ଭୁବନେଶ୍ୱର: ରାଷ୍ଟ୍ରୀୟ ସଭାପତି ଜେ.ପି.ନଡ୍ଡାଙ୍କ ଅନୁମୋଦନ କ୍ରମେ ରାଜ୍ୟ ବିଜେପି ଦଳର ୧୫ ଜଣିଆ କୋର୍ କମିଟି ଘୋଷଣା କରାଯାଇଛି। କମିଟିରେ ୩ କେନ୍ଦ୍ରମନ୍ତ୍ରୀଙ୍କ ସମେତ ୪ ଜଣ ସାଂସଦ ଅଛନ୍ତି। ଅନ୍ୟତମ ରାଷ୍ଟ୍ରୀୟ ମୁଖପାତ୍ର ସଂବିତ ପାତ୍ରଙ୍କୁ ମଧ୍ୟ ସ୍ଥାନ ମିଳିଛି । ହେଲେ ଆଶ୍ଚର୍ଯ୍ୟର କଥା ଏହି କମିଟରେ ସାଂସଦ ଅପରାଜିତା ଷଡଙ୍ଗୀ ଏବଂ ବରିଷ୍ଠ ନେତା ବିଜୟ ମହାପାତ୍ରଙ୍କ ନାମ ନାହିଁ। ଯାହାକୁ ନେଇ ବିଭିନ୍ନ ମହଲରେ ବେଶ ଆଲୋଚନା ହେବାରେ ଲାଗିଛି।
ତେବେ ବିଜେପିର ଏହି କୋର କମିଟରେ ଯେଉଁମାନେ ଅଛନ୍ତି ସେମାନେ ହେଲେ ରାଜ୍ୟ ସଭାପତି ସମୀର ମହାନ୍ତି, ରାଷ୍ଟ୍ରୀୟ ଉପାଧ୍ୟକ୍ଷ ବୈଜୟନ୍ତ ପଣ୍ଡା, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ, ପୂର୍ବତନ କେନ୍ଦ୍ରମନ୍ତ୍ରୀ ତଥା ସାଂସଦ ଜୁଏଲ୍ ଓରାମ୍, ପୂର୍ବତନ କେନ୍ଦ୍ରମନ୍ତ୍ରୀ ତଥା ସାଂସଦ ପ୍ରତାପ ଷଡ଼ଙ୍ଗୀ, ବିରୋଧୀ ଦଳ ନେତା ପ୍ରଦୀପ୍ତ କୁମାର ନାୟକ, ସାଂସଦ ସୁରେଶ ପୂଜାରୀ ଅଛନ୍ତି।
ସେହିପରି କେନ୍ଦ୍ରମନ୍ତ୍ରୀ ବିଶ୍ୱେଶ୍ୱର ଟୁଡୁ, ରାଷ୍ଟ୍ରୀୟ ମୁଖପାତ୍ର ସମ୍ବିତ ପାତ୍ର, ପୂର୍ବତନ ରାଜ୍ୟ ସଭାପତି ମନମୋହନ ସାମଲ, ପୂର୍ବତନ ରାଜ୍ୟ ସଭାପତି କେ.ଭି.ସିଂହଦେଓ, ପୂର୍ବତନ ରାଜ୍ୟ ସଭାପତି ତଥା ସାଂସଦ ବସନ୍ତ ପଣ୍ଡା, ରାଜ୍ୟ ସାଂଗଠନିକ ସମ୍ପାଦକ ମାନସ ମହାନ୍ତି ଏବଂ ପୂର୍ବତନ ରାଜ୍ୟ ସମ୍ପାଦକ ଶ୍ରୀମତୀ ସୁରମା ପାଢ଼ୀ। କୋର୍ କମିଟିରେ ସ୍ୱତନ୍ତ୍ର ଆମନ୍ତ୍ରିତ ସଦସ୍ୟ ଭାବେ ରାଜ୍ୟ ପ୍ରଭାରୀ ଶ୍ରୀମତୀ ଡି. ପୁରନ୍ଦେଶ୍ୱରୀ ଏବଂ ସହପ୍ରଭାରୀ ବିଜୟପାଲ ସିଂହ ତୋମାର ଅଛନ୍ତି ।
ସାଧାରଣତଃ ଏକ ଉଚ୍ଚ ସ୍ତରୀୟ କମିଟ କରାଗଲେ ସେଥିରେ ରାଜ୍ୟର ଯେଉଁମାନେ କେନ୍ଦ୍ରମନ୍ତ୍ରୀ ଅଛନ୍ତି ସେମାନେ ନିଶ୍ଚିତ ରହିବେ। ସେହି ଅନୁସାରେ ଏହି କମିଟରେ ସେମାନେ ଅଛନ୍ତି। ସେହିପରି ଏଥିରେ ସାଂସଦ ହିସାବରେ ସୁରେଶ ପୂଜାରୀ, ବସନ୍ତ ପଣ୍ଡା, ପ୍ରତାପ ଷଡଙ୍ଗୀ ଏବଂ ଜୁଏଲ ଓରାମ ମଧ୍ୟ ଅଛନ୍ତି। ତେବେ ଏପରି କ୍ଷେତ୍ରରେ ଅପରାଜିତା ଷଡଙ୍ଗୀ ନାମ ନ ରହିବାକୁ ନେଇ ବିଭିନ୍ନ ମହଲରେ ପ୍ରଶ୍ନ ଉଠିଛି।
କେହି ହୁଏତ କହିପାରେ ଯେ, ସେ ରାଷ୍ଟ୍ରୀୟ ପ୍ରବକ୍ତା ଅଛନ୍ତି ସେଥିପାଇଁ ନିଆଗଲା ନାହିଁ। ହେଲେ ସେହି କମିଟରେ ଅନ୍ୟତମ ରାଷ୍ଟ୍ରୀୟ ପ୍ରବକ୍ତା ସଂବିତ ପାତ୍ରଙ୍କ ନାମ ରହିଛି। ଏପରିକି ରାଷ୍ଟ୍ରୀୟ ଉପାଧ୍ୟକ୍ଷ ବୈଜୟନ୍ତ ପଣ୍ଡାଙ୍କ ନାମ ମଧ୍ୟ ରହିଛି। ଏପରି କ୍ଷେତ୍ରରେ ଅପରାଜିତାଙ୍କ ନାମ ରଖିବାରେ କେଉଁଠି ଅସୁବିଧା ରହିଲା। ସେହିପରି ଅନ୍ୟତମ ନେତା ବିଜୟ ମହାପାତ୍ର ମଧ୍ୟ ଏହି କମିଟରେ ସ୍ଥାନ ପାଇ ନାହାଁନ୍ତି। ତାଙ୍କୁ ମଧ୍ୟ ଦଳରେ ସେମିତି କଣଠୋସା କରି ରଖାଯାଇଛି ବୋଲି ସ୍ପଷ୍ଟ ହୋଇଛି।
