ସମୀକ୍ଷା ବ୍ୟୁରୋ
ଓଡିଶୀ ନୃତ୍ୟର କିମ୍ବଦନ୍ତୀ ପୁରୁଷ ଗୁରୁ କେଳୁଚରଣ ମହାପାତ୍ରଙ୍କ ଦ୍ଵାରା ପ୍ରତିଷ୍ଠିତ ପ୍ରସିଦ୍ଧ ଓଡିଶୀ ନୃତ୍ୟ ଅନୁଷ୍ଠାନ “ସୃଜନ” ଆସନ୍ତା ସେପ୍ଟେମ୍ବର ୫ ରୁ ୧୧ ତାରିଖ ପର୍ଯ୍ୟନ୍ତ ସାତ ଦିନ ବ୍ୟାପୀ ଗୁରୁ କେଳୁଚରଣ ପୁରସ୍କାର ସମାରୋହର ରଜତ ଜୟନ୍ତୀ ପାଳନ କରିବା ବୋଲି ଏହାର ନିର୍ଦ୍ଦେଶକ ଗୁରୁ ରତିକାନ୍ତ ମହାପାତ୍ର ସୂଚନା ଦେଇଛନ୍ତି। ଗୁରୁଜୀଙ୍କ ଜୀବନକାଳରେ ଆରମ୍ଭ ହୋଇଥିବା ଏହି ଶାସ୍ତ୍ରୀୟ ସଙ୍ଗୀତ ଓ ନୃତ୍ୟର ସମାରୋହ ଓଡିଶାର ଅନ୍ୟତମ ଶ୍ରେଷ୍ଠ ସମାରୋହ ଭାବରେ ସୁଖ୍ୟାତି ଲାଭ କରିଛି। ଗତ ୨୪ ବର୍ଷ ଧରି ଏହି ସମାରୋହରେ ଭାରତର ବହୁ କିମ୍ବଦନ୍ତୀ ସଙ୍ଗୀତଜ୍ଞ ଓ ନୃତ୍ୟଶିଳ୍ପୀ ନିଜର କଳା ପରିବେଷଣ ମାଧ୍ୟମରେ ଗୁରୁଜୀଙ୍କୁ ତାଙ୍କର ଶ୍ରଦ୍ଧା ନିବେଦନ କରି ଆସୁଛନ୍ତି।
ଚଳିତ ବର୍ଷ ଏହି ସମାରୋହର ୨୫ଶ ବର୍ଷ ପାଳନ ଅବସରରେ ରବୀନ୍ଦ୍ର ମଣ୍ଡପରେ ଭବ୍ୟ ଆୟୋଜନ କରାଯାଇଛି। ଏହି ବର୍ଷ ପାଇଁ ସମ୍ମାନଜନକ ଗୁରୁ କେଳୁଚରଣ ମହାପାତ୍ର ପୁରସ୍କାର ଭାରତୀୟ ଶାସ୍ତ୍ରୀୟ ନୃତ୍ୟର ଦୁଇ ପ୍ରସିଦ୍ଧ ସମୀକ୍ଷକ ଡ. ସୁନୀଲ କୋଠାରି ଓ ଲୀଲା ଭେଙ୍କଟରମଣ, ବିଶିଷ୍ଟ ଫଟୋଗ୍ରାଫର ଅବିନାଶ ପଶରିଚା,ବିଶିଷ୍ଟ ତବଲା ବାଦକ ହରମୋହନ ଖୁଣ୍ଟିଆ ଓ ଓଡିଶୀ ନୃତ୍ୟଗୁରୁ ଦୁର୍ଗା ଚରଣ ରଣବୀରଙ୍କୁ ପ୍ରଦାନ କରାଯିବ। ନାଲକୋ ପ୍ରାୟୋଜିତ ଏହି ପୁରସ୍କାର ବାବଦରେ ପ୍ରତ୍ୟେକଙ୍କୁ ଏକ ଲକ୍ଷ ଟଙ୍କା ଅର୍ଥରାଶି ପ୍ରଦାନ କରାଯିବ। ସେହିପରି ଯୁବ ଶିଳ୍ପୀ ମାନଙ୍କୁ ଉତ୍ସାହିତ କରିବା ପାଇଁ ପାଞ୍ଚ ଜଣ ଶିଳ୍ପୀଙ୍କୁ ୨୫ ହଜାର ଟଙ୍କାର ଗୁରୁ କେଳୁଚରଣ ମହାପାତ୍ର ଯୁବ ପ୍ରତିଭା ପୁରସ୍କାର ପ୍ରଦାନ କରାଯିବ। ଏହି ପୁରସ୍କାର ପାଇବେ ଯୁବ ଓଡିଶୀ ଶିଳ୍ପୀ ରାଜଶ୍ରୀ ପ୍ରହରାଜ, ରାହୁଲ ଆଚାର୍ୟ, ସ୍ଵପ୍ନକଳ୍ପା ଦାସଗୁପ୍ତ, ସତ୍ରୀୟ ନୃତ୍ୟଶିଳ୍ପୀ ଅନ୍ଵେଷା ମହନ୍ତ ଓ ଓଡିଶୀ ଗାୟକ ସତ୍ୟବ୍ରତ କାଠ।
ଉତ୍ସବରେ ବିଶିଷ୍ଟ ଗଜଲ ଓ ଭଜନ ଗାୟକ ଅନୁପ ଜଲୋଟାଙ୍କ ସମେତ ବହୁ ପ୍ରସିଦ୍ଧ ଶିଳ୍ପୀ ଶାସ୍ତ୍ରୀୟ ସଙ୍ଗୀତ ଓ ନୃତ୍ୟ ପରିବେଷଣ କରିବେ। ସାତଦିନ ବ୍ୟାପୀ ଏହି ଉତ୍ସବରେ ଓଡିଶାର ପ୍ରାୟ ସବୁ ପ୍ରସିଦ୍ଧ ଓଡିଶୀ ଅନୁଷ୍ଠାନ ନିଜର ନୃତ୍ୟ ପରିବେଷଣ କରିବେ। ଉତ୍ସବର ଉଦଯାପନୀ ସନ୍ଧ୍ୟାରେ “ସୃଜନ” ତରଫରୁ “ନମାମି ଗଙ୍ଗେ” ନୃତ୍ୟ ନାଟିକା ପରିବେଷିତ ହେବ।
