ଭୁବନେଶ୍ବର: ପ୍ରଧାନମନ୍ତ୍ରୀ ଆବାସ ଯୋଜନା (ସହରୀ) ୨.୦ କାର୍ଯ୍ୟାନ୍ୱୟନରେ ଉଲ୍ଲେଖନୀୟ ସଂସ୍କାର ପାଇଁ ଓଡ଼ିଶାକୁ ଜାତୀୟ ସ୍ତରରେ ମିଳିଛି ସ୍ୱୀକୃତି। ନୂଆଦିଲ୍ଲୀରେ ଆୟୋଜିତ ‘ପ୍ରଧାନମନ୍ତ୍ରୀ ଆବାସ ଯୋଜନା-ସହରୀ ପୁରସ୍କାର-୨୦୨୬’ ସମାରୋହରେ କେନ୍ଦ୍ର ଗୃହ ଓ ନଗର ବ୍ୟାପାର ମନ୍ତ୍ରଣାଳୟ ପକ୍ଷରୁ ରାଜ୍ୟକୁ ଏହି ବିଶେଷ ସ୍ୱୀକୃତି ପୁରସ୍କାର ପ୍ରଦାନ କରାଯାଇଛି। ସହରୀ ଗରିବଙ୍କ ନିକଟରେ ସରଳ, ସ୍ୱଚ୍ଛ ଓ ପ୍ରଭାବଶାଳୀ ଢଙ୍ଗରେ ଆବାସ ସୁବିଧା ପହଞ୍ଚାଇବା ପାଇଁ ଓଡ଼ିଶା ଗ୍ରହଣ କରିଥିବା ପ୍ରଶାସନିକ ଓ ପ୍ରଯୁକ୍ତିଗତ ପଦକ୍ଷେପ ଯୋଗୁଁ ଏହି ସମ୍ମାନ ମିଳିଛି।
ସହରୀ ଆବାସ ପ୍ରକ୍ରିୟାକୁ ଅଧିକ ନାଗରିକକୈନ୍ଦ୍ରିକ କରିବା ପାଇଁ ରାଜ୍ୟ ସରକାର ପ୍ରଶାସନିକ ଦକ୍ଷତା ବୃଦ୍ଧି, ବିଭିନ୍ନ ବିଭାଗ ମଧ୍ୟରେ ସମନ୍ୱୟ ସୁଦୃଢ଼ କରିବା ଏବଂ ଆଧୁନିକ ପ୍ରଯୁକ୍ତିବିଦ୍ୟାର ବ୍ୟାପକ ଉପଯୋଗ ଉପରେ ଗୁରୁତ୍ୱ ଦେଇଥିଲେ। ଏହାଦ୍ୱାରା ଯୋଗ୍ୟ ହିତାଧିକାରୀଙ୍କ ନିକଟରେ ଯୋଜନାର ସୁଫଳ ବିନା ବାଧାରେ ପହଞ୍ଚିପାରିଛି।
ଏହି ସଫଳତା ପାଇଁ ଖୁସି ପ୍ରକାଶ କରି ରାଜ୍ୟ ଗୃହ ଓ ନଗର ଉନ୍ନୟନ ମନ୍ତ୍ରୀ ଡଃ କୃଷ୍ଣଚନ୍ଦ୍ର ମହାପାତ୍ର କହିଛନ୍ତି ଯେ, “ଏହି ଜାତୀୟ ସ୍ୱୀକୃତି ଓଡ଼ିଶା ପାଇଁ ଗର୍ବ ଓ ଗୌରବର ବିଷୟ। କେବଳ ଘର ତିଆରି କରିବା ଆମର ଲକ୍ଷ୍ୟ ନୁହେଁ, ବରଂ ପ୍ରତ୍ୟେକ ଯୋଗ୍ୟ ସହରୀ ପରିବାରକୁ ସ୍ୱଚ୍ଛତା ଓ ସମ୍ମାନର ସହ ଏକ ସୁରକ୍ଷିତ ଛାତ ଯୋଗାଇଦେବା ଆମର ପ୍ରାଥମିକତା।” ଆଗାମୀ ଦିନରେ ମଧ୍ୟ ପିଏମଏୱାଇ (ସହରୀ) ୨.୦ ଅଧୀନରେ ଦ୍ରୁତ କାର୍ଯ୍ୟାନ୍ୱୟନ ଓ ଶେଷ ହିତାଧିକାରୀଙ୍କ ପାଖରେ ସୁବିଧା ପହଞ୍ଚାଇବା ଉପରେ ରାଜ୍ୟ ସରକାର ଗୁରୁତ୍ୱ ଦେବେ ବୋଲି ସେ ସୂଚନା ଦେଇଛନ୍ତି।