ଯାଜପୁର : ଯାଜପୁର ଜିଲ୍ଲା ଦଶରଥପୁର ଅଞ୍ଚଳରେ କାଣୀ ନଦୀର ଘାଇ ପାଣିରେ ଭାସିଯାଇଥିବା ଜଣେ ବ୍ୟକ୍ତିଙ୍କ ମୃତଦେହ ୨୪ ଘଣ୍ଟା ପରେ ଉଦ୍ଧାର କରାଯାଇଛି। ଦଶରଥପୁର ବ୍ଲକ୍ ଧୋବାବିଲ ଗାଁ ନିକଟରେ ଏହି ଅଘଟଣ ଘଟିଥିଲା।
ସୂଚନା ଅନୁସାରେ, ଗତକାଲି ବ୍ୟକ୍ତିଜଣକ ଶୌଚ ହେବା ପାଇଁ ଘାଇ ନିକଟକୁ ଯାଇଥିଲେ। ଏହି ସମୟରେ ହଠାତ୍ ମାଟି ଅତଡ଼ା ଧସିଯିବାରୁ ସେ କାଣୀ ନଦୀର ଘାଇ ପାଣିରେ ଭାସିଯାଇଥିଲେ। ଘଟଣା ପରେ ତାଙ୍କୁ ଖୋଜିବା ପାଇଁ ଅଗ୍ନିଶମ ବାହିନୀ ପକ୍ଷରୁ ଉଦ୍ଧାର ଅଭିଯାନ ଆରମ୍ଭ ହୋଇଥିଲା।
ତେବେ ଦୀର୍ଘ ସମୟ ଧରି ଖୋଜାଖୋଜି ପରେ ମଧ୍ୟ ତାଙ୍କର ସନ୍ଧାନ ମିଳିନଥିଲା। ଶେଷରେ ପ୍ରାୟ ୨୪ ଘଣ୍ଟା ପରେ ଅଗ୍ନିଶମ ବାହିନୀର ଟିମ୍ ଘାଇ ପାଣିରୁ ତାଙ୍କ ମୃତଦେହ ଉଦ୍ଧାର କରିଛି। ଏହି ଘଟଣାକୁ ନେଇ ଧୋବାବିଲ ଗାଁରେ ଶୋକର ଛାୟା ଖେଳିଯାଇଛି।