ଡେରାଡୁନ୍: ୨୦୨୭ ଉତ୍ତରାଖଣ୍ଡ ବିଧାନସଭା ନିର୍ବାଚନକୁ ଏବେଠାରୁ ଟାର୍ଗେଟ୍ କରି କଂଗ୍ରେସ ରାଜନୈତିକ ମୋର୍ଚ୍ଚା ଖୋଲିବା ଆରମ୍ଭ କରିଛି। ହଲଦ୍ୱାନୀର ଶୁଦ୍ଧିକରଣ ବିବାଦ, ମଲ୍ଲିକାର୍ଜୁନ ଖାର୍ଗେଙ୍କ ରାଲି ପରବର୍ତ୍ତୀ ଘଟଣା ଏବଂ ରାହୁଲ ଗାନ୍ଧୀଙ୍କ ବିରୋଧରେ ଏଫ୍ଆଇଆର୍—ଏହି ତିନିଟି ପ୍ରସଙ୍ଗକୁ ଯୋଡ଼ି ଦଳ ରାଜ୍ୟରେ ବିଜେପି ସରକାର ବିରୋଧରେ ଏକ ବଡ଼ ରାଜନୈତିକ ନ୍ୟାରେଟିଭ୍ ତିଆରି କରିବାକୁ ଚାହୁଁଛି।
ପ୍ରବଳ ବର୍ଷା ମଧ୍ୟରେ ଡେରାଡୁନ୍ରେ ହଜାର ହଜାର କର୍ମୀଙ୍କୁ ନେଇ ମୁଖ୍ୟମନ୍ତ୍ରୀଙ୍କ ବାସଭବନ ଘେରାଉ ଏହି ରଣନୀତିର ଏକ ଅଂଶ ବୋଲି ଦେଖାଯାଉଛି। କଂଗ୍ରେସ ଏହାକୁ କେବଳ ବିକ୍ଷୋଭ ଭାବେ ରଖିନାହିଁ; ବରଂ ନିର୍ବାଚନ ପୂର୍ବରୁ ନିଜ ସଂଗଠନର ଶକ୍ତି ଓ ରାସ୍ତାରେ ଲଢ଼ିବାର କ୍ଷମତା ଦେଖାଇବାର ଏକ ପ୍ରୟାସ କରିଛି।
୨୦୨୭ ପାଇଁ ଏବେଠାରୁ ‘ଗ୍ରାଉଣ୍ଡ ଗେମ୍’
ଉତ୍ତରାଖଣ୍ଡର ରାଜନୀତିରେ ପ୍ରତି ପାଞ୍ଚ ବର୍ଷରେ ସରକାର ବଦଳିବାର ପରମ୍ପରା ରହିଛି। ଏହି ପରିବର୍ତ୍ତନର ରାଜନୈତିକ ସମ୍ଭାବନାକୁ କଂଗ୍ରେସ ନିଜ ସପକ୍ଷରେ ନେବାକୁ ଚାହୁଁଛି। ତେଣୁ ନିର୍ବାଚନ ଘୋଷଣା ହେବା ପର୍ଯ୍ୟନ୍ତ ଅପେକ୍ଷା ନକରି ଏବେଠାରୁ ସରକାର ବିରୋଧୀ ମୁଦ୍ଦାକୁ ନେଇ ରାସ୍ତାକୁ ଓହ୍ଲାଇବା ଦଳର ରଣନୀତିର ସଙ୍କେତ ଦେଉଛି।
ହଲଦ୍ୱାନୀ ଭଳି ଗୁରୁତ୍ୱପୂର୍ଣ୍ଣ ସହରର ଏକ ଘଟଣାକୁ ରାଜ୍ୟସ୍ତରୀୟ ପ୍ରସଙ୍ଗରେ ପରିଣତ କରିବା ମଧ୍ୟ କଂଗ୍ରେସର ରାଜନୈତିକ ଯୋଜନାର ଅଂଶ। ଦଳ ଚାହୁଁଛି, ସ୍ଥାନୀୟ ଘଟଣାକୁ ନେଇ ସୃଷ୍ଟି ହୋଇଥିବା ଅସନ୍ତୋଷକୁ ସଂଗଠନୀୟ ଆନ୍ଦୋଳନରେ ପରିଣତ କରିବାକୁ।
ଖାର୍ଗେଙ୍କ ରାଲିରୁ ନୂଆ ରାଜନୈତିକ ନ୍ୟାରେଟିଭ୍
ଅଗଷ୍ଟରେ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେ ହଲଦ୍ୱାନୀରେ ରାଲି କରିଥିଲେ। ଏହା ପରେ ରାମଲୀଳା ମଇଦାନରେ ଶୁଦ୍ଧିକରଣ କାର୍ଯ୍ୟକ୍ରମକୁ ନେଇ ବିବାଦ ଦେଖାଦେଇଥିଲା। କଂଗ୍ରେସ ଏହାକୁ ନିଜ ଦଳୀୟ ନେତୃତ୍ୱର ଅପମାନ ସହ ଯୋଡ଼ି ପ୍ରତିବାଦର ରୂପ ଦେଇଛି।
ଏଠାରେ କଂଗ୍ରେସର ରାଜନୈତିକ ରଣନୀତି ସ୍ପଷ୍ଟ—ଏକ ସ୍ଥାନୀୟ ଘଟଣାକୁ ଦଳର ସମ୍ମାନ, ସାମାଜିକ ନ୍ୟାୟ ଓ ସରକାରର ଭୂମିକା ଭଳି ବଡ଼ ପ୍ରସଙ୍ଗ ସହ ଯୋଡ଼ିବା।
ରାହୁଲଙ୍କ FIR: କଂଗ୍ରେସର ହାତରେ ନୂଆ ରାଜନୈତିକ ଅସ୍ତ୍ର?
ଶୁଦ୍ଧିକରଣ ବିବାଦ ପରେ ରାହୁଲ ଗାନ୍ଧୀଙ୍କ ବିରୋଧରେ ଏଫ୍ଆଇଆର୍କୁ କଂଗ୍ରେସ ଏବେ କେବଳ ଆଇନଗତ ପ୍ରସଙ୍ଗ ଭାବେ ଦେଖୁନାହିଁ; ଏହାକୁ ବିଜେପି ସରକାର ବିରୋଧରେ ବଡ଼ ରାଜନୈତିକ ନ୍ୟାରେଟିଭ୍ ତିଆରି କରିବାର ମାଧ୍ୟମ କରୁଛି। ଏହି ମୁଦ୍ଦାକୁ ନେଇ ରାସ୍ତାରେ ଆନ୍ଦୋଳନ, ନେତାଙ୍କ ଆକ୍ରମଣାତ୍ମକ ବୟାନ ଏବଂ ସଂଗଠନକୁ ତଳସ୍ତରରେ ସକ୍ରିୟ କରିବା—ସବୁକିଛି ୨୦୨୭ର ନିର୍ବାଚନୀ ପ୍ରସ୍ତୁତିର ଅଂଶ ବୋଲି ଦେଖାଯାଉଛି।
କଂଗ୍ରେସର ଚେଷ୍ଟା ହେଉଛି, ଏହି ଘଟଣାକୁ ‘କଂଗ୍ରେସ ବନାମ ବିଜେପି’ର ବଡ଼ ଲଢ଼େଇରେ ପରିଣତ କରିବା। ଅର୍ଥାତ୍, ରାହୁଲଙ୍କ FIR ଏବେ କେବଳ ଏକ FIR ନୁହେଁ—୨୦୨୭ ପାଇଁ ଏହା କଂଗ୍ରେସର ରାଜନୈତିକ ନ୍ୟାରେଟିଭ୍ର ଏକ ଅଂଶ।
ଦିଲ୍ଲୀରୁ ଡେରାଡୁନ୍: ମୁଦ୍ଦାକୁ ବଡ଼ କରିବାର ମାଷ୍ଟରପ୍ଲାନ୍?
ଶୁଦ୍ଧିକରଣ ବିବାଦକୁ ହଲଦ୍ୱାନୀରେ ସୀମିତ ନରଖି କଂଗ୍ରେସ ଏହାକୁ ରାଜ୍ୟ ଓ ଜାତୀୟ ରାଜନୀତି ସହ ଯୋଡ଼ିବାକୁ ଚାହୁଁଛି। ରାଜ୍ୟସଭାରେ ପ୍ରସଙ୍ଗ ଉଠିବାଠାରୁ ଆରମ୍ଭ କରି ଡେରାଡୁନ୍ରେ ହଜାର ହଜାର କର୍ମୀଙ୍କ ଶକ୍ତି ପ୍ରଦର୍ଶନ—ଦଳର ରଣନୀତିରେ ଏକ ସ୍ପଷ୍ଟ ‘ଲୋକାଲ୍ ଟୁ ନ୍ୟାସନାଲ୍’ ଆଙ୍ଗଲ୍ ଦେଖିବାକୁ ମିଳୁଛି।
କଂଗ୍ରେସ ଚାହୁଁଛି, ଏହି ବିବାଦ ମାଧ୍ୟମରେ ନିଜ ସମର୍ଥକଙ୍କୁ ପୁଣି ସକ୍ରିୟ କରିବା ସହ ବିଜେପି ବିରୋଧୀ ଭୋଟରଙ୍କୁ ଗୋଟିଏ ମଞ୍ଚକୁ ଆଣିବା। ଏହା ସହିତ ରାହୁଲ ଗାନ୍ଧୀଙ୍କୁ ରାଜ୍ୟର ରାଜନୈତିକ ଲଢ଼େଇର ମୁହଁ କରି ଦଳ ନିଜ ଜାତୀୟ ନେତୃତ୍ୱର ଛବିକୁ ମଧ୍ୟ ରାଜ୍ୟ ରାଜନୀତିରେ ଅଧିକ ଆକ୍ରମଣାତ୍ମକ ଭାବେ ଉପସ୍ଥାପନ କରୁଛି।
କଂଗ୍ରେସର ଅସଲ ଟାର୍ଗେଟ୍ କ’ଣ?
୨୦୨୭ ନିର୍ବାଚନ ପୂର୍ବରୁ କଂଗ୍ରେସର ଲକ୍ଷ୍ୟ କେବଳ ବିଜେପି ସରକାରକୁ ଘେରିବା ନୁହେଁ। ଦଳ ନିଜ କ୍ୟାଡରକୁ ସକ୍ରିୟ କରିବା, ରାସ୍ତାରେ ଉପସ୍ଥିତି ବଢ଼ାଇବା ଏବଂ ସରକାର ବିରୋଧୀ ଭୋଟକୁ ଏକଜୁଟ କରିବାର ଚେଷ୍ଟା କରୁଛି।
ଗଣେଶ ଗୋଡିଆଲଙ୍କ ‘ଦାବି ପୂରଣ ନହେବା ପର୍ଯ୍ୟନ୍ତ ସଂଘର୍ଷ’ ଜାରି ରଖିବାର ଆହ୍ୱାନ ମଧ୍ୟ ଦଳ ଦୀର୍ଘମିଆଦୀ ଆନ୍ଦୋଳନର ମୁଡ୍ରେ ଥିବା ସଙ୍କେତ ଦେଉଛି।
ତେବେ ୨୦୨୭ରେ କଂଗ୍ରେସର ଏହି ରଣନୀତି କ’ଣ ସତ୍ତାର ରାସ୍ତା ଖୋଲିବ, ନା ବିଜେପି ପାଇଁ ଆହୁରି ଏକ ସୁଯୋଗ ହେବ? ହଲଦ୍ୱାନୀର ଶୁଦ୍ଧିକରଣ ବିବାଦ ଓ ରାହୁଲଙ୍କ FIRକୁ ନେଇ ଏବେ ରାଜନୀତି ଗରମ। କିନ୍ତୁ ଭୋଟ ମଇଦାନରେ କେବଳ ଏହି ମୁଦ୍ଦା ନୁହେଁ—ରୋଜଗାର, ବିକାଶ, ମହଙ୍ଗା ମାଡ଼, ପ୍ରବାସ ଓ ପାହାଡ଼ିଆ ଅଞ୍ଚଳର ଅସନ୍ତୋଷ ମଧ୍ୟ ନିର୍ଣ୍ଣାୟକ ହେବ।
କଂଗ୍ରେସ ରାସ୍ତାରେ ଶକ୍ତି ଦେଖାଇଦେଲାଣି, ଏବେ ପାଳି ଭୋଟବାକ୍ସର। ବିଜେପିର ଦୁର୍ଗରେ କଂଗ୍ରେସ ଫାଟ ସୃଷ୍ଟି କରିପାରିବ କି, ନା ‘ଆନ୍ଦୋଳନର ଭିଡ଼’ ଭୋଟରେ ପରିଣତ ହେବ ନାହିଁ? ୨୦୨୭ର ଲଢ଼େଇ ଏବେ କେବଳ ସରକାର ବନାମ ବିରୋଧୀ ଦଳର ନୁହେଁ—ଏହା ହେବ କଂଗ୍ରେସର କମବ୍ୟାକ୍ ଦାବି ବନାମ ବିଜେପିର ସତ୍ତା ରକ୍ଷାର ଅଗ୍ନିପରୀକ୍ଷା।