ପିପିଲି: ନିମାପଡା ବଳଙ୍ଗାର ଛାତ୍ରୀଙ୍କୁ ପୋଡି ଜାଳିଦେବା ଘଟଣାରେ ଆଜି ଥାନା ଘେରାଉ କରିଛି ବିଜେଡି। ଦଳର ଶତାଧିକ କର୍ମି ଥାନା ଭିତରକୁ ଧସେଇ ପଶିବାକୁ ଉଦ୍ୟମ କରୁଥିବା ବେଳେ ପୋଲିସ ସହିତ ହୋଇଛି ପେଲାପେଲି। କିଛି ସମୟ ଧରି ଥାନା ପରିସରରେ ଉତ୍ତେଜନା ଲାଗି ରହିଥିଲା। ଏହାପରେ ବିଜେଡି ନେତା ଓ କର୍ମୀମାନେ ଥାନା ଆଗରେ ଧାରଣାରେ ବସିଥିଲେ। ଛାତ୍ରୀକୁ ପୋଡିଥିବା ଅଭିଯୁକ୍ତମାନଙ୍କୁ ତୁରୁନ୍ତ ଗିରଫ କରିବାକୁ ସେମାନେ ଦାବୀ କରିଥିଲେ।
ଯଦି 48 ଘଣ୍ଟା ମଧ୍ୟରେ ଦୋଷୀମାନଙ୍କୁ ପୋଲିସ ଧରି ନ ପାରେ ଦେବେ ବିଜେଡି ସାରା ରାଜ୍ୟରେ ବିକ୍ଷୋଭ କରିବ ବୋଲି ଧମକ ଦେଇଛନ୍ତି। ଏହି ଘେରାଉରେ ବିଜେଡି ନେତା ତଥା ସାଂସଦ ଶୁଭାଶିସ ଖୁଣ୍ଟିଆ, ଲେଖାଶ୍ରୀ ସାମନ୍ତସିଂହାଁର, ଉମାକାନ୍ତ ସାମନ୍ତରାୟ ପ୍ରମୁଖ ଯୋଗ ଦେଇଛନ୍ତି।
ଗତକାଲି ବଳଙ୍ଗାର ଏକ ଛାତ୍ରୀ ସାଙ୍ଗ ଘରକୁ ଯାଉଥିବା ବେଳେ ତାଙ୍କୁ ରାସ୍ତାରେ କେତେକ ଦୁର୍ବୃତ୍ତ କିରାସିନୀ ଢାଳି ପୋଡି ମାରିବାକୁ ଉଦ୍ୟମ କରିଥିଲେ। ତେବେ ଦୁର୍ବୃତ୍ତମାନେ ଫେରାର ହୋଇଯାଇଥିବା ବେଳେ ପରେ ଛାତ୍ରୀ ଉଦ୍ଧାର କରାଯାଇ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ହେଲେ ଅଧିକ ଚିକିତ୍ସା ପାଇଁ ତାଙ୍କୁ ଏମସ ଭୁବନେଶ୍ବରରେ ଭର୍ତ୍ତି କରାଯାଇଛି। ଏହି ଘଟଣା ନେଇ ପୁଣିଥରେ ବିଭିନ୍ନ ସ୍ଥାନରେ ଉତ୍ତେଜନା ସୃଷ୍ଟି ହୋଇଛି।