ନୂଆଦିଲ୍ଲୀ: ଫିଲିପାଇନ୍ସର ରାଷ୍ଟ୍ରପତି ଫର୍ଡିନେଣ୍ଡ ମାର୍କୋସ ଜୁନିୟର ଭାରତକୁ ଏକ ବନ୍ଧୁ ଦେଶ ବୋଲି କହିବା ସହ ସମ୍ପର୍କକୁ ଆହୁରି ମଜବୁତ କରିବାକୁ କହିଛନ୍ତି। ସେ କହିଛନ୍ତି ଯେ, ଆଞ୍ଚଳିକ ସ୍ଥିରତା ପାଇଁ ଭାରତ ଏକ ସହାୟକ ସ୍ତମ୍ଭ ଅଟେ। ଏହା ସହିତ ସେ ଦକ୍ଷିଣ ଚୀନ୍ ସାଗରରେ ଚୀନକୁ ସୀମା ଅତିକ୍ରମ ନକରିବାକୁ ଚେତାବନୀ ଦେଇଛନ୍ତି। ରାଷ୍ଟ୍ରପତି କହିଛନ୍ତି ଯେ, ଯଦି ଚୀନ୍ର କୌଣସି କାର୍ଯ୍ୟ ହେତୁ ଫିଲିପାଇନ୍ସ ନାଗରିକଙ୍କ ଜୀବନ ଚାଲିଯାଏ, ତେବେ ଏହା ଏକ ଯୁଦ୍ଧ ପାଇଁ ଉତ୍ତେଜିତ କରାଯାଉଥିବା କୁହାଯିବ ଏବଂ ଏହାର କଡା ଜବାବ ଦିଆଯିବ।
ଶୁକ୍ରବାର ଦିନ ବାର୍ଷିକ ଶାଙ୍ଗ୍ରି-ଲା ସଂଳାପରେ ଫର୍ଡିନାଣ୍ଡ ମାର୍କୋସ ଭାଷଣ ଦେଇଥିଲେ। ଏହି ସମୟରେ ସେ କହିଛନ୍ତି ଯେ, ‘ଆମ ଦେଶର ସୈନ୍ୟ ନ୍ୟବାହିନୀକୁ ନିୟୋଜିତ କରିବାର କ୍ଷମତା ବିକାଶ କରିବୁ, ଯେଉଁଠାରେ ଆମର ସାମ୍ବିଧାନିକ କର୍ତ୍ତବ୍ୟ, ଆମର ସ୍ୱାର୍ଥ ରକ୍ଷା ଏବଂ ଆମର ଐତିହ୍ୟକୁ ସୁରକ୍ଷା କରିବା ପାଇଁ ଆବଶ୍ୟକ ହେବ।’ ସେ କହିଛନ୍ତି ଯେ, ଆଞ୍ଚଳିକ ସ୍ଥିରତାର ସ୍ତମ୍ଭ ଗଠନ ପାଇଁ ଫିଲିପାଇନ୍ସ ଭାରତ ଏବଂ ଦକ୍ଷିଣ କୋରିଆ ସହ ସମ୍ପର୍କକୁ ଆହୁରି ଗଭୀର କରିବ।
ଏହି ଦେଶଗୁଡିକ ଦକ୍ଷିଣ ଚୀନ୍ ସାଗର ଉପରେ ଦାବି କରନ୍ତି:
ମାର୍କୋସ ଦକ୍ଷିଣ ଚୀନ୍ ସାଗର ଏବଂ ଭାରତ ପ୍ରଶାନ୍ତ ମହାସାଗରରେ ଉତ୍ତେଜନା ପରିସ୍ଥିତି ଉପରେ ମଧ୍ୟ ଆଲୋଚନା କରିଥିଲେ। ସେ କହିଛନ୍ତି ଯେ, ‘ଯେପରି ଆମେ ଆନ୍ତର୍ଜାତୀୟ ବ୍ୟାପାରରେ ଆଇନଗତ ପ୍ରକ୍ରିୟା ଗ୍ରହଣ କରୁଛୁ, ସେହିଭଳି ସାମୁଦ୍ରିକ କ୍ଷେତ୍ରରେ ଏହାର ସ୍ୱାର୍ଥ ରକ୍ଷା ପାଇଁ ଦେଶର ସାମର୍ଥ୍ୟ ଗଠନ କରିବୁ।’ ଦକ୍ଷିଣ ଚୀନ୍ ସାଗରରେ ସୀମା ପାର ନକରିବାକୁ ସେ ଚୀନ୍କୁ ଚେତାବନୀ ଦେଇଛନ୍ତି। ବାସ୍ତବରେ ଚୀନ୍ ସମଗ୍ର ଦକ୍ଷିଣ ଚୀନ୍ ସାଗରକୁ ଦାବି କରୁଥିବାବେଳେ ଅନ୍ୟ ପଟେ ତାଇୱାନ, ଫିଲିପାଇନ୍ସ, ବ୍ରୁନେଇ, ମାଲେସିଆ ଏବଂ ଭିଏତନାମ ମଧ୍ୟ ଏହାର କିଛି ଅଂଶ ଦାବି କରିଛନ୍ତି।
ଭାରତ ଏବଂ ଫିଲିପାଇନ୍ସ ମଧ୍ୟରେ ପ୍ରତିରକ୍ଷା ସହଯୋଗ:
ଦକ୍ଷିଣ ଚୀନ୍ ସାଗରରେ ନିଜର ସ୍ଥିତିକୁ ସୁଦୃଢ କରିବା ପାଇଁ ଫିଲିପାଇନ୍ସ ଭାରତ ସହିତ ଏକ ପ୍ରତିରକ୍ଷା ଚୁକ୍ତି ସ୍ୱାକ୍ଷର କରିଛି। ଏହା ଅଧୀନରେ ଫିଲିପାଇନ୍ସ ୨୦୨୨ ମସିହାରେ ଭାରତ ସହିତ ୩୭୫ ମିଲିୟନ ଆମେରିକୀୟ ଡଲାରର ଏକ ଚୁକ୍ତିନାମା ସ୍ୱାକ୍ଷର କରିଥିଲା। ଏହି ଚୁକ୍ତିନାମା ଅନୁଯାୟୀ ଭାରତ ଗତ ଏପ୍ରିଲରେ ଫିଲିପାଇନ୍ସକୁ ବ୍ରହ୍ମୋସ ସୁପରସୋନିକ୍ କ୍ଷେପଣାସ୍ତ୍ର ପଠାଇଥିଲା। ଏହା ବ୍ୟତୀତ ଭାରତ ଏବଂ ଦକ୍ଷିଣ ପୂର୍ବ ଏସୀୟ ଦେଶ ‘ASEAN’ ର ସଂଗଠନ ମଧ୍ୟରେ ଅନେକ ସହଯୋଗ ଚୁକ୍ତିନାମା ସ୍ୱାକ୍ଷରିତ ହୋଇଛି ଯେଉଁଥିରେ ଫିଲିପାଇନ୍ସ ଏକ ପ୍ରମୁଖ ସଦସ୍ୟ ଅଟେ।
