ମୁମ୍ବାଇ: ମହାରାଷ୍ଟ୍ରରେ ଏକନାଥ ସିନ୍ଦେ ନୂତନ ମୁଖ୍ୟମନ୍ତ୍ରୀ ଭାବେ ଦାୟିତ୍ୱ ଗ୍ରହଣ କରିଥିବାବେଳେ ବିଜେପି ମଧ୍ୟ କ୍ଷମତାକୁ ଫେରିଛି। ଆଜି ବିଧାନସଭାରେ ଏକନାଥ ସିନ୍ଦେ ସରକାର ଫ୍ଲୋର ଟେଷ୍ଟର ସମ୍ମୁଖୀନ ହେବେ। ଏଭଳି ପରିସ୍ଥିତିରେ ଏନସିପି ମୁଖ୍ୟ ଶରଦ ପାୱାର ଦାବି କରିଛନ୍ତି ଯେ, ସିନ୍ଦେ ସରକାର ମାତ୍ର ୬ ମାସ ଚାଲିବ। ତାଙ୍କ ବିଧାୟକମାନଙ୍କୁ ମାର୍ଗଦର୍ଶନ କରିବାବେଳେ ସେ କହିଛନ୍ତି ଯେ, ଏହି ସରକାର ପାଞ୍ଚରୁ ଛଅ ମାସ ପର୍ଯ୍ୟନ୍ତ ଚାଲିବ, ତେଣୁ ମଧ୍ୟବର୍ତ୍ତୀକାଳୀନ ନିର୍ବାଚନ ପାଇଁ ପ୍ରସ୍ତୁତ ରୁହନ୍ତୁ।
ମହାରାଷ୍ଟ୍ରରେ ମଧ୍ୟବର୍ତ୍ତୀକାଳୀନ ନିର୍ବାଚନର ସମସ୍ତ ସମ୍ଭାବନା ଅଛି ବୋଲି ଶରଦ ପାୱାର ଏକ ବଡ଼ ବିବୃତ୍ତି ଦେଇଛନ୍ତି। ଶିବସେନାଙ୍କ ବିଦ୍ରୋହୀ ନେତା ଏକନାଥ ସିନ୍ଦେଙ୍କ ନେତୃତ୍ୱରେ ସରକାର ପାଞ୍ଚରୁ ୬ ମାସ ଚାଲିପାରେ। କୁହାଯାଉଛି ଯେ, ଏନସିପି ବିଧାୟକ ତଥା ଦଳର ନେତାମାନଙ୍କୁ ସମ୍ବୋଧିତ କରିବାବେଳେ ଶରଦ ପାୱାର ଏସବୁ କହିଛନ୍ତି।