ଶ୍ରୀନଗର: ଜମ୍ମୁ-କାଶ୍ମୀରର ପୁଞ୍ଚ୍ ଜିଲ୍ଲାରେ ଭାରତୀୟ ସୀମା ଭିତରକୁ ଅନୁପ୍ରବେଶ କରିବାକୁ ଉଦ୍ୟମ କରୁଥିବା ବେଳେ ଏକ ବାରୁଦବିଛା ସୁଡ଼ଙ୍ଗ (ଲ୍ୟାଣ୍ଡମାଇନ୍) ବିସ୍ଫୋରଣରେ ୪ ଜଣ ଆତଙ୍କବାଦୀ ପ୍ରାଣ ହରାଇଛନ୍ତି। ମୃତ ଆତଙ୍କବାଦୀଙ୍କ ମଧ୍ୟରେ ଲସ୍କର-ଏ-ତୋଏବା (ଏଲ୍ଇଟି)ର ଜଣେ ଶୀର୍ଷ କମାଣ୍ଡର ମଧ୍ୟ ସାମିଲ ଅଛନ୍ତି। ସୂଚନା ଅନୁସାରେ, ଆତଙ୍କବାଦୀଙ୍କ ଏହି ଗୋଷ୍ଠୀ ଆଜି ଅପରାହ୍ନରେ କୃଷ୍ଣା ଘାଟି ସେକ୍ଟରର ନଙ୍ଗୀ ଟକରୀ ଅଞ୍ଚଳ ଦେଇ ଭାରତୀୟ ସୀମା ଭିତରକୁ ପଶିବାକୁ ଚେଷ୍ଟା କରୁଥିଲେ। ସେହି ସମୟରେ ସେମାନେ ସେନା ଦ୍ୱାରା ସୁରକ୍ଷା ପାଇଁ ବିଛାଯାଇଥିବା ଲ୍ୟାଣ୍ଡମାଇନ୍ ସଂସ୍ପର୍ଶରେ ଆସିଯିବାରୁ ଏକ ଶକ୍ତିଶାଳୀ ବିସ୍ଫୋରଣ ଘଟିଥିଲା। ଏଥିରେ ଘଟଣାସ୍ଥଳରେ ହିଁ ୪ ଆତଙ୍କବାଦୀଙ୍କ ମୃତ୍ୟୁ ହୋଇଛି। ମୃତକମାନେ ମହମ୍ମଦ ଇସ୍ତିୟାକ୍, ମହମ୍ମଦ ଫୈଜାନ୍, ମହମ୍ମଦ ୱକାସ୍ ଏବଂ ମହମ୍ମଦ ଅସୀମ୍ ଭାବେ ଚିହ୍ନଟ ହୋଇଛନ୍ତି। ଘଟଣା ପରେ ସୁରକ୍ଷା ବଳ ପକ୍ଷରୁ ସମଗ୍ର ଅଞ୍ଚଳରେ ହାଇ ଆଲର୍ଟ ଜାରି କରାଯିବା ସହ ନିୟନ୍ତ୍ରଣ ରେଖାରେ କଡ଼ା ପହରା ଲଗାଯାଇଛି। ଅନ୍ୟପକ୍ଷରେ, ପୁଞ୍ଚ୍ର ମେନ୍ଧର ସେକ୍ଟର ଅନ୍ତର୍ଗତ ବସୋନୀ ଅଞ୍ଚଳରୁ ଭାରତୀୟ ସେନା ଆଉ ଦୁଇଟି ପୁରୁଣା ଲ୍ୟାଣ୍ଡମାଇନ୍ ଠାବ କରି ସଫଳତାର ସହ ନିଷ୍କ୍ରିୟ କରିଛନ୍ତି।
