କୋଟା: NEET ପେପର ଲିକ୍ ଏବଂ ବିଭିନ୍ନ ପ୍ରବେଶିକା ପରୀକ୍ଷାରେ ଅନିୟମିତତା ପ୍ରସଙ୍ଗକୁ ନେଇ କଂଗ୍ରେସ ସାଂସଦ ରାହୁଲ ଗାନ୍ଧୀ ବୁଧବାର ରାଜସ୍ଥାନର ଶିକ୍ଷା ନଗରୀ କୋଟାରୁ ଦେଶବ୍ୟାପୀ ଆନ୍ଦୋଳନର ଶୁଭାରମ୍ଭ କରିଛନ୍ତି। ଛାତ୍ରଛାତ୍ରୀଙ୍କ ଭବିଷ୍ୟତ ସହ ଖେଳ ଚାଲିଥିବା ଅଭିଯୋଗ କରି ସେ କେନ୍ଦ୍ର ସରକାରଙ୍କୁ ସିଧାସଳଖ ନିଶାନା କରିଛନ୍ତି।
ରାହୁଲ ଗାନ୍ଧୀ କହିଛନ୍ତି ଯେ ଦେଶର ଶିକ୍ଷା ବ୍ୟବସ୍ଥା ଗୁରୁତର ସଙ୍କଟରେ ପହଞ୍ଚିଛି। ପେପର ଲିକ୍, ପରୀକ୍ଷା ବାତିଲ ଏବଂ ନିଯୁକ୍ତି ପ୍ରକ୍ରିୟାରେ ଅନିୟମିତତା ଯୁବପିଢ଼ିର ସ୍ୱପ୍ନକୁ ଭାଙ୍ଗି ଦେଉଛି। ଏହା କେବଳ ରାଜନୈତିକ ଲଢ଼େଇ ନୁହେଁ, ବରଂ ଛାତ୍ରଙ୍କ ଭବିଷ୍ୟତ ରକ୍ଷା ପାଇଁ ସଂଗ୍ରାମ ବୋଲି ସେ କହିଛନ୍ତି।
ସୋସିଆଲ ମିଡିଆରେ ଏକ ଭାବପ୍ରବଣ ବାର୍ତ୍ତା ଦେଇ ରାହୁଲ ଗାନ୍ଧୀ ସିକରର ଉମେଶ ଏବଂ ଡେରାଡୁନର ରିଆଙ୍କ ଉଦାହରଣ ଦେଇଥିଲେ। NEET ପରୀକ୍ଷା ପୁନଃ ଦେବାର ଚାପରେ ଏହି ଦୁଇ ଯୁବକ-ଯୁବତୀ ଆତ୍ମହତ୍ୟା କରିଥିବା ଦାବି କରି ସେ କହିଛନ୍ତି ଯେ ଏଭଳି ଘଟଣା ଏକ ଭଙ୍ଗା ଓ ଦୁର୍ନୀତିଗ୍ରସ୍ତ ବ୍ୟବସ୍ଥାର ପରିଣାମ।
ସେ ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଉପରେ ମଧ୍ୟ ଆକ୍ରମଣ କରି କହିଛନ୍ତି ଯେ ପରୀକ୍ଷା ପରିଚାଳନାରେ ଘଟିଥିବା ବିଫଳତା ପାଇଁ ସରକାର ଜବାବଦେହ ହେବା ଦରକାର। ଛାତ୍ରଙ୍କ ସ୍ୱାର୍ଥ ସୁରକ୍ଷା କରିବା ପରିବର୍ତ୍ତେ ଦୋଷୀଙ୍କୁ ସୁରକ୍ଷା ଦିଆଯାଉଥିବା ଅଭିଯୋଗ ମଧ୍ୟ ସେ କରିଛନ୍ତି।
କୋଟାରେ ଆୟୋଜିତ ରାଲି ପାଇଁ ଛାତ୍ରଛାତ୍ରୀଙ୍କୁ ଆହ୍ୱାନ ଜଣାଇ ରାହୁଲ କହିଛନ୍ତି, “ଆଜି ଦେଶରେ ପରିଶ୍ରମକୁ ପୁରସ୍କାର ମିଳୁନାହିଁ, ବରଂ ସ୍ୱପ୍ନକୁ ଦଣ୍ଡ ଦିଆଯାଉଛି। ପ୍ରତ୍ୟେକ ପେପର ଲିକ୍ ଏବଂ ପ୍ରତ୍ୟେକ ବାତିଲ ପରୀକ୍ଷା ବ୍ୟବସ୍ଥାର ବିଫଳତାର ପ୍ରମାଣ।”
କଂଗ୍ରେସ ପକ୍ଷରୁ କୁହାଯାଇଛି ଯେ ଏହି ଆନ୍ଦୋଳନ ପର୍ଯ୍ୟାୟକ୍ରମେ ସାରା ଦେଶରେ ଚାଲିବ ଏବଂ ଶିକ୍ଷା ବ୍ୟବସ୍ଥାର ସ୍ୱଚ୍ଛତା, ପରୀକ୍ଷା ସୁରକ୍ଷା ଏବଂ ଯୁବକଙ୍କ ଭବିଷ୍ୟତ ସୁରକ୍ଷା ପ୍ରସଙ୍ଗକୁ ନେଇ ସରକାରଙ୍କ ଉପରେ ଚାପ ବଢ଼ାଯିବ।
ଶିକ୍ଷା କ୍ଷେତ୍ରରେ ବଢ଼ୁଥିବା ଅନିୟମିତତା ଓ ପେପର ଲିକ୍ ଘଟଣାକୁ କେନ୍ଦ୍ର କରି କୋଟାରୁ ରାହୁଲ ଗାନ୍ଧୀଙ୍କ ଏହି ଆନ୍ଦୋଳନ ଜାତୀୟ ରାଜନୀତିରେ ନୂଆ ଚର୍ଚ୍ଚା ସୃଷ୍ଟି କରିଛି। ଆଗାମୀ ଦିନରେ ଏହା କେତେ ଦୂର ପ୍ରଭାବ ପକାଇବ, ତାହା ଉପରେ ସମସ୍ତଙ୍କ ନଜର ରହିଛି।