ନୂଆଦିଲ୍ଲୀ: ଏସିଆନ୍ କ୍ରିକେଟ୍ ର ମହାକୁମ୍ଭ ଅର୍ଥାତ୍ ଏସିଆ କପ୍ ଚଳିତ ବର୍ଷ ସେପ୍ଟେମ୍ବରରେ ଖେଳାଯିବ। ଏସୀୟ କ୍ରିକେଟ୍ ପରିଷଦ (ଏସିସି) ଅଧ୍ୟକ୍ଷ ମୋହସିନ୍ ନକଭି ୨୦୨୫ ଏସିଆ କପ୍ର କାର୍ଯ୍ୟସୂଚୀ ଘୋଷଣା କରିଛନ୍ତି। ଏହି ଟୁର୍ଣ୍ଣାମେଣ୍ଟ୍ ୯ ସେପ୍ଟେମ୍ବରରୁ ଆରମ୍ଭ ହେବ। ଏହାର ଫାଇନାଲ୍ ମ୍ୟାଚ୍ ୨୮ ସେପ୍ଟେମ୍ବରରେ ଖେଳାଯିବ।
ପ୍ରକାଶ ଯେ, ୨୦୨୫ ଏସିଆ କପ୍ର କେବଳ ପ୍ରଥମ ମ୍ୟାଚ୍ ଏବଂ ଫାଇନାଲ୍ ତାରିଖ ଘୋଷଣା କରାଯାଇଛି। ମୋହସିନ୍ ନକଭି କହିଛନ୍ତି ଯେ, ୨୦୨୫ ଏସିଆ କପ୍ର ପ୍ରଥମ ମ୍ୟାଚ୍ ୯ ସେପ୍ଟେମ୍ବରରେ ଖେଳାଯିବ। ଏସିଆ କପ୍ର ଫାଇନାଲ୍ ୨୮ ସେପ୍ଟେମ୍ବରରେ ହେବ। କୁହାଯାଉଛି ଯେ, ସଦ୍ୟ ଏସିଆନ୍ କ୍ରିକେଟ୍ ପରିଷଦ (ଏସିସି) ବୈଠକରେ ଭାରତ, ପାକିସ୍ତାନ ଏବଂ ବାଂଲାଦେଶ ନିଜ ନିଜ ପ୍ରସଙ୍ଗକୁ ଭୁଲି ଏସିଆ କପ୍ରେ ଖେଳିବାକୁ ନିଷ୍ପତ୍ତି ନେଇଛନ୍ତି।
ଭାରତକୁ ୨୦୨୫ ଏସିଆ କପର ଆୟୋଜନ ଦାୟିତ୍ୱ ମିଳିଥିଲା, କିନ୍ତୁ କିଛି ଦିନ ପୂର୍ବରୁ BCCI ଏହି ଟୁର୍ଣ୍ଣାମେଣ୍ଟକୁ ଏକ ନିରପେକ୍ଷ ସ୍ଥାନରେ ଆୟୋଜନ କରିବାକୁ ରାଜି ହୋଇଥିଲା। ଭାରତ ଏବଂ ପାକିସ୍ତାନ ମଧ୍ୟରେ ମ୍ୟାଚ୍ ନେଇ ଏବେ ବି ସନ୍ଦେହ ରହିଛି। ଏ ବିଷୟରେ କୌଣସି ସରକାରୀ ସୂଚନା ପ୍ରକାଶ କରାଯାଇ ନାହିଁ।
ଏସିଆ କପରେ ପ୍ରଥମ ଥର ପାଇଁ ୮ ଟି ଦଳ ଖେଳିବେ:
୨୦୨୫ ଏସିଆ କପରେ ମୋଟ ୮ ଟି ଦଳ ଅଂଶଗ୍ରହଣ କରିବେ। ଏହା ପ୍ରଥମ ଥର ହେବ ଯେ, ଏସିଆ କପରେ ଏତେ ସଂଖ୍ୟକ ଦଳ ରହିବେ। ୧୯୮୪ ରେ ପ୍ରଥମ ଥର ପାଇଁ ଏସିଆ କପ୍ ଆୟୋଜନ କରାଯାଇଥିଲା ଏବଂ ଏପର୍ଯ୍ୟନ୍ତ ମୋଟ ୧୬ ଥର ଏସିଆ କପ୍ ଖେଳାଯାଇଛି। କିନ୍ତୁ ୨୦୨୫ ମସିହାରେ ଏହା ପ୍ରଥମ ଥର ହେବାକୁ ଯାଉଛି ଯେତେବେଳେ ମୋଟ ୮ ଟି ଦଳ ଏସିଆ କପରେ ଅଂଶଗ୍ରହଣ କରିବେ। ଏହି ୮ଟି ଦଳର ନାମ ହେଉଛି ଭାରତ, ପାକିସ୍ତାନ, ବାଂଲାଦେଶ, ଆଫଗାନିସ୍ତାନ, ଶ୍ରୀଲଙ୍କା, ହଂକଂ, ୟୁଏଇ ଏବଂ ଓମାନ।