ନୂଆଦିଲ୍ଲୀ: ଆଲ୍ଲାହାବାଦ ହାଇକୋର୍ଟ ମହମ୍ମଦ ଅହସାନ ଓରଫ ଅନିଲ ପଣ୍ଡିତଙ୍କୁ ଇସଲାମ ଧର୍ମ ଛାଡି ସନାତନ ଗ୍ରହଣ କରିବାକୁ ଅନୁମତି ପ୍ରଦାନ କରିଛନ୍ତି। ଉତ୍ତର ପ୍ରଦେଶ ବେଆଇନ ଧର୍ମ ପରିବର୍ତ୍ତନ ନିଷେଧ ଆଇନ, ୨୦୨୧ ଅନୁଯାୟୀ ମହମ୍ମଦ ଅହସାନଙ୍କୁ ସନାତନ ଧର୍ମ ଗ୍ରହଣ କରିବା ପାଇଁ କର୍ତ୍ତୃପକ୍ଷଙ୍କଠାରୁ ଅନୁମତି ପାଇବା ପରେ ଚାରି ସପ୍ତାହ ମଧ୍ୟରେ ଏକ ଆଦେଶ ଦେବାକୁ କୋର୍ଟ ପ୍ରୟାଗରାଜର ଏଡିଏମ ପ୍ରଶାସନକୁ ନିର୍ଦ୍ଦେଶ ଦେଇଛନ୍ତି।
ଆବେଦନକାରୀଙ୍କୁ ସମସ୍ତ ଦସ୍ତାବିଜରେ ନାମ ପରିବର୍ତ୍ତନ ପ୍ରକ୍ରିୟା ସମାପ୍ତ କରିବାକୁ ଏବଂ କୋର୍ଟକୁ ତାଙ୍କର ପ୍ରତିଶ୍ରୁତି ପୂରଣ କରିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି। କୋର୍ଟ କହିଛନ୍ତି ଯେ, ଯଦି ଆଇନର ଧାରା ୮ ଏବଂ ୯ ଅନୁଯାୟୀ ଆବଶ୍ୟକୀୟ ଆଇନଗତ ପ୍ରକ୍ରିୟା ଅନୁସରଣ କରାଯାଇଛି, ତେବେ ପ୍ରଶାସନିକ ଅଧିକାରୀମାନେ ଅନିର୍ଦ୍ଦିଷ୍ଟ ତଦନ୍ତ, ସନ୍ଦେହ କିମ୍ବା ବ୍ୟକ୍ତିଗତ ସନ୍ତୋଷ ଆଧାରରେ ଜଣେ ବ୍ୟକ୍ତିଙ୍କ ଧାର୍ମିକ ପରିଚୟ କିମ୍ବା ଧର୍ମାନ୍ତରୀକରଣରେ ହସ୍ତକ୍ଷେପ କରିପାରିବେ ନାହିଁ।
ନିର୍ଦ୍ଦେଶ ଜାରି କଲେ ଆଲ୍ଲାହାବାଦ ହାଇକୋର୍ଟ:
ଆବେଦନକାରୀ ଡକ୍ଟର ମହମ୍ମଦ ଅହସାନ ଓରଫ ଅନିଲ ପଣ୍ଡିତ, ପ୍ରୟାଗରାଜର ସିଏମପି ଡିଗ୍ରୀ କଲେଜରେ ଇଂରାଜୀର ସହାୟକ ପ୍ରଫେସର। ସେ ଇସଲାମରୁ ସନାତନ ଧର୍ମକୁ ପରିବର୍ତ୍ତନ କରିବା ପାଇଁ ଆଇନଗତ ପ୍ରକ୍ରିୟା ସମାପ୍ତ କରିଥିଲେ ଏବଂ ଅନୁମତି ପାଇଁ ଆବେଦନ କରିଥିଲେ। ପ୍ରଶାସନିକ ସ୍ତରରେ ତାଙ୍କର ଧର୍ମାନ୍ତରୀକରଣ ଗ୍ରହଣ କରାଯାଇ ନଥିଲା, ଯାହା ପରେ ସେ ଆହ୍ଲାବାଦ ହାଇକୋର୍ଟରେ ଏକ ଆବେଦନ ଦାଖଲ କରିଥିଲେ।
କୋର୍ଟଙ୍କ ନିର୍ଦ୍ଦେଶକ୍ରମେ, ADM ପ୍ରଶାସନ ରିପୋର୍ଟ କରିଥିଲା ଯେ, ଧର୍ମାନ୍ତରୀକରଣ ପାଇଁ ଆବେଦନ ଗ୍ରହଣ କରାଯାଇଛି। ଆବେଦନକାରୀ ୨୦୨୨ ମସିହାରୁ ରାଷ୍ଟ୍ରୀୟ ସ୍ୱୟଂସେବକ ସଂଘ ସହିତ ଜଡିତ ଅଛନ୍ତି। ତାଙ୍କ ପତ୍ନୀ ମଧ୍ୟ ଜଣେ ଶିକ୍ଷାବିତ୍ ଏବଂ ବାଲିଆର ସରକାରୀ ଇଣ୍ଟର କଲେଜରେ ଇଂରାଜୀ ଅଧ୍ୟାପକ ଭାବରେ କାର୍ଯ୍ୟ କରନ୍ତି।
ପ୍ରଶାସନିକ ପ୍ରତ୍ୟାଖ୍ୟାନ ଯୋଗୁଁ ଦମ୍ପତି ବିବାହ ପଞ୍ଜିକରଣ, ପରିଚୟପତ୍ର, ସରକାରୀ ରେକର୍ଡ ଏବଂ ଅନ୍ୟାନ୍ୟ ଆଇନଗତ ଅଧିକାର ସମ୍ପର୍କରେ ଗମ୍ଭୀର ଅସୁବିଧା ଏବଂ ମାନସିକ ଯନ୍ତ୍ରଣାର ସମ୍ମୁଖୀନ ହୋଇଥିଲେ। ସେମାନଙ୍କ ବୈବାହିକ ପରିଚୟ ଏବଂ ଭବିଷ୍ୟତର ପାରିବାରିକ ଅଧିକାର ମଧ୍ୟ ଅନିଶ୍ଚିତତାରେ ଘୋଡ଼ାଇ ହୋଇଯାଇଥିଲା।