ନୂଆଦିଲ୍ଲୀ: ଅବୈଧ ବେଟିଂ ଆପ୍ 1xBet ସହ ଜଡିତ ମନି ଲଣ୍ଡରିଂ ମାମଲାରେ ପ୍ରବର୍ତ୍ତନ ନିର୍ଦ୍ଦେଶାଳୟ (ED) ଏକ ବଡ଼ କାର୍ଯ୍ୟାନୁଷ୍ଠାନ ଆରମ୍ଭ କରିଛି। ଏହି ମାମଲାରେ ପଚରାଉଚରା ପାଇଁ ଅନେକ ପ୍ରସିଦ୍ଧ ବ୍ୟକ୍ତିଙ୍କୁ ସମନ୍ କରାଯାଇଛି। ପୂର୍ବତନ ଭାରତୀୟ କ୍ରିକେଟର ଯୁବରାଜ ସିଂହଙ୍କୁ ସେପ୍ଟେମ୍ବର 23 ତାରିଖରେ ଦିଲ୍ଲୀ ମୁଖ୍ୟାଳୟରେ ହାଜର ହେବାକୁ ଇଡି ସମନ୍ କରିଛି। ସେହିଭଳି ଅଭିନେତା ସୋନୁ ସୁଦଙ୍କୁ ସେପ୍ଟେମ୍ବର 24 ତାରିଖରେ ପଚରାଉଚରା ପାଇଁ ଡକାଯାଇଛି। କ୍ରିକେଟର ରବିନ୍ ଉଥାପ୍ପାଙ୍କୁ ମଧ୍ୟ ସେପ୍ଟେମ୍ବର 22 ତାରିଖରେ ସମନ୍ କରାଯାଇଛି।
ଏହି ମାମଲାରେ କ୍ରିକେଟର ସୁରେଶ ରୈନା ଏବଂ ଶିଖର ଧାୱନଙ୍କୁ ମଧ୍ୟ ପଚରାଉଚରା କରାଯାଇଛି। ସେହିଭଳି ବଙ୍ଗୀୟ ଅଭିନେତା ଅଙ୍କୁଶ ହାଜରା ଇଡି କାର୍ଯ୍ୟାଳୟରେ ପହଞ୍ଚିଛନ୍ତି ଏବଂ ଏଜେନ୍ସି ପୂର୍ବତନ ଟିଏମସି ସାଂସଦ ମିମି ଚକ୍ରବର୍ତ୍ତୀଙ୍କୁ ମଧ୍ୟ ପଚରାଉଚରା କରିଛି। ସୂତ୍ର ଅନୁସାରେ, ଅଭିନେତ୍ରୀ ଉର୍ବଶୀ ରଉତେଲା ଏପର୍ଯ୍ୟନ୍ତ ଇଡିକୁ ସ୍ପଷ୍ଟ କରିନାହାଁନ୍ତି ଯେ, ସେ ତଦନ୍ତରେ ଯୋଗଦେବେ କି ନାହିଁ। ଏଜେନ୍ସି ବର୍ତ୍ତମାନ ତାଙ୍କ ପକ୍ଷ ଅପେକ୍ଷା କରିଛି।
ଏହି ଭାରତୀୟ କ୍ରିକେଟରମାନଙ୍କୁ ପୂର୍ବରୁ ପଚରାଉଚରା କରାଯାଇଛି:
ଏହି ମାମଲାରେ ଇଡି ପୂର୍ବରୁ ଭାରତୀୟ କ୍ରିକେଟର ଶିଖର ଧାୱନ, ସୁରେଶ ରାଇନା ଏବଂ ହରଭଜନ ସିଂହଙ୍କୁ ଜେରା କରିସାରିଛି। ବର୍ତ୍ତମାନ ଯୁବରାଜ ସିଂହ ଏବଂ ରବିନ ଉଥାପ୍ପାଙ୍କୁ ଅନଲାଇନ୍ ବେଟିଂ ଆପ୍ 1xBet ର ପ୍ରଚାର ସହିତ ଜଡିତ ଅଭିଯୋଗରେ ସମନ କରାଯାଇଛି। ରବିନ ଉଥାପ୍ପା 2007 ରେ ଖେଳାଯାଇଥିବା ପ୍ରଥମ T20 ବିଶ୍ୱକପର ବିଜୟୀ ଭାରତୀୟ ଦଳର ଏକ ଗୁରୁତ୍ୱପୂର୍ଣ୍ଣ ଅଂଶ ଥିଲେ।
ଘଟଣା କ’ଣ?:
ଏହି ତଦନ୍ତ କଥିତ ଅବୈଧ ଅନଲାଇନ୍ ବେଟିଂ ଆପ୍ ସହିତ ଜଡିତ। ଅଭିଯୋଗ କରାଯାଇଛି ଯେ, ଏହି ଆପ୍ ମାଧ୍ୟମରେ ଅନେକ ନିବେଶକ ଏବଂ ସାଧାରଣ ଲୋକଙ୍କଠାରୁ କୋଟି କୋଟି ଟଙ୍କା ଠକେଇ କରାଯାଇଥିଲା, ଏବଂ ବଡ଼ ଧରଣର ଟିକସ ଠକେଇ ମଧ୍ୟ କରାଯାଇଥିଲା। ଅନ୍ୟପକ୍ଷରେ କମ୍ପାନୀ ଦାବି କରୁଛି ଯେ, 1xBet ଏକ ବିଶ୍ୱସ୍ତରୀୟ ପ୍ଲାଟଫର୍ମ ଯାହାର ବେଟିଂ ଶିଳ୍ପରେ 18 ବର୍ଷର ଅଭିଜ୍ଞତା ଅଛି। କମ୍ପାନୀ ଅନୁଯାୟୀ, ସେମାନଙ୍କ ପ୍ଲାଟଫର୍ମ ସହିତ ଜଡିତ ବ୍ୟବହାରକାରୀମାନେ ହଜାର ହଜାର କ୍ରୀଡା ଇଭେଣ୍ଟରେ ବେଟିଂ କରିବାର ସୁବିଧା ପାଆନ୍ତି। ଏହା ସହିତ ସେମାନଙ୍କର ୱେବସାଇଟ୍ ଏବଂ ମୋବାଇଲ୍ ଆପ୍ 70 ରୁ ଅଧିକ ଭାଷାରେ ଉପଲବ୍ଧ।