ଭୁବନେଶ୍ବର: ଓଡ଼ିଶାର ପରବର୍ତ୍ତୀ ପୁଲିସ୍ ମହା ନିର୍ଦ୍ଦେଶକ (ଡିଜିପି) ଚୟନ ପ୍ରକ୍ରିୟାକୁ ନେଇ ସୃଷ୍ଟି ହୋଇଥିବା ଆଇନଗତ ବିବାଦର ଶୁଣାଣି ସୁପ୍ରିମକୋର୍ଟରେ ଜାରି ରହିଛି। ମଙ୍ଗଳବାର କୋର୍ଟ ସମୟ ଶେଷ ସୁଦ୍ଧା କୌଣସି ଅନ୍ତିମ ନିଷ୍କର୍ସ ବାହାରି ପାରିନଥିବାରୁ, ଭାରତର ମୁଖ୍ୟ ବିଚାରପତି ଜଷ୍ଟିସ୍ ସୂର୍ଯ୍ୟକାନ୍ତଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ ମାମଲାର ଶୁଣାଣିକୁ ମୁଲତବୀ ରଖିଛନ୍ତି। ଆଜି ପୁଣିଥରେ ଏହି ମାମଲାର ଶୁଣାଣି ହେବ।
ରାଜ୍ୟ ସରକାର ଗତ ମେ ୧୪ ତାରିଖରେ ୟୁପିଏସ୍ସି (ୟୁପିଏସସି) ନିକଟକୁ ୩ ଜଣ ଡିଜି ର୍ୟାଙ୍କ୍ ଅଧିକାରୀଙ୍କ ନାମ ପଠାଇଥିଲେ। ମାତ୍ର ଅଗଷ୍ଟ ମାସରେ ଦୁଇ ଜଣ ଅତିରିକ୍ତ ଡିଜିପିଙ୍କୁ ଡିଜି ର୍ୟାଙ୍କ୍କୁ ପଦୋନ୍ନତି ଦେବା ପରେ, ଉକ୍ତ ସୁପାରିଶ ତାଲିକାରେ ପରିବର୍ତ୍ତନ କରାଯାଇଥିଲା। ମାମଲା ସୁପ୍ରିମକୋର୍ଟଙ୍କ ବିଚାରାଧୀନ ଥିବା ସମୟରେ ଏଭଳି ତାଲିକା ବଦଳାଇବା କେତେଦୂର ଗ୍ରହଣୀୟ, ସେନେଇ ଆମିକସ କ୍ୟୁରି ରାଜୁ ରାମଚନ୍ଦ୍ରନ୍ ପ୍ରଶ୍ନ ଉଠାଇଛନ୍ତି। ୧୯୯୩ ବ୍ୟାଚ୍ର ବରିଷ୍ଠ ଆଇପିଏସ୍ ଅଧିକାରୀ ସୁଶାନ୍ତ କୁମାର ନାଥଙ୍କୁ ଚୟନ ପ୍ରକ୍ରିୟାରୁ ବାଦ୍ ଦିଆଯିବା ଏବଂ ତାଙ୍କର “ଇଣ୍ଟେଗ୍ରିଟି ସାର୍ଟିଫିକେଟ୍” ରୋକାଯିବା ଘଟଣାକୁ କୋର୍ଟ ସମୀକ୍ଷା କରୁଛନ୍ତି। ସିବିଆଇର ପ୍ରାରମ୍ଭିକ ଯାଞ୍ଚ ଆଧାରରେ ରାଜ୍ୟ ସରକାର ଏହି ପଦକ୍ଷେପ ନେଇଥିବା ବେଳେ, ଶ୍ରୀ ନାଥଙ୍କ ବିରୋଧରେ କୌଣସି ଆନୁଷ୍ଠାନିକ ଅପରାଧିକ ମାମଲା ବା ସିବିଆଇ ଜେରା ନିର୍ଦ୍ଦେଶ ନାହିଁ ବୋଲି ଆମିକସ କ୍ୟୁରି ଦର୍ଶାଇଛନ୍ତି।
ଏହି ବିବାଦ ୨୦୦୬ର ପ୍ରସିଦ୍ଧ ‘ପ୍ରକାଶ ସିଂହ ମାମଲା’ରେ ସୁପ୍ରିମକୋର୍ଟ ଦେଇଥିବା ନିର୍ଦ୍ଦେଶାବଳୀ ସହ ଜଡ଼ିତ। ଉକ୍ତ ନିୟମାନୁସାରେ, ୟୁପିଏସ୍ସି ଦ୍ୱାରା ସୁପାରିଶ କରାଯାଇଥିବା ୩ ଜଣ ବରିଷ୍ଠ ଓ ଯୋଗ୍ୟ ଆଇପିଏସ୍ ଅଧିକାରୀଙ୍କ ସ୍ୱଚ୍ଛ ପ୍ୟାନେଲ୍ରୁ ହିଁ ରାଜ୍ୟ ସରକାର ଡିଜିପି ମନୋନୀତ କରିବା ବାଧ୍ୟତାମୂଳକ। ଆଜି ଶୁଣାଣି ପୁନଃ ଆରମ୍ଭ ହେବା ପରେ ରାଜ୍ୟ ସରକାର, ଆବେଦନକାରୀ ଏବଂ ଆମିକସ କ୍ୟୁରି ନିଜ ନିଜର ଯୁକ୍ତି ଉପସ୍ଥାପନ କରିବେ। ଏହା ପରେ ସୁପ୍ରିମକୋର୍ଟ ଏହି ଗୁରୁତ୍ୱପୂର୍ଣ୍ଣ ମାମଲାରେ ଆଦେଶ ଶୁଣାଇପାରନ୍ତି।