ନୂଆଦିଲ୍ଲୀ: କେନ୍ଦ୍ର ଗୃହ ଏବଂ ସମବାୟ ମନ୍ତ୍ରୀ ଅମିତ ଶାହ ଗୁରୁଗ୍ରାମର ମାନେସରରେ ଜାତୀୟ ସୁରକ୍ଷା ଗାର୍ଡ (ଏନ୍. ଏସ୍. ଜି.) ର ୪୧ତମ ପ୍ରତିଷ୍ଠା ଦିବସ ସମାରୋହକୁ ମୁଖ୍ୟ ଅତିଥି ଭାବେ ସମ୍ବୋଧିତ କରିଥିଲେ। ଗୃହମନ୍ତ୍ରୀ ଏନ୍. ଏସ୍. ଜି. ପରିସରରେ ସ୍ୱତନ୍ତ୍ର ପରିଚାଳନା ତାଲିମ କେନ୍ଦ୍ର (ଏସ୍. ଓ. ଟି. ସି.)ର ଭିତ୍ତିପ୍ରସ୍ତର ସ୍ଥାପନ କରିଥିଲେ। ଏହି କାର୍ଯ୍ୟକ୍ରମରେ କେନ୍ଦ୍ର ଗୃହ ସଚିବ, ଗୁଇନ୍ଦା ନିର୍ଦ୍ଦେଶକ ଏବଂ ଏନ୍.ଏସ୍.ଜି.ର ମହାନିର୍ଦ୍ଦେଶକଙ୍କ ସମେତ ଅନେକ ମାନ୍ୟଗଣ୍ୟ ବ୍ୟକ୍ତି ଯୋଗ ଦେଇଥିଲେ।
ଶ୍ରୀ ଶାହ ତାଙ୍କ ଅଭିଭାଷଣରେ କହିଥିଲେ ଯେ, ସର୍ବତ୍ର, ସର୍ବୋତ୍ତମ ଏବଂ ସୁରକ୍ଷା ଭଳି ତିନୋଟି ନୀତି ସହିତ ସମର୍ପଣ, ସାହସ ଏବଂ ରାଷ୍ଟ୍ରଭକ୍ତି କୁ ନିଜର ଗୁଣ ଭାବେ ନେଇ ଏନ୍. ଏସ୍. ଜି. ଚାରି ଦଶନ୍ଧି ଧରି ଦେଶରେ ଆତଙ୍କବାଦ ବିରୋଧରେ ଏକ ଗୁରୁତ୍ୱପୂର୍ଣ୍ଣ ଲଢ଼େଇ ଲଢ଼ି ଆସିଛି। ଦେଶର ପ୍ରତ୍ୟେକ ନାଗରିକ ଆଶ୍ୱସ୍ତ ଅନୁଭବ କରୁଛନ୍ତି ଯେ, ଆମର ସୁରକ୍ଷା ଏବଂ ଆତଙ୍କବାଦ ବିରୋଧରେ ଲଢ଼େଇ ଅତ୍ୟନ୍ତ ସୁରକ୍ଷିତ ସଂସ୍ଥା ହାତରେ ରହିଛି। ସେ କହିଥିଲେ, ଏନ୍. ଏସ୍. ଜି. କମାଣ୍ଡୋମାନେ ଯେଉଁ ଦୃଢ଼ ସଂକଳ୍ପବଦ୍ଧ, ସାହସୀ ଏବଂ ରଣନୈତିକ ଢଙ୍ଗରେ ଆତଙ୍କବାଦ ବିରୋଧରେ ଲଢ଼ିଛନ୍ତି, ଫଳ ପ୍ରଦାନ କରିଛନ୍ତି, ତାହା ଭାରତର ସୁରକ୍ଷା ଇତିହାସରେ ସ୍ୱର୍ଣ୍ଣ ଅକ୍ଷରରେ ଲିପିବଦ୍ଧ ହୋଇଛି।
କେନ୍ଦ୍ର ଗୃହମନ୍ତ୍ରୀ କହିଥିଲେ, ଆଜି ସ୍ୱତନ୍ତ୍ର ପରିଚାଳନା ତାଲିମ କେନ୍ଦ୍ର (ଏସ୍. ଓ. ଟି. ସି.) ର ଭିତ୍ତିପ୍ରସ୍ତର ସ୍ଥାପନ କରାଯାଇଛି। ସେ କହିଥିଲେ ଯେ ୮ ଏକର ଜମିରେ ୧୪୧ କୋଟି ଟଙ୍କା ବ୍ୟୟରେ ଏହି କେନ୍ଦ୍ର ନିର୍ମାଣ କରାଯାଉଛି। ଏହା ଆତଙ୍କବାଦର ମୁକାବିଲା କରୁଥିବା ସ୍ୱତନ୍ତ୍ର କମାଣ୍ଡୋମାନଙ୍କୁ ଅତ୍ୟାଧୁନିକ ତାଲିମ ପ୍ରଦାନ କରିବ। ଏସ୍. ଓ. ଟି. ସି. ରେ, କେବଳ ଏନ୍. ଏସ୍. ଜି. କମାଣ୍ଡୋ ନୁହନ୍ତି, ବରଂ ସାରା ଦେଶରେ ପୋଲିସ୍ ବାହିନୀ ମଧ୍ୟରେ ସ୍ଥାପିତ ଆତଙ୍କବାଦ ବିରୋଧୀ ୟୁନିଟଗୁଡ଼ିକୁ ମଧ୍ୟ ଅତ୍ୟାଧୁନିକ ଜ୍ଞାନକୌଶଳର ସହିତ ତାଲିମ ଦିଆଯିବ, ଯାହାଦ୍ୱାରା ସେମାନେ ଆତଙ୍କବାଦ ବିରୋଧରେ ଲଢ଼େଇ ପାଇଁ ପ୍ରସ୍ତୁତ ହୋଇପାରିବେ। ଶ୍ରୀ ଶାହ କହିଥିଲେ, ଭାରତ ଭଳି ବିଶାଳ ଦେଶରେ କେନ୍ଦ୍ର ସରକାର ଏକାକୀ ଆତଙ୍କବାଦର ମୁକାବିଲା କରିପାରିବେ ନାହିଁ। ବରଂ, ସମସ୍ତ ରାଜ୍ୟ ସରକାର, ରାଜ୍ୟ ପୋଲିସ ବାହିନୀର ସ୍ୱତନ୍ତ୍ର ୟୁନିଟ୍, ଏନ୍. ଏସ୍. ଜି. ଏବଂ ସମସ୍ତ କେନ୍ଦ୍ରୀୟ ସଶସ୍ତ୍ର ପୋଲିସ ବାହିନୀ (ସି. ଏ. ପି. ଏଫ୍.) ଦେଶର ସୁରକ୍ଷା ସୁନିଶ୍ଚିତ କରିବା ପାଇଁ ମିଳିତ ଭାବେ କାର୍ଯ୍ୟ କରିବା ଆବଶ୍ୟକ। ସେ ଆହୁରି ମଧ୍ୟ କହିଥିଲେ ଯେ, ଏହି ଏସ୍. ଓ. ଟି. ସି. ଆଗାମୀ ଦିନରେ ଆତଙ୍କବାଦ ବିରୋଧରେ ଦେଶର ଲଢ଼େଇକୁ ତ୍ୱରାନ୍ୱିତ କରିବ ଏବଂ ଆମ ସେନାକୁ ସର୍ବଦା ପ୍ରସ୍ତୁତ ରଖିବ।
ଅମିତ ଶାହ କହିଥିଲେ, ୧୯୮୪ ମସିହାରୁ ଏନ୍. ଏସ୍. ଜି. ସର୍ବତ୍ର, ସର୍ବୋତ୍ତମ ଏବଂ ସୁରକ୍ଷା ଭଳି ତିନୋଟି ନୀତିକୁ ପ୍ରତିଫଳିତ କରି ଅପରେସନ୍ ଅଶ୍ୱମେଧ, ଅପରେସନ୍ ବଜ୍ର ଶକ୍ତି ଏବଂ ଅପରେସନ୍ ଧଙ୍ଗୁ ଭଳି ଅଭିଯାନ ତଥା ଅକ୍ଷରଧାମ ଆକ୍ରମଣ ଏବଂ ମୁମ୍ବାଇ ଆତଙ୍କବାଦୀ ଆକ୍ରମଣ ସମୟରେ ସାହସିକତା ଏବଂ ସାମର୍ଥ୍ୟ ସହିତ ଦେଶକୁ ସୁରକ୍ଷା ପ୍ରଦାନ କରିଆସିଛି। ଏନ୍. ଏସ୍. ଜି. ର ସାହସ ଏବଂ ସମର୍ପଣ ପାଇଁ ସମଗ୍ର ଦେଶ ଗର୍ବିତ। ଶ୍ରୀ ଶାହ ଘୋଷଣା କରିଥିଲେ ଯେ, ଆଗାମୀ ଦିନରେ ମୋଦୀ ସରକାର ଏନ୍. ଏସ୍. ଜି. ର କାର୍ଯ୍ୟରେ ଗୁରୁତ୍ୱପୂର୍ଣ୍ଣ ପରିବର୍ତ୍ତନ ଆଣିବେ। ସେ କହିଥିଲେ ଯେ ମୁମ୍ବାଇ, ଚେନ୍ନାଇ, କୋଲକାତା, ହାଇଦ୍ରାବାଦ, ଅହମ୍ମଦାବାଦ ଏବଂ ଜାମ୍ମୁରେ ଛଅଟି ଏନ୍. ଏସ୍. ଜି. ହବ୍ ପ୍ରତିଷ୍ଠା ହୋଇସାରିଛି, ଯେଉଁଠାରେ ଏନ୍. ଏସ୍. ଜି. କମାଣ୍ଡୋମାନେ ବର୍ଷର ୩୬୫ ଦିନ ପାଇଁ ଦିନରାତି ନିୟୋଜିତ ରହିଥାନ୍ତି। ବର୍ତ୍ତମାନ ଅଯୋଧ୍ୟାରେ ଏକ ନୂତନ ଏନ୍. ଏସ୍. ଜି. ହବ୍ ପ୍ରତିଷ୍ଠା କରାଯାଉଛି। ଏହି ହବ୍ ରେ କମାଣ୍ଡୋମାନେ ସର୍ବଦା ପ୍ରସ୍ତୁତ ରହିବେ ଏବଂ ସେମାନଙ୍କ ଜୋନରେ କୌଣସି ହଠାତ୍ ଆତଙ୍କବାଦୀ ଆକ୍ରମଣର ଦୃଢ଼ ଜବାବ ଦେବାକୁ ଉପଲବ୍ଧ ରହିବେ। ଶ୍ରୀ ଶାହ ଗୁରୁତ୍ୱାରୋପ କରିଥିଲେ, ଏନ୍. ଏସ୍. ଜି. ମୁଖ୍ୟାଳୟ ସାରା ଦେଶରେ ଏନ୍. ଏସ୍. ଜି. କମାଣ୍ଡୋ ଏବଂ ରାଜ୍ୟ ପୁଲିସ ବାହିନୀର ଆତଙ୍କବାଦ ନିରୋଧୀ ୟୁନିଟଗୁଡ଼ିକୁ ତାଲିମ ଦେବା, ସର୍ବୋତ୍ତମ ଅଭ୍ୟାସ ବାଣ୍ଟିବା ଏବଂ ବାହିନୀର ଉପଯୁକ୍ତତା ସୁନିଶ୍ଚିତ କରିବା ଉପରେ ନିରନ୍ତର ଧ୍ୟାନ ଦେବ।
କେନ୍ଦ୍ର ଗୃହମନ୍ତ୍ରୀ କହିଛନ୍ତି ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ସରକାର ଆତଙ୍କବାଦ ବିରୋଧରେ ଶୂନ୍ୟ ସହନଶୀଳତା ନୀତି ଗ୍ରହଣ କରିଛନ୍ତି। ୨୦୧୯ ମସିହାରୁ ମୋଦୀ ସରକାର ଦେଶକୁ ଆତଙ୍କବାଦୀ ବିପଦରୁ ରକ୍ଷା କରିବା ପାଇଁ ଗୁରୁତ୍ୱପୂର୍ଣ୍ଣ ପଦକ୍ଷେପ ନେଉଛନ୍ତି। ମୋଦୀ ସରକାର ବେଆଇନ କାର୍ଯ୍ୟକଳାପ ନିବାରଣ ଆଇନ (ୟୁ.ଏ.ପି.ଏ.) ଏବଂ ଜାତୀୟ ଅନୁସନ୍ଧାନ ସଂସ୍ଥା (ଏନ୍.ଆଇ.ଏ.) ଆଇନରେ ସଂଶୋଧନ କରିଛନ୍ତି, ମନି ଲଣ୍ଡରିଂ ନିବାରଣ ଆଇନ (ପି.ଏମ୍.ଏଲ୍.ଏ.) ଏବଂ ପ୍ରବର୍ତ୍ତନ ନିର୍ଦ୍ଦେଶାଳୟ (ଇ.ଡି.) କୁ ସକ୍ରିୟ କରିଛନ୍ତି, ଯାହାଦ୍ୱାରା ଆତଙ୍କବାଦୀ ଗୋଷ୍ଠୀଗୁଡ଼ିକର ପାଣ୍ଠି ଯୋଗାଣକୁ ରୋକାଯାଇପାରିବ ଏବଂ ଆତଙ୍କବାଦୀ ପାଣ୍ଠି ଯୋଗାଣର ବୈଜ୍ଞାନିକ ତଦନ୍ତ ପାଇଁ ଏକ ବ୍ୟବସ୍ଥା ପ୍ରତିଷ୍ଠା କରାଯାଇପାରିବ। ଶ୍ରୀ ଶାହ ଆହୁରି ମଧ୍ୟ କହିଛନ୍ତି ଯେ, ସରକାର ପପୁଲାର ଫ୍ରଣ୍ଟ ଅଫ୍ ଇଣ୍ଡିଆ (ପି.ଏଫ୍.ଆଇ.) ଉପରେ ପ୍ରତିବନ୍ଧକ ଲଗାଇଛନ୍ତି, ମଲ୍ଟି ଏଜେନ୍ସି ସେଣ୍ଟର (ଏମ୍.ଏ.ସି.) କୁ ସୁଦୃଢ଼ କରିଛନ୍ତି, କ୍ରାଇମ୍ ଆଣ୍ଡ କ୍ରିମିନାଲ୍ ଟ୍ରାକିଂ ନେଟୱାର୍କ ଆଣ୍ଡ ସିଷ୍ଟମ୍ (ସି.ସି.ଟି.ଏନ୍.ଏସ୍.) ଏବଂ ନ୍ୟାସନାଲ ଇଣ୍ଟେଲିଜେନ୍ସ ଗ୍ରିଡ୍ (ନାଟ୍ ଗ୍ରିଡ୍) ମାଧ୍ୟମରେ ସାରା ଦେଶର ଅନୁସନ୍ଧାନକାରୀ ସଂସ୍ଥା ସହିତ ତଥ୍ୟ ଆଦାନପ୍ରଦାନ ଆରମ୍ଭ କରିଛନ୍ତି ଏବଂ ପ୍ରଥମ ଥର ପାଇଁ ତିନୋଟି ନୂତନ ଅପରାଧିକ ଆଇନରେ ଆତଙ୍କବାଦକୁ ପରିଭାଷିତ କରିଛନ୍ତି।
ଶ୍ରୀ ଶାହ କହିଥିଲେ, ୫୭ରୁ ଅଧିକ ବ୍ୟକ୍ତି ଏବଂ ସଙ୍ଗଠନକୁ ଆତଙ୍କବାଦୀ ସଙ୍ଗଠନ ଏବଂ ଆତଙ୍କବାଦୀ ଭାବେ ଘୋଷଣା କରାଯାଇଛି, ଯାହାଦ୍ୱାରା ସେମାନଙ୍କ କାର୍ଯ୍ୟକଳାପ ଉପରେ ସଫଳ ନିୟନ୍ତ୍ରଣ ସମ୍ଭବ ହୋଇପାରିଛି। ମୋଦୀ ସରକାର ଧାରା ୩୭୦ ଉଚ୍ଛେଦ, ସର୍ଜିକାଲ୍ ଷ୍ଟ୍ରାଇକ୍, ଏୟାର ଷ୍ଟ୍ରାଇକ୍ ଏବଂ ଅପରେସନ୍ ସିନ୍ଦୁର ଭଳି କାର୍ଯ୍ୟାନୁଷ୍ଠାନ ମାଧ୍ୟମରେ ଆତଙ୍କବାଦୀ ନେଟୱାର୍କର ମୂଳରେ ଗୁରୁତର ପ୍ରହାର କରିଛନ୍ତି। ସେ କହିଥିଲେ ଯେ, ଆମର ସୁରକ୍ଷା ସଂସ୍ଥାଗୁଡ଼ିକ ପ୍ରମାଣିତ କରିଛନ୍ତି ଯେ ସେମାନେ ଆତଙ୍କବାଦୀମାନଙ୍କୁ ପାତାଳରୁ ମଧ୍ୟ ଖୋଜି ବାହାର କରିବେ ଏବଂ ଦଣ୍ଡିତ କରିବେ। ଏବେ ଆତଙ୍କବାଦୀମାନେ ବିଶ୍ୱର କୌଣସି ସ୍ଥାନରେ ଲୁଚି ରହିପାରିବେ ନାହିଁ। ଅପରେସନ ସିନ୍ଦୁର ଭାରତ ଉପରେ ଆକ୍ରମଣ କରିବାକୁ ଯୋଜନା କରୁଥିବା ପାକିସ୍ତାନୀ ଆତଙ୍କବାଦୀ ଗୋଷ୍ଠୀଗୁଡ଼ିକର ମୁଖ୍ୟାଳୟକୁ ସେମାନଙ୍କ ପ୍ରଶିକ୍ଷଣ ଶିବିର ଏବଂ ଲଞ୍ଚ ପ୍ୟାଡ ସହିତ ଧ୍ୱଂସ କରିଦେଇଥିଲା। ସେ ଆହୁରି ମଧ୍ୟ କହିଥିଲେ ଯେ, ଅପରେସନ ମହାଦେବ ପହଲଗାମ ଆତଙ୍କବାଦୀ ଆକ୍ରମଣର ଅପରାଧୀମାନଙ୍କୁ ନିଶ୍ଚିହ୍ନ କରିଥିଲା, ଯାହାଦ୍ୱାରା ଆମ ସୁରକ୍ଷା ବାହିନୀ ଉପରେ ଦେଶର ବିଶ୍ୱାସ ବୃଦ୍ଧି ପାଇଥିଲା।
କେନ୍ଦ୍ର ଗୃହମନ୍ତ୍ରୀ କହିଛନ୍ତି, ଗତ ଚାରି ଦଶନ୍ଧି ମଧ୍ୟରେ ଏନ୍. ଏସ୍. ଜି. କମାଣ୍ଡୋମାନେ ସାରା ଦେଶରେ ୭୭୦ରୁ ଅଧିକ ଗୁରୁତ୍ୱପୂର୍ଣ୍ଣ ସ୍ଥାନର ଅନୁସନ୍ଧାନ କରିଛନ୍ତି ଏବଂ ସମ୍ଭାବ୍ୟ ଆତଙ୍କବାଦୀ ଆକ୍ରମଣର ମୁକାବିଲା ପାଇଁ ରଣନୈତିକ ଯୋଜନା ସହିତ ଏକ ଡାଟା ବ୍ୟାଙ୍କ ସୃଷ୍ଟି କରିଛନ୍ତି। ଅଧିକନ୍ତୁ, ଏନ୍. ଏସ୍. ଜି. ଡାକ୍ତରଖାନା, ଧାର୍ମିକ ସ୍ଥଳ, ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଅନୁଷ୍ଠାନ, ଜଳପଥ ଏବଂ ଭାରତର ସଂସଦର ସୁରକ୍ଷା ପାଇଁ ସୂକ୍ଷ୍ମ ଭାବରେ ଯୋଜନା କରିଛି। ମହାକୁମ୍ଭ ହେଉ, ପୁରୀର ରଥଯାତ୍ରା ହେଉ, କିମ୍ବା କୌଣସି ଧାର୍ମିକ କାର୍ଯ୍ୟକ୍ରମ ହେଉ, ଏନ୍. ଏସ୍. ଜି. ସାହସ, ସମର୍ପଣ ଏବଂ ସୁରକ୍ଷାର ପ୍ରତୀକ ପାଲଟିଛି। ସେ କହିଥିଲେ ଯେ, ଆଗାମୀ ଦିନରେ ମୋଦୀ ସରକାର ଏନ୍. ଏସ୍. ଜି. କୁ କେବଳ ଅତ୍ୟାଧୁନିକ ପ୍ରଯୁକ୍ତିବିଦ୍ୟାରେ ସଜ୍ଜିତ କରିବେ ନାହିଁ, ବରଂ ଏହାର କାର୍ଯ୍ୟରେ ମଧ୍ୟ ଗୁରୁତ୍ୱପୂର୍ଣ୍ଣ ପରିବର୍ତ୍ତନ ଆଣିବେ। ଏନ୍. ଏସ୍. ଜି. ଆଗାମୀ ଅନେକ ବର୍ଷ ପର୍ଯ୍ୟନ୍ତ ନିଜର ଚାରି ଦଶନ୍ଧି ପୁରୁଣା ପରମ୍ପରାକୁ ବଜାୟ ରଖିବ।
ଅମିତ ଶାହ ଏହା ମଧ୍ୟ କହିଥିଲେ ଯେ, ୨୦୧୯ ପରଠାରୁ କେନ୍ଦ୍ରୀୟ ସଶସ୍ତ୍ର ପୁଲିସ ବାହିନୀ (ସି.ଏ.ପି.ଏଫ୍.)ର କର୍ମଚାରୀମାନେ ବୃକ୍ଷରୋପଣ ଅଭିଯାନର ଅଂଶବିଶେଷ ଭାବେ ୬.୫ କୋଟିରୁ ଅଧିକ ଚାରା ରୋପଣ କରିଛନ୍ତି, ଯାହା ଦେଶର ସବୁଜିମା ସଂରକ୍ଷଣରେ ଗୁରୁତ୍ୱପୂର୍ଣ୍ଣ ଯୋଗଦାନ ଦେଇଛି। ସେ କହିଥିଲେ ଯେ, ସି. ଏ. ପି. ଏଫ୍. କର୍ମଚାରୀମାନେ ଏହି ଗଛଗୁଡ଼ିକୁ ନିଜ ପିଲାମାନଙ୍କ ଭଳି ଲାଳନପାଳନ କରିଛନ୍ତି ଏବଂ ପରିବେଶ ସୁରକ୍ଷାରେ ପ୍ରମୁଖ ଭୂମିକା ଗ୍ରହଣ କରିଛନ୍ତି।