ନୂଆଦିଲ୍ଲୀ: କରାଚୀରେ ହୋଇଥିବା ଆତଙ୍କବାଦୀ ଆକ୍ରମଣରେ ଜଣେ “ଭାରତୀୟ ଏଜେଣ୍ଟ” ସମ୍ପୃକ୍ତ ଥିବା ପାକିସ୍ତାନର ଅଭିଯୋଗକୁ ଭାରତ ଦୃଢ଼ ଭାବେ ପ୍ରତ୍ୟାଖ୍ୟାନ କରିଛି। ବୈଦେଶିକ ବ୍ୟାପାର ମନ୍ତ୍ରଣାଳୟ କହିଛି, ଏହି ଅଭିଯୋଗ ସମ୍ପୂର୍ଣ୍ଣ ଭିତ୍ତିହୀନ ଏବଂ ପାକିସ୍ତାନ ଅନ୍ୟ ଉପରେ ଦୋଷ ଲଦିବା ପରିବର୍ତ୍ତେ ନିଜ ଦେଶରେ ସକ୍ରିୟ ଆତଙ୍କବାଦୀ ନେଟୱର୍କ ବିରୋଧରେ ପଦକ୍ଷେପ ନେବା ଉଚିତ।
ବୈଦେଶିକ ମନ୍ତ୍ରଣାଳୟର ମୁଖପାତ୍ର ରଣଧୀର ଜୟସୱାଲ କହିଛନ୍ତି, କରାଚୀ ଘଟଣାକୁ ନେଇ ଭାରତ ବିରୋଧରେ କରାଯାଇଥିବା ସମସ୍ତ ଅଭିଯୋଗକୁ ଭାରତ ସମ୍ପୂର୍ଣ୍ଣ ଭାବେ ଖାରଜ କରୁଛି। ସେ କହିଛନ୍ତି, ପାକିସ୍ତାନ ଆତ୍ମସମୀକ୍ଷା କରି ନିଜ ମାଟିରେ ଥିବା ଆତଙ୍କବାଦୀ ଭିତ୍ତିଭୂମି ବିରୋଧରେ ବିଶ୍ୱସନୀୟ କାର୍ଯ୍ୟାନୁଷ୍ଠାନ ନେବା ଆବଶ୍ୟକ। ‘ଅନ୍ୟକୁ ଦୋଷ ନୁହେଁ, ବରଂ ନିଜ ଘର ସମ୍ଭାଳନ୍ତୁ’ ବୋଲି କହିଛି ଭାରତ।
ସୂଚନାଯୋଗ୍ୟ, କରାଚୀରେ ପାକିସ୍ତାନ ରେଞ୍ଜର୍ସଙ୍କ ଗୁଲିସ୍ତାନ-ଏ-ଜୋହର ଶିବିର ଉପରେ ହୋଇଥିବା ଆତଙ୍କବାଦୀ ଆକ୍ରମଣରେ ତିନି ଜଣ ସୁରକ୍ଷା କର୍ମୀ ପ୍ରାଣ ହରାଇଥିବା ବେଳେ ତିନି ଜଣ ଆକ୍ରମଣକାରୀ ନିହତ ହୋଇଥିଲେ। ପାକିସ୍ତାନର ଗୃହମନ୍ତ୍ରୀ ମୋହସିନ ନକଭି ଏହି ଘଟଣାରେ ଜଣେ “ଭାରତୀୟ ଏଜେଣ୍ଟ” ସମ୍ପୃକ୍ତ ଥିବା ଦାବି କରିଥିଲେ, ତେବେ ଏହି ଅଭିଯୋଗ ସପକ୍ଷରେ ସେ କୌଣସି ପ୍ରମାଣ ସାର୍ବଜନୀନ ଭାବେ ଉପସ୍ଥାପନ କରିନାହାନ୍ତି।
ପାକିସ୍ତାନ ସେନାର ଗଣମାଧ୍ୟମ ଶାଖା ISPR ଦାବି କରିଛି ଯେ ଏହି ଆକ୍ରମଣ ଜମାତ-ଉଲ୍-ଆହରର ସହ ଜଡିତ ଆତଙ୍କବାଦୀମାନେ କରିଥିଲେ। ସେମାନଙ୍କ କହିବା ଅନୁସାରେ, ଆକ୍ରମଣକାରୀମାନେ ପ୍ରଥମେ ମୁଖ୍ୟ ଫାଟକରେ ବିସ୍ଫୋରଣ ଘଟାଇ କ୍ୟାମ୍ପ ଭିତରକୁ ପ୍ରବେଶ କରିବାକୁ ଉଦ୍ୟମ କରିଥିଲେ, କିନ୍ତୁ ସୁରକ୍ଷା ବାହିନୀ ସେମାନଙ୍କ ଯୋଜନାକୁ ବିଫଳ କରିଥିବା ଦାବି କରିଛି।