ଭୁବନେଶ୍ୱର: ଓଡ଼ିଶା ଶାସନ ପ୍ରଶାସନର ମୁଖ୍ୟ କେନ୍ଦ୍ର ତଥା ରାଜ୍ୟପାଳଙ୍କ କାର୍ଯ୍ୟାଳୟ ‘ଲୋକଭବନ’ ପରିସର ଏକ ବିରଳ ସଫଳତା ହାସଲ କରିଛି। ଭାରତୀୟ ଗ୍ରୀନ୍ ବିଲ୍ଡିଂ କାଉନସିଲ ପକ୍ଷରୁ ଓଡ଼ିଶା ଲୋକଭବନକୁ ଅତ୍ୟନ୍ତ ସମ୍ମାନଜନକ ପ୍ଲାଟିନମ୍ ଗ୍ରୀନ୍ କ୍ୟାମ୍ପସ୍ ସାର୍ଟିଫିକେସନ୍ ପ୍ରଦାନ କରାଯାଇଛି। ସମଗ୍ର ଭାରତବର୍ଷରେ ପ୍ରଥମ ଲୋକଭବନ ଭାବେ ଏହି ପ୍ଲାଟିନମ୍ ମାନ୍ୟତା ହାସଲ କରି ଓଡ଼ିଶା ନୂଆ ଇତିହାସ ରଚିଥିବା ବେଳେ ଏହା ସମଗ୍ର ରାଜ୍ୟ ପାଇଁ ଗୋଟିଏ ବଡ଼ ଗର୍ବ ଓ ଗୌରବର ବିଷୟ ହୋଇପାରିଛି।
ପରିବେଶ ଅନୁକୂଳ ଗ୍ରୀନ୍ କ୍ୟାମ୍ପସ୍ ମୂଲ୍ୟାଙ୍କନ ବ୍ୟବସ୍ଥା ଅଧୀନରେ ଲୋକଭବନ କ୍ୟାମ୍ପସକୁ ୧୦୦ ମାର୍କରୁ ବିଶାଳ ୮୮ ମାର୍କ ମିଳିଛି, ଯାହା ଦ୍ୱାରା ଏହା କାଉନ୍ସିଲ୍ର ସର୍ବୋଚ୍ଚ ପ୍ଲାଟିନମ୍ ବର୍ଗରେ ସମ୍ମାନିତ ହୋଇପାରିଛି। ନବୀକରଣୀୟ ଶକ୍ତିର ବ୍ୟାପକ ପ୍ରୟୋଗ, ଉନ୍ନତ ଜଳ ସଂରକ୍ଷଣ ପ୍ରଣାଳୀ, ଜୈବ ବିବିଧତାର ସୁରକ୍ଷା, ବଜ୍ୟବସ୍ତୁ ଓ ଅପଚୟର ସଠିକ୍ ପରିଚାଳନା ଏବଂ ସ୍ୱଚ୍ଛ ଗତିଶୀଳତା କ୍ଷେତ୍ରରେ ଲୋକଭବନ ପକ୍ଷରୁ ନିରନ୍ତର ଗ୍ରହଣ କରାଯାଇଥିବା ଗୁରୁତ୍ୱପୂର୍ଣ୍ଣ ପଦକ୍ଷେପଗୁଡ଼ିକ ଯୋଗୁଁ ଏହି ସାର୍ଟିଫିକେସନ୍ ମିଳିଛି।
ଏହି ଗୁରୁତ୍ୱପୂର୍ଣ୍ଣ ଆନ୍ତର୍ଜାତୀୟ ସ୍ତରର ମାନ୍ୟତା ସ୍ଥାୟୀ ଶାସନ ଭିତ୍ତିଭୂମି ଏବଂ ଜଳବାୟୁ ପରିବର୍ତ୍ତନ ସହ ଖାପଖୁଆଉଥିବା ସାର୍ବଜନୀନ ପ୍ରତିଷ୍ଠାନ ଗଠନ କ୍ଷେତ୍ରରେ ଓଡ଼ିଶାର ଦୃଢ଼ ପ୍ରତିବଦ୍ଧତାକୁ ପ୍ରତିଫଳିତ କରୁଛି। କ୍ୟାମ୍ପସର ମୂଳ ଯୋଜନା, ସବୁଜ ଭିତ୍ତିଭୂମି ନିର୍ମାଣ ଏବଂ ଦୈନନ୍ଦିନ ଆଡମିନିଷ୍ଟ୍ରେଟିଭ୍ କାର୍ଯ୍ୟରେ ପରିବେଶ ସୁରକ୍ଷାକୁ ସଫଳତାର ସହ ସମନ୍ୱିତ କରାଯାଇଥିବାରୁ ଲୋକଭବନ ଆଜି ସାରା ଦେଶ ପାଇଁ ସ୍ୱଚ୍ଛ ଓ ସବୁଜ ପ୍ରଶାସନିକ ପରିସରର ଏକ ନୂତନ ମାପଦଣ୍ଡ ସୃଷ୍ଟି କରିଛି।