ଗଞ୍ଜାମ: ଗଞ୍ଜାମ ଜିଲ୍ଲାର ସାନଖେମୁଣ୍ଡି ବ୍ଲକ୍ ଅଞ୍ଚଳରେ ବୁଲା କୁକୁରଙ୍କ ଦୌରାତ୍ମ୍ୟ ଦିନକୁ ଦିନ ବଢ଼ୁଥିବା ବେଳେ ଏହା ସ୍ଥାନୀୟ ଲୋକଙ୍କ ପାଇଁ ଗଭୀର ଚିନ୍ତାର କାରଣ ପାଲଟିଛି। ପାଟପୁର ଥାନା ଅଧୀନ ମହାନଳା ସରସ୍ୱତୀ ଶିଶୁ ବିଦ୍ୟାମନ୍ଦିରରେ ପଢ଼ୁଥିବା ପ୍ରଥମ ଶ୍ରେଣୀର ୫ ବର୍ଷର ଜଣେ ଶିଶୁକନ୍ୟା ବୁଲା କୁକୁରଙ୍କ ଆକ୍ରମଣରେ ଗୁରୁତର ଆହତ ହୋଇଛନ୍ତି। ଚିକିତ୍ସା ପରେ ଶିଶୁଟିଙ୍କ ସ୍ୱାସ୍ଥ୍ୟାବସ୍ଥା ବର୍ତ୍ତମାନ ସ୍ଥିର ରହିଥିବା ସୂଚନା ମିଳିଛି।
ସୂଚନା ଅନୁଯାୟୀ, ପାଟପୁର ଗ୍ରାମର ରଞ୍ଜନ ସାହୁଙ୍କ ୫ ବର୍ଷର ଝିଅ ମଧ୍ୟାହ୍ନ ସମୟରେ ବିଦ୍ୟାଳୟର ପଛପଟକୁ ପରିସ୍ରା କରିବାକୁ ଯାଇଥିବା ବେଳେ ହଠାତ୍ ଏକ ବୁଲା କୁକୁର ପଲ ତାଙ୍କ ଉପରେ ଆକ୍ରମଣ କରିଥିଲେ। କୁକୁରମାନେ ଦଳବଦ୍ଧ ଭାବେ କାମୁଡ଼ି ଶିଶୁଟିଙ୍କୁ ଗୁରୁତର ଭାବେ ଆହତ କରିଥିଲେ।
କୁକୁରଙ୍କ ଭୁକା ଏବଂ ଶିଶୁର ଚିତ୍କାର ଶୁଣି ବିଦ୍ୟାଳୟର ଶିକ୍ଷକ, ଶିକ୍ଷୟିତ୍ରୀ ଓ ସ୍ଥାନୀୟ ଲୋକ ଘଟଣାସ୍ଥଳକୁ ଦୌଡ଼ି ଆସି କୁକୁର ପଲ କବଳରୁ ଶିଶୁକନ୍ୟାଙ୍କୁ ଉଦ୍ଧାର କରିଥିଲେ। ପରେ ତାଙ୍କୁ ତୁରନ୍ତ ଆଡ଼ପଡ଼ା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନିଆଯାଇଥିଲା, ଯେଉଁଠାରେ ପ୍ରାଥମିକ ଚିକିତ୍ସା ପରେ ଶିଶୁଟିଙ୍କ ଅବସ୍ଥା ସ୍ଥିର ଥିବା ଜଣାପଡ଼ିଛି।
ଉଲ୍ଲେଖଯୋଗ୍ୟ ଯେ, ଏହା ପ୍ରଥମ ଘଟଣା ନୁହେଁ। ଗତ ମେ ୨୩ ତାରିଖରେ ମହାନଳା ଗ୍ରାମର ୯ ବର୍ଷର ଶିଶୁ ଆରିସ ଗୌଡ଼ ଘର ବାହାରେ ଖେଳୁଥିବା ସମୟରେ ବୁଲା କୁକୁରଙ୍କ ଆକ୍ରମଣରେ ଗୁରୁତର ଆହତ ହୋଇଥିଲେ। ଆକ୍ରମଣରେ ତାଙ୍କ ଖପୁରିରେ ଗଭୀର କ୍ଷତ ସୃଷ୍ଟି ହୋଇଥିଲା। ସେ ଭୁବନେଶ୍ୱରସ୍ଥିତ ଏକ ଘରୋଇ ହସ୍ପିଟାଲରେ ଦୀର୍ଘଦିନ ଚିକିତ୍ସା ପରେ ସୁସ୍ଥ ହୋଇ ଘରକୁ ଫେରିଥିଲେ।
ସେହିପରି ଗତ ଜୁନ ୧୬ ତାରିଖରେ ସାନଖେମୁଣ୍ଡି ବ୍ଲକ୍ର ନିସ୍ତିପୁର ଗ୍ରାମରେ ଏକ ପାଗଳ ମାଙ୍କଡ଼ର ଆକ୍ରମଣରେ ୧୨ ଜଣ ଆହତ ହୋଇଥିଲେ। ଲଗାତାର ବନ୍ୟ ଓ ବୁଲା ପଶୁଙ୍କ ଆକ୍ରମଣ ଘଟଣା ଅଞ୍ଚଳବାସୀଙ୍କ ମଧ୍ୟରେ ଭୟର ପରିବେଶ ସୃଷ୍ଟି କରିଛି।
ବାରମ୍ବାର ଏପରି ଘଟଣା ଘଟୁଥିବାରୁ ବୁଲା କୁକୁରଙ୍କ ନିୟନ୍ତ୍ରଣ, ସୁରକ୍ଷା ବ୍ୟବସ୍ଥାକୁ ସୁଦୃଢ଼ କରିବା ଏବଂ ଲୋକଙ୍କ ସୁରକ୍ଷା ପାଇଁ ତୁରନ୍ତ ପଦକ୍ଷେପ ନେବାକୁ ସ୍ଥାନୀୟ ବାସିନ୍ଦାମାନେ ପ୍ରଶାସନ ନିକଟରେ ଦାବି କରିଛନ୍ତି।