ଭୁବନେଶ୍ବର: ଓଡ଼ିଶା ଡିଜିପି ନିଯୁକ୍ତି ବିବାଦ ମାମଲାରେ ସୁପ୍ରିମକୋର୍ଟରେ ଚାଲିଥିବା ଶୁଣାଣି ମଧ୍ୟ ଅସମାପ୍ତ ରହିଛି। ଆଜି ପୁଣିଥରେ ଏହି ମାମଲାର ଶୁଣାଣି ହେବ। ଆବେଦନକାରୀଙ୍କ ପକ୍ଷରୁ ବରିଷ୍ଠ ଆଇନଜୀବୀ ପି. ଚିଦାମ୍ବରମ୍, ପ୍ରଶାନ୍ତ ଭୂଷଣ, ବରିଷ୍ଠ ଆଇନଜୀବୀ କରୁଣା ନନ୍ଦୀ ଏବଂ କୋର୍ଟଙ୍କ ଦ୍ୱାରା ନିଯୁକ୍ତ ଆମିକସକ୍ୟୁରି ରାଜୁ ରାମଚନ୍ଦ୍ରନ୍ ନିଜ ନିଜର ଯୁକ୍ତି ଉପସ୍ଥାପନ କରିଛନ୍ତି। ଆଜି ପୁଣି ରାଜ୍ୟ ସରକାରଙ୍କ ପକ୍ଷରୁ ଆଡଭୋକେଟ ଜେନେରାଲ ଓ ସଲିସିଟର ଜେନେରାଲ ନିଜର ଜବାବ ରଖିବେ।
ପ୍ରଧାନ ବିଚାରପତି ଜଷ୍ଟିସ ସୂର୍ଯ୍ୟକାନ୍ତ, ଜଷ୍ଟିସ ଜୟମାଲ୍ୟ ବାଗଚୀ ଓ ଜଷ୍ଟିସ ଭି. ମୋହନଙ୍କୁ ନେଇ ଗଠିତ ୩ ଜଣିଆ ଖଣ୍ଡପୀଠ ଆଜି ପ୍ରାୟ ଦେଢ଼ ଘଣ୍ଟାରୁ ଅଧିକ ସମୟ ଧରି ବିଭିନ୍ନ ପକ୍ଷଙ୍କ ଯୁକ୍ତି ଶୁଣିଥିଲେ।
ଆବେଦନକାରୀ ଜୟନ୍ତ ଦାସଙ୍କ ଓକିଲ ବରିଷ୍ଠ ଆଇନଜୀବୀ ପି. ଚିଦାମ୍ବରମ୍ କୋର୍ଟରେ ଯୁକ୍ତି ବାଢ଼ି କହିଥିଲେ ଯେ, ‘ପ୍ରକାଶ ସିଂ ମାମଲା’ରେ ସୁପ୍ରିମକୋର୍ଟଙ୍କ ନିର୍ଦ୍ଦେଶରେ ପ୍ରସ୍ତୁତ ସଂଶୋଧିତ ମାର୍ଗଦର୍ଶିକା ଅନୁଯାୟୀ, ଯଦି ‘ଲେଭଲ-୧୬’ରେ ଯୋଗ୍ୟ ଅଫିସର ଉପଲବ୍ଧ ଅଛନ୍ତି, ତେବେ ‘ଲେଭଲ-୧୫’ (ଏଡିଜି ସ୍ତର)ର ଅଧିକାରୀଙ୍କୁ ଡିଜିପି ଚୟନ ପ୍ୟାନେଲରେ ସାମିଲ କରିବାର କୌଣସି ଆବଶ୍ୟକତା ନାହିଁ।
ସେ ଆହୁରି ଦର୍ଶାଇଥିଲେ ଯେ ଓଡ଼ିଶାରେ ‘ଲେଭଲ-୧୬’ (ଡିଜି ପାହ୍ୟା)ରେ ୩ ଜଣ ଯୋଗ୍ୟ ଅଧିକାରୀ ଅଛନ୍ତି। ନିୟମାନୁସାରେ ରାଜ୍ୟ ସରକାର ପ୍ରଥମେ ଏହି ୩ ଜଣଙ୍କ ନାମ ଡିଜିପି ଚୟନ ପାଇଁ ୟୁପିଏସସି (ୟୁପିଏସସି) ନିକଟକୁ ପଠାଇଥିଲେ। ମାତ୍ର ପରବର୍ତ୍ତୀ ସମୟରେ ସେହି ତାଲିକାକୁ ବଦଳାଇ ୮ ଜଣ ଏଡିଜି ସ୍ତରର ଅଫିସରଙ୍କ ନାମ ଯୋଡ଼ି ୧୧ ଜଣିଆ ନୂଆ ତାଲିକା ପଠାଯାଇଥିଲା, ଯାହାକି ସମ୍ପୂର୍ଣ୍ଣ ବେଆଇନ ଅଟେ।