ନୂଆଦିଲ୍ଲୀ: ଦେଶର ସ୍କୁଲ ଓ କଲେଜରେ ଶିକ୍ଷକ ନିଯୁକ୍ତିକୁ ନେଇ ସୁପ୍ରିମ୍କୋର୍ଟଙ୍କ ବଡ଼ ନିର୍ଦ୍ଦେଶ। ଆବଶ୍ୟକ ଶିକ୍ଷାଗତ ଓ ବୃତ୍ତିଗତ ଯୋଗ୍ୟତା ନଥିଲେ କୌଣସି ବ୍ୟକ୍ତିଙ୍କୁ ଶିକ୍ଷକ ପଦରେ ନିଯୁକ୍ତ କରାଯାଇପାରିବନି। କେବଳ ନିଯୁକ୍ତି ନୁହେଁ, ନିର୍ଦ୍ଧାରିତ ଯୋଗ୍ୟତା ନଥିବା ବ୍ୟକ୍ତିଙ୍କ ସେବା ମଧ୍ୟ ଜାରି ରଖାଯାଇପାରିବ ନାହିଁ ବୋଲି ସର୍ବୋଚ୍ଚ ଅଦାଲତ ସ୍ପଷ୍ଟ କରିଛନ୍ତି।
ଆର୍ଟିଇ, ଏନ୍ସିଟିଇ ଏବଂ ୟୁଜିସି ଭଳି ସଂସ୍ଥା ଓ ଆଇନ ଅନୁଯାୟୀ ଧାର୍ଯ୍ୟ ଯୋଗ୍ୟତା ପୂରଣ କରୁନଥିବା ବ୍ୟକ୍ତିଙ୍କୁ ଶିକ୍ଷକ ଭାବେ ନିଯୁକ୍ତି ଦେବା ଉପରେ କୋର୍ଟ ଗୁରୁତ୍ୱ ଦେଇଛନ୍ତି। ଶିକ୍ଷା ବ୍ୟବସ୍ଥାର ମାନ ବଜାୟ ରଖିବା ପାଇଁ ନିଯୁକ୍ତିରେ ନିର୍ଦ୍ଧାରିତ ମାନଦଣ୍ଡକୁ କଡ଼ାକଡ଼ି ଭାବେ ପାଳନ କରିବା ଆବଶ୍ୟକ ବୋଲି ଅଦାଲତଙ୍କ ନିର୍ଦ୍ଦେଶରୁ ସ୍ପଷ୍ଟ ହୋଇଛି।
ଆସାମର କେତେକ ସ୍କୁଲ ଓ କଲେଜରେ ପ୍ରାଦେଶିକୀକରଣ ଯୋଜନା ଅଧୀନରେ ହେଉଥିବା ଶିକ୍ଷକ ନିଯୁକ୍ତି ପ୍ରକ୍ରିୟାକୁ ଚ୍ୟାଲେଞ୍ଜ କରି ଦାଖଲ ହୋଇଥିବା ଜନସ୍ବାର୍ଥ ଆବେଦନର ଶୁଣାଣି ସମୟରେ ସୁପ୍ରିମ୍କୋର୍ଟ ଏହି ନିର୍ଦ୍ଦେଶ ଦେଇଛନ୍ତି। ମାମଲାର ଶୁଣାଣି କରି ଏ ସଂକ୍ରାନ୍ତ ନିଯୁକ୍ତି ପ୍ରକ୍ରିୟା ଉପରେ ସ୍ଥଗିତାଦେଶ ଜାରି କରାଯାଇଛି।
ପ୍ରଧାନ ବିଚାରପତି ସୂର୍ଯ୍ୟକାନ୍ତ, ବିଚାରପତି ଜୟମାଲ୍ୟ ବାଗଚୀ ଏବଂ ବିଚାରପତି ଭି. ମୋହନଙ୍କୁ ନେଇ ଗଠିତ ଖଣ୍ଡପୀଠ ଏହି ମାମଲାରେ କେନ୍ଦ୍ର ସରକାର ଓ ଆସାମ ସରକାରଙ୍କ ସମେତ ସମ୍ପୃକ୍ତ ଶିକ୍ଷା ବିଭାଗର ଅଧିକାରୀଙ୍କୁ ନୋଟିସ୍ ଜାରି କରିଛନ୍ତି।
ପ୍ରାଥମିକ, ମାଧ୍ୟମିକ ଓ ଉଚ୍ଚଶିକ୍ଷା ନିର୍ଦ୍ଦେଶକଙ୍କ ସମେତ ସମ୍ପୃକ୍ତ ଆୟୁକ୍ତ ଏବଂ ସଚିବଙ୍କୁ ମଧ୍ୟ ଏହି ମାମଲାରେ ପକ୍ଷ ରଖିବାକୁ କୁହାଯାଇଛି।
ସୁପ୍ରିମ୍କୋର୍ଟ ସ୍ପଷ୍ଟ କରିଛନ୍ତି ଯେ ଶିକ୍ଷକ ନିଯୁକ୍ତି କେବଳ ନିର୍ଦ୍ଧାରିତ ନିୟମ ଓ ଆଇନଗତ ଢାଞ୍ଚା ଅନୁଯାୟୀ ହେବା ଉଚିତ। ନିଯୁକ୍ତି ପ୍ରକ୍ରିୟା ସ୍ୱଚ୍ଛ, ନିରପେକ୍ଷ ଏବଂ ପ୍ରତିଯୋଗିତାମୂଳକ ହେବା ଆବଶ୍ୟକ। ନିୟମକୁ ଉଲ୍ଲଂଘନ କରି କିମ୍ବା ଉପଯୁକ୍ତ ପ୍ରକ୍ରିୟା ଅବଲମ୍ବନ ନକରି ନିଯୁକ୍ତି ଦେବା ପ୍ରସଙ୍ଗରେ ଅଦାଲତ ଗୁରୁତର ପ୍ରଶ୍ନ ଉଠାଇଛନ୍ତି।
ସ୍କୁଲ ଓ କଲେଜରେ ଶିକ୍ଷକଙ୍କ ଯୋଗ୍ୟତା ସିଧାସଳଖ ଭାବେ ଶିକ୍ଷାର ଗୁଣବତ୍ତା ସହ ଜଡ଼ିତ। ତେଣୁ ନିର୍ଦ୍ଧାରିତ ମାନଦଣ୍ଡ ପୂରଣ ନକରୁଥିବା ବ୍ୟକ୍ତିଙ୍କୁ ଶିକ୍ଷକ ପଦରେ ରଖିବା ଶିକ୍ଷା ବ୍ୟବସ୍ଥା ପାଇଁ କେତେଦୂର ଯୁକ୍ତିସଙ୍ଗତ, ସେ ନେଇ ସର୍ବୋଚ୍ଚ ଅଦାଲତଙ୍କ ଆଭିମୁଖ୍ୟ ଏହି ମାମଲାରେ ସ୍ପଷ୍ଟ ହୋଇଛି।
ଅର୍ଥାତ୍, ଶିକ୍ଷକ ନିଯୁକ୍ତିରେ ଏଣିକି କେବଳ ପଦ ଖାଲି ଥିବା କିମ୍ବା ନିଯୁକ୍ତି ଦେବାର ଆବଶ୍ୟକତା ଯଥେଷ୍ଟ ନୁହେଁ—ନିର୍ଦ୍ଧାରିତ ଯୋଗ୍ୟତା, ନିୟମ ଏବଂ ସ୍ୱଚ୍ଛ ଚୟନ ପ୍ରକ୍ରିୟାକୁ ହିଁ ପ୍ରାଥମିକତା ଦେବାକୁ ପଡ଼ିବ।