ନୂଆଦିଲ୍ଲୀ: ଭାରତୀୟ ମହିଳା କ୍ରିକେଟ ଦଳର ସଫଳ ଅଧିନାୟିକା ହରମନପ୍ରୀତ କୌର ସବୁ ଫର୍ମାଟର ନେତୃତ୍ୱ ପଦରୁ ଇସ୍ତଫା ଦେଇଛନ୍ତି। ଆଇସିସି ମହିଳା କ୍ରିକେଟ ବିଶ୍ୱକପ ବିଜୟୀ ଏହି ୩୭ ବର୍ଷୀୟା ତାରକା ଖେଳାଳି ସୋସିଆଲ ମିଡିଆ ଇନଷ୍ଟାଗ୍ରାମରେ ଏକ ଆବେଗପୂର୍ଣ୍ଣ ପୋଷ୍ଟ ଶେୟାର କରି ଏହି ଗୁରୁତ୍ୱପୂର୍ଣ୍ଣ ଘୋଷଣା କରିଛନ୍ତି। ୨୦୧୬ରେ ଟି-୨୦ ଏବଂ ୨୦୨୨ରେ ମିତାଲି ରାଜଙ୍କ ଅବସର ପରେ ଦିନିକିଆ ଓ ଟେଷ୍ଟ ଦଳର ଅଧିନାୟକତ୍ୱ ସମ୍ଭାଳିଥିବା ହରମନପ୍ରୀତ ଏହାକୁ ନିଜ ଜୀବନର ଅନ୍ୟତମ କଠିନ ନିଷ୍ପତ୍ତି ବୋଲି କହିଛନ୍ତି।
ଦଳକୁ ସବୁବେଳେ ପ୍ରଥମ ସ୍ଥାନରେ ରଖି ନିଜର ବ୍ୟକ୍ତିଗତ ମହତ୍ତ୍ୱାକାଂକ୍ଷା, ସମୟ ଏବଂ ପରିଶ୍ରମର ତ୍ୟାଗ କରିଥିବା ହରମନପ୍ରୀତ ଦଳର ସଫଳତା ପାଇଁ ଅନେକ ସମୟରେ କଠୋର ନିଷ୍ପତ୍ତି ନେଇଥିବା ପ୍ରକାଶ କରିଛନ୍ତି। କ୍ୟାରିୟରରେ ଅନେକ ସମାଲୋଚନା, ଆହ୍ୱାନ ଏବଂ ହୃଦୟଭଙ୍ଗର ସାମ୍ନା କରିବା ସହ ଅନେକ ବଡ଼ ସଫଳତା ମଧ୍ୟ ହାସଲ କରିଛନ୍ତି। ଅଧିନାୟକ ପଦର ଅନ୍ତ ଘଟିଥିଲେ ସୁଦ୍ଧା କ୍ରିକେଟ ପ୍ରତି ଥିବା ଭଲପାଇବା ପାଇଁ ସେ ଆଗକୁ ଜଣେ ଖେଳାଳି ଭାବେ ନିଜର ଯାତ୍ରା ଜାରି ରଖିବେ ବୋଲି ସ୍ପଷ୍ଟ କରିଛନ୍ତି।