ନୂଆଦିଲ୍ଲୀ: ଆଫ୍ରିକାରେ ବ୍ୟାପିଥିବା କରୋନାଭାଇରସ୍ଠାରୁ ମଧ୍ୟ ଅଧିକ ବିପଜ୍ଜନକ ଇବୋଲା ଭାଇରସ୍କୁ ନେଇ ଆତଙ୍କ ମଧ୍ୟରେ ଉଗାଣ୍ଡାରୁ ଫେରିଥିବା ଜଣେ ମହିଳାଙ୍କୁ ବେଙ୍ଗାଲୁରୁର ଏକ ସରକାରୀ ହସ୍ପିଟାଲରେ ପର୍ଯ୍ୟବେକ୍ଷଣ ପାଇଁ ପୃଥକବାସରେ ରଖାଯାଇଛି। ଅହମ୍ମଦାବାଦ ଦେଇ ବେଙ୍ଗାଲୁରୁ ଆସିଥିବା ୨୮ ବର୍ଷୀୟା ମହିଳାଙ୍କୁ ମଙ୍ଗଳବାର ଦିନ ହସ୍ପିଟାଲରେ ଭର୍ତ୍ତି କରାଯାଇଥିଲା। ତାଙ୍କର ସାମାନ୍ୟ ଯନ୍ତ୍ରଣା ହେଉଛି କିନ୍ତୁ ଭାଇରସର କୌଣସି ଗମ୍ଭୀର ଲକ୍ଷଣ ନାହିଁ ଏବଂ ତାଙ୍କ ଅବସ୍ଥା ସ୍ଥିର ଅଛି।
ଅଧିକାରୀଙ୍କ ଅନୁଯାୟୀ, ଇବୋଲା ପ୍ରଭାବିତ ଅଞ୍ଚଳରୁ ଆସିଥିବା ମହିଳାଙ୍କୁ ହୋଟେଲରୁ ହସ୍ପିଟାଲକୁ ନିଆଯାଇଥିଲା। ତାଙ୍କ ନମୁନା ପରୀକ୍ଷା ପାଇଁ ନ୍ୟାସନାଲ୍ ଇନଷ୍ଟିଚ୍ୟୁଟ୍ ଅଫ୍ ଭାଇରୋଲୋଜି (NIV)କୁ ପଠାଯାଇଛି ଏବଂ ରିପୋର୍ଟକୁ ଅପେକ୍ଷା କରାଯାଇଛି।
ସରକାର କହିଛନ୍ତି ଯେ, ଭାରତରେ ଇବୋଲାର କୌଣସି ମାମଲା ନିଶ୍ଚିତ ହୋଇନାହିଁ। ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ମନ୍ତ୍ରଣାଳୟ ସ୍ପଷ୍ଟ କରିଛି ଯେ, ଭାରତରେ ଏପର୍ଯ୍ୟନ୍ତ ଇବୋଲା ଭାଇରସ୍ ରୋଗର କୌଣସି ନିଶ୍ଚିତ ମାମଲା ନାହିଁ। ସରକାର ପରିସ୍ଥିତି ଉପରେ କଡ଼ା ନଜର ରଖିଛନ୍ତି।
ଇବୋଲା ମାର୍ଗଦର୍ଶିକା ଜାରି କଲା ଭାରତ:
ଭାରତ ସରକାରଙ୍କୁ ଇବୋଲା ଭାଇରସ ପ୍ରତି ସତର୍କ କରାଯାଇଛି। ଭାରତୀୟ ସ୍ୱାସ୍ଥ୍ୟ ମନ୍ତ୍ରଣାଳୟ କଙ୍ଗୋ, ଉଗାଣ୍ଡା ଏବଂ ଦକ୍ଷିଣ ସୁଡାନରୁ ଆସୁଥିବା ଯାତ୍ରୀମାନଙ୍କ ପାଇଁ ଏକ ସ୍ୱାସ୍ଥ୍ୟ ପରାମର୍ଶ ଜାରି କରିଛି। ସରକାର ଜ୍ୱର, ବାନ୍ତି, ମୁଣ୍ଡବିନ୍ଧା, ଅସ୍ୱାଭାବିକ ରକ୍ତସ୍ରାବ କିମ୍ବା ସଂକ୍ରମିତ ବ୍ୟକ୍ତିଙ୍କ ସହ ସମ୍ପର୍କ ଭଳି ଲକ୍ଷଣ ଅନୁଭବ କରୁଥିବା ଯାତ୍ରୀମାନଙ୍କୁ ଇମିଗ୍ରେସନ୍ କ୍ଲିୟରାନ୍ସ ପୂର୍ବରୁ ତୁରନ୍ତ ବିମାନବନ୍ଦର ସ୍ୱାସ୍ଥ୍ୟ ଅଧିକାରୀଙ୍କୁ ରିପୋର୍ଟ କରିବାକୁ ପରାମର୍ଶ ଦେଇଛନ୍ତି।