ନୂଆଦିଲ୍ଲୀ: ଅଷ୍ଟ୍ରେଲିଆ ମହିଳା କ୍ରିକେଟ୍ ଦଳର ତାରକା ଫାଷ୍ଟ ବୋଲର୍ ମେଗନ୍ ଶଟ୍ ଡାକ୍ତରୀ ଚିକିତ୍ସା ନିୟମାବଳୀ ଉଲ୍ଲଂଘନ କରି କାର୍ଯ୍ୟାନୁଷ୍ଠାନର ଶିକାର ହୋଇଛନ୍ତି। ନିର୍ଦ୍ଧାରିତ ଆଇନଗତ ପ୍ରକ୍ରିୟା ପାଳନ ନକରି ପ୍ରେସ୍କ୍ରିପସନ୍ ଔଷଧ ବ୍ୟବହାର କରିଥିବା ଅଭିଯୋଗରେ କ୍ରିକେଟ୍ ଅଷ୍ଟ୍ରେଲିଆ ତାଙ୍କୁ ଦୁଇଟି ମ୍ୟାଚ୍ ପାଇଁ ବ୍ୟାନ୍ କରିଛି। ଅଷ୍ଟ୍ରେଲିଆ ଦଳର ବାଂଲାଦେଶ ଗସ୍ତ ପୂର୍ବରୁ ଏହି ଘଟଣା ଘଟିଥିବା ବେଳେ ଏହି ନିଲମ୍ବନ ଯୋଗୁଁ ୩୩ ବର୍ଷୀୟା ଶଟ୍ ନିଉଜିଲାଣ୍ଡ ବିପକ୍ଷ ତୃତୀୟ ଆନ୍ତର୍ଜାତୀୟ ଟ୍ୱେଣ୍ଟି-୨୦ ମ୍ୟାଚ୍ ଏବଂ ତାଙ୍କ ଘରୋଇ ଦଳ ପକ୍ଷରୁ ହେବାକୁ ଥିବା ପ୍ରଥମ ମ୍ୟାଚ୍ରୁ ବାଦ୍ ପଡ଼ିଛନ୍ତି।
କ୍ରିକେଟ୍ ଅଷ୍ଟ୍ରେଲିଆ ନିଜର ଆଧିକାରିକ ବିଜ୍ଞପ୍ତି ଜାରି କରି ଏହି ବ୍ୟାନ୍ ସମ୍ପର୍କରେ ନିଶ୍ଚିତ କରିଛି। ଏହି ଦୁଇଟି ମ୍ୟାଚ୍ର ବ୍ୟାନ୍ ଆନ୍ତର୍ଜାତୀୟ ଏବଂ ଘରୋଇ ଉଭୟ ସ୍ତରର କ୍ରିକେଟ୍ ମ୍ୟାଚ୍ରେ ଲାଗୁ ହେବ ବୋଲି ସ୍ପଷ୍ଟ କରାଯାଇଛି। କ୍ରିକେଟ୍ ଅଷ୍ଟ୍ରେଲିଆର ସୂଚନା ଅନୁଯାୟୀ, ଖେଳାଳି କ୍ରୀଡ଼ା ମେଡିସିନ୍ ନିୟମାବଳୀ ଅଧୀନରେ ପ୍ରେସ୍କ୍ରିପସନ୍ ଔଷଧ ବ୍ୟବହାର ପାଇଁ ରହିଥିବା ଆବଶ୍ୟକୀୟ ଆଇନଗତ ପ୍ରକ୍ରିୟା ଓ ସର୍ତ୍ତ ପୂରଣ କରିବାରେ ବିଫଳ ହୋଇଥିଲେ।
ଏହି ସମ୍ପୂର୍ଣ୍ଣ ମାମଲାରେ ନିଜର ଭୁଲ୍କୁ ଗ୍ରହଣ କରି ମେଗନ୍ ଶଟ୍ ଦୋଷ ସ୍ୱୀକାର କରିଛନ୍ତି। ସେ ପ୍ରକାଶ କରିଛନ୍ତି ଯେ, ସେ ନିଜର ଅବହେଳାକୁ ସମ୍ପୂର୍ଣ୍ଣ ଭାବେ ସ୍ୱୀକାର କରୁଛନ୍ତି ଏବଂ ନିର୍ଦ୍ଧାରିତ ନିୟମାବଳୀ ସଠିକ୍ ଭାବେ ପାଳନ କରିନଥିବାରୁ ନିଃସର୍ତ୍ତ କ୍ଷମା ପ୍ରାର୍ଥନା କରୁଛନ୍ତି। ଏହା ସହିତ ଏହି ପ୍ରକ୍ରିୟା ସମୟରେ ତାଙ୍କୁ ମିଳିଥିବା ସହଯୋଗ ପାଇଁ ସେ କୃତଜ୍ଞତା ବ୍ୟକ୍ତ କରିଛନ୍ତି।