁରର ଦୀନେଶ ଉପାଧ୍ୟାୟଙ୍କ ସହ କଥାବାର୍ତ୍ତା କରିଥିଲେ। ସେ ତାଙ୍କର ତରଳ ଅମ୍ଳଜାନ ଟ୍ୟାଙ୍କର୍ ଚଳାଇବାର ଅଭିଜ୍ଞତା ବାଣ୍ଟିଥିଲେ।
ପ୍ରଧାନମନ୍ତ୍ରୀ କହିଛନ୍ତି ଯେ ଯେତେବେଳେ ଟ୍ୟାଙ୍କର୍ ଡ୍ରାଇଭରମାନେ ଅମ୍ଳଜାନ ନେଇ ଡାକ୍ତରଖାନାରେ ପହଞ୍ଚନ୍ତି, ସେତେବେଳେ ଭଗବାନଙ୍କ ଦ୍ୱାରା ପଠାଯାଇଥିବା ଦୂତମାନେ ଉପସ୍ଥିତ ହୁଅନ୍ତି। ଅମ୍ଳଜାନ ବିତରଣରେ ଭାରତୀୟ ରେଳର ଅବଦାନକୁ ସେ ପ୍ରଶଂସା ମଧ୍ୟ କରିଥିଲେ।
ସେ କହିଛନ୍ତି ଯେ ରେଳବାଇର ଅମ୍ଳଜାନ ଏକ୍ସପ୍ରେସ ଦ୍ବାରା ଅଧିକ ପରିମାଣର ଅମ୍ଳଜାନକୁ ଦେଶର କୋଣ ଅନୁକୋଣକୁ ପରିବହନ କରାଯାଇଥିଲା। ସେ କହିଛନ୍ତି ଯେ ମହିଳାମାନେ ଅମ୍ଳଜାନ ଏକ୍ସପ୍ରେସ ଚଳାଉଥିବାରୁ ଏହା ଆଉ ଏକ ଗର୍ବର ବିଷୟ। ସେ ଅମ୍ଳଜାନ ଏକ୍ସପ୍ରେସର ଲୋକୋ ପାଇଲଟ୍ ଶିରିଶା ଗଜନୀଙ୍କ ସହ ମଧ୍ୟ କଥାବାର୍ତ୍ତା କରିଥିଲେ।
ନୈସେନା, ବାୟୁସେନା, ସେନା ଏବଂ DRDO ପରି ଅନୁଷ୍ଠାନଗୁଡ଼ିକର ଗୁରୁତ୍ୱପୂର୍ଣ୍ଣ ଭୂମିକାକୁ ପ୍ରଧାନମନ୍ତ୍ରୀ ମଧ୍ୟ ପ୍ରଶଂସା କରିଛନ୍ତି। ସେ କହିଛନ୍ତି ଯେ ଏହି ସମସ୍ତ ଲୋକଙ୍କ କାର୍ଯ୍ୟ ଜାଣିବା ଏବଂ ବୁଝିବା ପାଇଁ ସମସ୍ତ ଦେଶବାସୀଙ୍କ ମନରେ ଆଗ୍ରହ ଅଛି। ସେ ବାୟୁସେନା ଗ୍ରୁପ୍ କ୍ୟାପଟେନ ଏ.କେ ପଟ୍ଟନାୟକଙ୍କ ସହ କଥାବାର୍ତ୍ତା କରିଥିଲେ। ପଟ୍ଟନାୟକ ହେଉଛନ୍ତି ଓଡିଶା ବାସିନ୍ଦା।
ପ୍ରଧାନମନ୍ତ୍ରୀ ସେମାନଙ୍କର ମହାନ ଅବଦାନ ପାଇଁ ସୈନିକ ଏବଂ କରୋନା ଯୋଦ୍ଧାମାନଙ୍କୁ ଅଭିବାଦନ ଜଣାଇଥିଲେ। ସେ କହିଛନ୍ତି ଯେ ବିଶ୍ୱରେ ଶହେ ବର୍ଷ ପରେ ଏହି ପ୍ରକାର ବିପର୍ଯ୍ୟୟ ଆସିଛି। ଏହା ଶତାବ୍ଦୀର ଏକ ବଡ ସଙ୍କଟ। ଏହି ପ୍ରକାରର ସଙ୍କଟର ମୁକାବିଲା କରିବାରେ କାହାରି ଅଭିଜ୍ଞତା ନଥିଲା। ସେ କହିଛନ୍ତି ଯେ ସାଧାରଣ ଦିନରେ ଆମେ ନଅ ଶହ ମେଟ୍ରିକ୍ ଟନ୍ ତରଳ ମେଡିକାଲ୍ ଅମ୍ଳଜାନ ଉତ୍ପାଦନ କରୁଥିଲୁ। ବର୍ତ୍ତମାନ, ଏହା ଦଶ ଗୁଣରୁ ଅଧିକ ବଛିଛି। ଦିନକୁ ପ୍ରାୟ ନଅ ହଜାର ପାଞ୍ଚ ଶହ ମେଟ୍ରିକ୍ ଟନ୍ ଅମ୍ଳଜାନ ଉତ୍ପାଦନ ହେଉଛି।
ମୋଦୀ କହିଛନ୍ତି ଯେ କରୋନାରେ ପ୍ରଥମେ ଦେଶରେ କେବଳ ଗୋଟିଏ ପରୀକ୍ଷା ଲାବୋରେଟୋରୀ ଥିଲା, କିନ୍ତୁ ଆଜି ଅଢେଇ ହଜାରରୁ ଅଧିକ ଲ୍ୟାବ କାର୍ଯ୍ୟ କରୁଛି। ପ୍ରାରମ୍ଭରେ ଗୋଟିଏ ଦିନରେ କିଛି ଶହ ପରୀକ୍ଷା କରାଯାଉଥିଲା, କିନ୍ତୁ ବର୍ତ୍ତମାନ ଗୋଟିଏ ଦିନରେ ଦୁଇ ଲକ୍ଷରୁ ଅଧିକ ପରୀକ୍ଷା କରାଯାଉଛି।
ବର୍ତ୍ତମାନ ସୁଦ୍ଧା 33 କୋଟିରୁ ଅଧିକ ନମୁନା ପରୀକ୍ଷା କରାଯାଇସାରିଛି। ପ୍ରଧାନମନ୍ତ୍ରୀ କହିଛନ୍ତି ଯେ ଅନେକ ଫ୍ରଣ୍ଟ ଲାଇନ କର୍ମଚାରୀ ନମୁନା ସଂଗ୍ରହ କାର୍ଯ୍ୟରେ ନିୟୋଜିତ ଅଛନ୍ତି। ସେ କହିଛନ୍ତି ଯେ ସେମାନେ ଆକ୍ରାନ୍ତଙ୍କ ନମୁନା ସଂଗ୍ରହ କରି ନେବା ଏକ ଉତ୍ତମ ସେବା। ସେ ଦିଲ୍ଲୀର ଲ୍ୟାବ ଟେକ୍ନିସିଆନ ପ୍ରକାଶ କାଣ୍ଡପାଲଙ୍କ ସହ ମଧ୍ୟ କଥାବାର୍ତ୍ତା କରିଥିଲେ।
ପ୍ରଧାନମନ୍ତ୍ରୀ କହିଛନ୍ତି ଯେ ଏହା ଏକ ସଂଯୋଗର ବିଷୟ ଯେ ଆଜି ମେ 30, ମନ କି ବାତ ଦିନ, ଏଥିସହ ଆଜି ମଧ୍ୟ ସରକାରଙ୍କୁ ସାତ ବର୍ଷ ପୂରଣ କରିଛି। ସେ କହିଛନ୍ତି ଯେ ଦେଶ ବର୍ଷ ବର୍ଷ ଧରି ସାବକା ସାଥ, ସାବକା ବିକାଶ, ସାବକା ବିଶ୍ୱ ମନ୍ତ୍ର ଅନୁସରଣ କରିଆସୁଛି। ସେ କହିଛନ୍ତି ଯେ ଆଜି ଭାରତ ନିଜର ସଂକଳ୍ପ ନେଇ ଚାଲିଛି ଏବଂ ଅନ୍ୟ ଦେଶର ଚିନ୍ତାଧାରା ପାଇଁ ଭାରତ ଉପରେ କୈଣସି ଚାପ ନାହିଁ।
ସେ ଲୋକଙ୍କଠାରୁ ପାଇଥିବା ଚିଠି ପାଇଁ କୃତଜ୍ଞତା ମଧ୍ୟ ଜଣାଇଛନ୍ତି। ସେ କହିଛନ୍ତି ଯେ ସରକାରଙ୍କ କାର୍ଯ୍ୟକ୍ରମ ହେତୁ ବିଦ୍ୟୁତ୍, ପାଇପ ଜଳ, ରାସ୍ତା ଏବଂ ଘର ଭଳି ବ୍ୟବସ୍ଥା ବିଷୟରେ ଲୋକମାନେ ଯେତେବେଳେ ସେମାନଙ୍କୁ ଚିଠିରେ ଜଣାନ୍ତି ତାହା ଜାଣିବା ସନ୍ତୋଷଜନକ ଅଟେ।
ସେ କହିଛନ୍ତି ଯେ ସ୍ୱାଧୀନତାର ସାତ ଦଶନ୍ଧି ମଧ୍ୟରେ କେବଳ ସାଢେ ତିନି କୋଟି ଗ୍ରାମୀଣ ପରିବାରରେ ଜଳ ସଂଯୋଗ ରହିଥିଲା। କିନ୍ତୁ ଗତ ଏକୋଇଶ ମାସ ମଧ୍ୟରେ ସାଢେ ଚାରି କୋଟି ଗ୍ରାମୀଣ ପରିବାରକୁ ବିଶୁଦ୍ଧ ଜଳ ସଂଯୋଗ ଦିଆଯାଇଛି। ସେ କହିଛନ୍ତି ଯେ ଏହି ସଫଳତା ସରକାର ଏବଂ ଲୋକ ମିଳିତ ଭାବରେ କାର୍ଯ୍ୟ କରିବାର ଫଳାଫଳ।
