ନୂଆଦିଲ୍ଲୀ: ଦିଲ୍ଲୀ ନଗର ନିଗମ ଗୃହ ବୈଠକ ଅତ୍ୟନ୍ତ କୋଲାହଳମୟ ଏବଂ ଉତ୍ତେଜନାପୂର୍ଣ୍ଣ ପରିବେଶ ମଧ୍ୟରେ ଶେଷ ହୋଇଛି। ଗୃହର କାର୍ଯ୍ୟସୂଚୀ ଅନୁଯାୟୀ ଦିଲ୍ଲୀରେ ବୃଦ୍ଧି ପାଉଥିବା ବାଯୁ ପ୍ରଦୂଷଣ ସମସ୍ୟାର ସମାଧାନ ଏବଂ ଏହାର ପ୍ରତିକାର ସମ୍ପର୍କରେ ଏକ ଗୁରୁତ୍ୱପୂର୍ଣ୍ଣ ଆଲୋଚନା ହେବାର ଥିଲା। ମାତ୍ର ବୈଠକ ଆରମ୍ଭ ହେବା ମାତ୍ରେ କାର୍ଯ୍ୟକାରିତାକୁ ନେଇ ଭାରତୀୟ ଜନତା ପାର୍ଟି ଏବଂ ଆମ ଆଦମୀ ପାର୍ଟିର ପାର୍ଷଦ ତଥା କର୍ମକର୍ତ୍ତାମାନେ ମୁହାଁମୁହିଁ ହୋଇଥିଲେ। ଦେଖୁ ଦେଖୁ ବିବାଦ ଏତେ ଗମ୍ଭୀର ରୂପ ନେଇଥିଲା ଯେ ଗୃହରେ ପ୍ରବଳ ହଙ୍ଗାମା, କୋଲାହଳ ଏବଂ ଭଙ୍ଗାଭଙ୍ଗି ସୃଷ୍ଟି ହୋଇଥିଲା। ଉଭୟ ଦଳର ପାର୍ଷଦମାନେ ପରସ୍ପର ବିରୋଧରେ ନାରାବାଜି କରିବା ସହ ଉତ୍ତେଜିତ ହୋଇ ମାଇକ୍ରୋଫୋନ୍ ଭାଙ୍ଗିବା, ପାଣି ବୋତଲ ଓ ପାଣି ଫିଙ୍ଗିବା ଏବଂ ପାଟ୍ଫର୍ମ ଭାଙ୍ଗିବା ପାଇଁ ଉଦ୍ୟମ କରିଥିଲେ। ଏହି ଗଣ୍ଡଗୋଳରେ କଂଗ୍ରେସ ପାର୍ଷଦମାନେ ମଧ୍ୟ ସାମିଲ ହୋଇଥିଲେ, ଯାହା ଫଳରେ ପରିସ୍ଥିତି ଅନିୟନ୍ତ୍ରିତ ହୋଇପଡ଼ିଥିଲା।
ଗୃହରେ ପରିସ୍ଥିତି ଅତ୍ୟନ୍ତ ବିଗିଡ଼ି ଯିବାରୁ ମେୟରଙ୍କ ସୁରକ୍ଷା ପାଇଁ ମାର୍ଶଲମାନଙ୍କୁ ସ୍ୱତନ୍ତ୍ର ଭାବେ ମଧ୍ୟସ୍ଥତା କରିବାକୁ ପଡ଼ିଥିଲା। ଆମ ଆଦମୀ ପାର୍ଟିର ପାର୍ଷଦମାନେ ଏକାଠି ହୋଇ ମେୟରଙ୍କ ଆସନ ନିକଟକୁ ଚାଲିଯାଇ ସେଠାରେ ଥିବା ପାଟ୍ଫର୍ମ ଭାଙ୍ଗିବାକୁ ଚେଷ୍ଟା କରୁଥିବା ବେଳେ ମାର୍ଶଲମାନେ ସେମାନଙ୍କୁ ସୁରକ୍ଷିତ ଭାବେ ଗୃହରୁ ବାହାରକୁ ଆଣିଥିଲେ। ବିବାଦର ମୁଖ୍ୟ କାରଣ ଥିଲା ୱାର୍ଡ ବିକାଶ ପାଣ୍ଠି। ଆପ୍ ପାର୍ଷଦମାନେ ନିଜ ନିଜ ୱାର୍ଡର ବିକାଶ ପାଇଁ ପ୍ରାରମ୍ଭିକ ପର୍ଯ୍ୟାୟରେ ୧ କୋଟି ଟଙ୍କା ଲେଖାଏଁ ପାସ୍ ମଞ୍ଜୁର କରିବାକୁ ଦାବି ଜଣାଇଥିଲେ। ଏହାର ପ୍ରତିଉତ୍ତରରେ ମେୟର ପ୍ରଥମେ ୧୪ ଲକ୍ଷ ଟଙ୍କା ଲେଖାଏଁ ପ୍ରଦାନ କରାଯିବ ଏବଂ ଚଳିତ ଆର୍ଥିକ ବର୍ଷ ମଧ୍ୟରେ ସମୁଦାୟ ୨ କୋଟି ଟଙ୍କା ପାର୍ଷଦମାନଙ୍କୁ ଉପଲବ୍ଧ କରାଯିବ ବୋଲି ଘୋଷଣା କରିଥିଲେ। ଏହି ପାଣ୍ଠି ଆବଣ୍ଟନକୁ ନେଇ ଉଭୟ ପକ୍ଷ ମଧ୍ୟରେ ମତାନ୍ତର ତୀବ୍ର ରୂପ ନେଇଥିଲା।
ଗୃହ ଭିତରେ ଘଟିଥିବା ଏହି ଅଶୋଭନୀୟ ଏବଂ ଅଶୃଙ୍ଖଳିତ ଆଚରଣକୁ ପ୍ରଶାସନ ପକ୍ଷରୁ ଅତ୍ୟନ୍ତ ଗମ୍ଭୀରତାର ସହ ନିଆଯାଇଛି। ଏହି ସମ୍ପୂର୍ଣ୍ଣ ଘଟଣାର ସବିଶେଷ ପ୍ରତିବେଦନ ଏବଂ ପ୍ରମାଣ ସଂଗ୍ରହ କରାଯାଇ ଗୃହର ଶୃଙ୍ଖଳାଗତ କମିଟି ନିକଟକୁ ପଠାଯାଇଛି। ଏହି କମିଟି ଆଧାରରେ ଗୃହର ସମ୍ମାନ ହାନି କରିଥିବା ଏବଂ ଅଶାନ୍ତି ସୃଷ୍ଟି କରିଥିବା ଅଭିଯୁକ୍ତ ପାର୍ଷଦମାନଙ୍କ ଆଚରଣ ଉପରେ ତଦନ୍ତ କରି ଦୃଢ଼ ଆଇନଗତ ଓ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରିବ ବୋଲି ଜଣାପଡ଼ିଛି।