ରୁଷ ରାଷ୍ଟ୍ରପତି ଭ୍ଲାଦମିର ପୁଟିନ ପୁଣିଥରେ ଭାରତ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱକୁ ଖୋଲାଖୋଲି ପ୍ରଶଂସା କରିଛନ୍ତି । ସେ କହିଛନ୍ତି ଯେ ଭାରତ-ଆମେରିକା ସମ୍ପର୍କ ଯେତେ ମଜବୁତ ହେଉନା କାହିଁକି, ତାହା ଭାରତ-ରୁଷ ସମ୍ପର୍କ ଉପରେ କୌଣସି ନକାରାତ୍ମକ ପ୍ରଭାବ ପକାଉନାହିଁ।
ପୁଟିନ କହିଛନ୍ତି, ଭାରତ ବିଶ୍ୱର ଅନ୍ୟତମ ବଡ଼ ଅର୍ଥନୀତି ଭାବେ ଦ୍ରୁତ ଗତିରେ ଆଗକୁ ବଢ଼ୁଛି ଏବଂ ଆଗାମୀ ବର୍ଷଗୁଡ଼ିକରେ ଭାରତ-ରୁଷ ବାଣିଜ୍ୟ ୧୦୦ ବିଲିୟନ ଆମେରିକୀୟ ଡଲାରର ମାଇଲଖୁଣ୍ଟ ଛୁଇଁବ ବୋଲି ସେ ଆଶା ପ୍ରକାଶ କରିଛନ୍ତି।
ରୁଷ ରାଷ୍ଟ୍ରପତିଙ୍କ ମତରେ, ମସ୍କୋ ସହ ସମ୍ପର୍କ ରଖିବାକୁ ନେଇ ଆମେରିକା ବିଭିନ୍ନ ସମୟରେ ଭାରତ ଉପରେ ଚାପ ପକାଇବାକୁ ଚେଷ୍ଟା କରିଛି। କିନ୍ତୁ ଏଭଳି ଚାପ ଭାରତର ନୀତି ନିର୍ଦ୍ଧାରଣକୁ ପ୍ରଭାବିତ କରିପାରିବ ନାହିଁ ବୋଲି ସେ ଦୃଢ଼ ମତ ରଖିଛନ୍ତି।
ରୁଷ ସହ ସହଯୋଗ ସମେତ ଅନେକ ପ୍ରସଙ୍ଗରେ ଭାରତ ଉପରେ ଚାପ ସୃଷ୍ଟି କରାଯାଉଛି। କିନ୍ତୁ ଭାରତ ନିଜ ସ୍ୱାର୍ଥ ଅନୁଯାୟୀ ନିଷ୍ପତ୍ତି ନେବ ଏବଂ ଏଭଳି ଚାପକୁ ପ୍ରତିରୋଧ କରିବ ବୋଲି ପୁଟିନ କହିଛନ୍ତି।
ପୁଟିନଙ୍କ ଏହି ମନ୍ତବ୍ୟ ଏପରି ଏକ ସମୟରେ ଆସିଛି, ଯେତେବେଳେ ଆମେରିକା ରୁଷ ତେଲ କ୍ରୟ କରୁଥିବା ଦେଶମାନଙ୍କୁ ଦିଆଯାଇଥିବା ପ୍ରତିବନ୍ଧକ ଛାଡ଼କୁ ଶେଷ କରିବା ସମ୍ଭାବନା ନେଇ ସଙ୍କେତ ଦେଇଛି।
ଆମେରିକାର ବୈଦେଶିକ ସଚିବ ମାର୍କୋ ରୁବିଓ କହିଛନ୍ତି ଯେ ରୁଷ ତେଲ ଉପରେ ଦିଆଯାଇଥିବା ଛାଡ଼ ସମ୍ପର୍କରେ ଚୂଡ଼ାନ୍ତ ନିଷ୍ପତ୍ତି ଟ୍ରେଜେରୀ ବିଭାଗ ନେବ। ମାର୍ଚ୍ଚରେ ଦିଆଯାଇଥିବା ଏହି ଛାଡ଼କୁ ଦୁଇଥର ବଢ଼ାଯାଇଥିଲା ଏବଂ ଶେଷଥର ପାଇଁ ମେ ୧୭ରେ ଏକ ମାସର ସମୟ ବୃଦ୍ଧି କରାଯାଇଥିଲା।
ରୁଷ-ୟୁକ୍ରେନ ଯୁଦ୍ଧ ପରଠାରୁ ଭାରତ ରୁଷରୁ ରିହାତି ଦରରେ ଅଶୋଧିତ ତେଲ କ୍ରୟ କରୁଛି। ଏହା ଦୁଇ ଦେଶ ମଧ୍ୟରେ ଆର୍ଥିକ ସହଯୋଗକୁ ନୂଆ ଉଚ୍ଚତାରେ ପହଞ୍ଚାଇଛି। ପୁଟିନଙ୍କ ସଦ୍ୟ ବୟାନରୁ ସ୍ପଷ୍ଟ ସଙ୍କେତ ମିଳୁଛି ଯେ ବିଶ୍ୱ ରାଜନୀତିର ବଦଳୁଥିବା ସମୀକରଣ ମଧ୍ୟରେ ମଧ୍ୟ ଭାରତ-ରୁଷ ସମ୍ପର୍କକୁ ଉଭୟ ଦେଶ ରଣନୈତିକ ଭାବେ ଗୁରୁତ୍ୱ ଦେଉଛନ୍ତି।