ଭୁବନେଶ୍ବର : ବାର୍ଦ୍ଧକ୍ୟ ଭତ୍ତା ଟଙ୍କା ଆତ୍ମସାତ କରିବା ଅଭିଯୋଗରେ ବାଲେଶ୍ୱର ଜିଲ୍ଲା ଭୋଗରାଇ ବ୍ଲକ ଅଧୀନ ୩ ଜଣ ପଞ୍ଚାୟତସ୍ତରୀୟ ଅଧିକାରୀଙ୍କୁ ଗିରଫ କରିଛି ଭିଜିଲାନ୍ସ। ହିତାଧିକାରୀଙ୍କ ବଳକା ଭତ୍ତା ଟଙ୍କା ସରକାରୀ ଖାତାକୁ ନଫେରାଇ ସେମାନେ ଜାଲିଆତି ଜରିଆରେ ମୋଟ ୧୬.୭୬ ଲକ୍ଷ ଟଙ୍କା ହଡ଼ପ କରିଥିବା ତଦନ୍ତରୁ ସ୍ପଷ୍ଟ ହୋଇଛି।
ଗିରଫ ଅଭିଯୁକ୍ତମାନେ ହେଲେ କଖରା ଗ୍ରାମ ପଞ୍ଚାୟତର ପୂର୍ବତନ ପିଇଓ ସୁବ୍ରତ କୁମାର ପତି, କୁମ୍ଭାରମୁଳି ଗ୍ରାମ ପଞ୍ଚାୟତର ପୂର୍ବତନ ପିଇଓ ଚିତ୍ତରଞ୍ଜନ ବାଗସିଂ ଏବଂ ଜଳେଶ୍ୱରପୁର ଗ୍ରାମ ପଞ୍ଚାୟତର ଆକାଉଣ୍ଟାଣ୍ଟ-କମ୍-ଡାଟା ଏଣ୍ଟ୍ରି ଅପରେଟର ଗୌତମ ଦଳାଇ।
ଭିଜିଲାନ୍ସ ତଥ୍ୟ ଅନୁଯାୟୀ, ୨୦୨୨ରୁ ୨୦୨୫ ମଧ୍ୟରେ ଏହି ଅଧିକାରୀମାନେ ଭୋଗରାଇ ବିଡିଓଙ୍କ କାର୍ଯ୍ୟାଳୟରୁ ବାର୍ଦ୍ଧକ୍ୟ ଭତ୍ତା ବଣ୍ଟନ ପାଇଁ ନିୟମିତ ଅଗ୍ରିମ ଟଙ୍କା ଉଠାଉଥିଲେ। ମାତ୍ର ଭତ୍ତା ବାଣ୍ଟିବା ପରେ ବଞ୍ଚିଯାଉଥିବା ଅବ୍ୟବହୃତ ଅର୍ଥସବୁକୁ ସରକାରୀ ହିସାବରେ ଜମା ନକରି ନିଜ ଭିତରେ ବାଣ୍ଟି ନେଇଥିଲେ। ଏହିପରି ଭାବେ ସେମାନେ ମୋଟ ୧୬ ଲକ୍ଷ ୭୬ ହଜାର ୫୦୦ ଟଙ୍କା ଆତ୍ମସାତ କରିଥିଲେ। ଗିରଫ ତିନି ଅଭିଯୁକ୍ତଙ୍କୁ ବାଲେଶ୍ୱର ସ୍ୱତନ୍ତ୍ର ଭିଜିଲାନ୍ସ କୋର୍ଟକୁ ଚାଲାଣ କରାଯାଇଛି।