ଭୁବନେଶ୍ବର: ମୁଖ୍ୟମନ୍ତ୍ରୀଙ୍କ ଅଭିଯୋଗ ଶୁଣାଣି ନେଇ ଏକ ବିଚିତ୍ର ପ୍ରକାରର ପରିସ୍ଥିତି ସୃଷ୍ଟି ହୋଇଛି। ଆସନ୍ତା ସୋମବାରରେ ହେବାକୁ ଥିବା ଏହି ଅଭିଯୋଗ ଶୁଣାଣି ନେଇ ରାଜ୍ୟ ସରକାର ତିନି ପ୍ରକାରର ବିଜ୍ଞାପନ ପ୍ରକାଶିତ କରିଛନ୍ତି। ଯାହାକୁ ନେଇ ସାଧାରଣରେ ଦ୍ବନ୍ଦ ସୃଷ୍ଟି ହୋଇଛି।
ଘଟଣାରୁ ଜଣାପଡିଛି ଯେ, ଆସନ୍ତା ସୋମବାରରେ ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠ ବନ୍ଦ ରହିବ। ସେଥିପାଇଁ ସାଧାରଣ ପ୍ରଶାସନ ଏବଂ ସାଧାରଣ ଅଭିଯୋଗ ବିଭାଗ ତରଫରୁ ଆଜି ବିଭିନ୍ନ ଖବରକାଗଜରେ ବିଜ୍ଞାପନ ପ୍ରଦାନ କରାଯାଇଛି। ତେବେ ଗୋଟିଏ ବିଭାଗ ତରଫରୁ ବାହାରିଥିବା ଏହି ବିଜ୍ଞାପନରେ ତିନି ପ୍ରକାରର ସୂଚନା ଦିଆଯାଇଛି।
କେତେକ ସମ୍ବାଦପତ୍ରରେ ବାହାରିଥିବା ବିଜ୍ଞାପନରେ କୁହାଯାଇଛି ଯେ, ଆସନ୍ତା 26 ତାରିଖ ସୋମବାରରେ ସାବିତ୍ର ବ୍ରତ ଥିବାରୁ ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠ ବନ୍ଦ ରହିବ। ତେବେ ଆଉ କେତେକ ଖବର କାଗଜରେ ମୁଖ୍ୟମନ୍ତ୍ରୀଙ୍କ ଗୁରୁତ୍ବପୂର୍ଣ୍ଣ କାର୍ଯ୍ୟ ଥିବାରୁ ସୋମବାର ଦିନ ଅଭିଯୋଗ ପ୍ରକୋଷ୍ଠ ବନ୍ଦ ରହିବ ବୋଲି କୁହାଯାଇଛି। ତେବେ ପ୍ରକୃତରେ ସାବିତ୍ରୀ ପାଇଁ ନା ମୁଖ୍ୟମନ୍ତ୍ରୀଙ୍କ ଗୁରୁତ୍ବପୂର୍ଣ୍ଣ କାର୍ଯ୍ୟ ପାଇଁ ଅଭିଯୋଗ ବନ୍ଦ ହେଲା ତାହା ସନ୍ଦେହ ସୃଷ୍ଟି ହୋଇଛି।
ତେବେ ସବୁଠାରୁ ସାଂଘାତିକ ଘଟଣା ହେଲା ଯେ, ଏହି ଅଭିଯୋଗ ଶୁଣାଣିର ତାରିଖକୁ ନେଇ ଦୁଇ ପ୍ରକାରର ସୂଚନା ରହିଛି। କେତେକ ଖବରକାଗଜରେ ମୁଖ୍ୟମନ୍ତ୍ରୀଙ୍କ ଅଭିଯୋଗ ସୋମବାରରେ ବନ୍ଦ ରହିଥିବାରୁ ତାହା ମଙ୍ଗଳବାରରେ ଅର୍ଥାତ 27 ତାରିଖରେ ଶୁଣାଣି କରାଯିବ ବୋଲି ପ୍ରକାଶିତ ହୋଇଛି। ହେଲେ ଆଉ କେତେକ ଖବର କାଗଜରେ ଏହି ଶୁଣାଣି ତାରିଖ ପରବର୍ତ୍ତି ସମୟରେ ଜଣାଇ ଦିଆଯିବ ବୋଲି କୁହାଯାଇଛି। ଫଳରେ ଏହା ପ୍ରକୃତରେ କେବେ ଶୁଣାଣି ହେବ ସେ ନେଇ ବଡ ଦ୍ବନ୍ଦ ସୃଷ୍ଟି ହୋଇଛି।
ଏହି ବିଜ୍ଞାପନରୁ ସ୍ପଷ୍ଟ ହୋଇଛି ଯେ, ଗୋଟିଏ ବିଭାଗରେ ତିନି ପ୍ରକାରର ତଥ୍ୟ ବାହାରକୁ ଆସୁଛି। ସାଧାରଣତଃ ସରକାରରେ ବିଭାଗ ବିଭାଗ ମଧ୍ୟରେ ସମନ୍ବୟ ରହି ନ ଥାଏ। ହେଲେ ଗୋଟିଏ ବିଭାଗ ଭିତରେ ସମନ୍ବୟ ନ ରହିବା ସବୁଠାରୁ ବଡ ଆଶ୍ଚର୍ଯ୍ୟଜନକ ଘଟଣା ବୋଲି ସ୍ପଷ୍ଟ ହୋଇଛି। ଏହା ସୂଚାଇ ଦେଉଛି ଯେ, ସରକାରଙ୍କୁ ଅଫିସରମାନେ ହେୟଜ୍ଞାନ କରୁଛନ୍ତି କିମ୍ବା ସରକାରଙ୍କୁ ଅଧିକାରୀଙ୍କ ଖାତିର ବା ଭୟ ରହୁ ନାହିଁ।
