ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଉତ୍ତର ପ୍ରଦେଶ ଏବଂ ଓଡ଼ିଶା ଗସ୍ତ କରିବେ। ପୂର୍ବାହ୍ନ ପ୍ରାୟ ୧୧ଟା ସମୟରେ, ପ୍ରଧାନମନ୍ତ୍ରୀ ବାରାଣସୀଠାରେ ଏକ ନୂତନ ପୋଷାକ ଉତ୍ପାଦନ କାରଖାନାକୁ ଉଦ୍ଘାଟନ କରିବେ। ଅପରାହ୍ନ ପ୍ରାୟ ଗୋଟାଏ ବେଳେ ସେ ବାରାଣସୀର ନମୋ ଘାଟ ଠାରେ ମୁଖ୍ୟ ଅତିଥି ଭାବରେ ବାୟୁସେନା ଦିବସ ବିମାନ ପ୍ରଦର୍ଶନୀ ଅବଲୋକନ କରିବେ।
ଏହା ପରେ, ପ୍ରଧାନମନ୍ତ୍ରୀ ଓଡ଼ିଶା ଗସ୍ତ କରିବେ ଏବଂ ଅପରାହ୍ନ ପ୍ରାୟ ୪:୪୫ ମିନିଟ୍ ସମୟରେ ସେ ଭୁବନେଶ୍ୱରରେ ଭାରତୀୟ ରିଜର୍ଭ ବ୍ୟାଙ୍କର ‘ଡାଟା ସେଣ୍ଟର’ ଏବଂ ‘ସାଇବର ସୁରକ୍ଷା ପ୍ରଶିକ୍ଷଣ ପ୍ରତିଷ୍ଠାନ’କୁ ଉଦ୍ଘାଟନ କରିବେ। ଏହି ଅବସରରେ ସେ ଉପସ୍ଥିତ ଜନସାଧାରଣଙ୍କୁ ଉଦ୍ବୋଧନ ମଧ୍ୟ ଦେବେ।
ବାରାଣସୀରେ ପ୍ରଧାନମନ୍ତ୍ରୀ
ପ୍ରଧାନମନ୍ତ୍ରୀ ଉତ୍ତର ପ୍ରଦେଶର ବାରାଣସୀରେ ‘ଅରବିନ୍ଦ ଲିମିଟେଡ୍’ର ଏକ ନୂତନ ପୋଷାକ ଉତ୍ପାଦନ କାରଖାନାକୁ ଉଦ୍ଘାଟନ କରିବେ। ଏହି କାରଖାନା ଭାରତର ବସ୍ତ୍ର ଓ ପୋଷାକ ଉତ୍ପାଦନ ବ୍ୟବସ୍ଥାକୁ ସୁଦୃଢ଼ କରିବା ଏବଂ ସ୍ଥାନ ଅଞ୍ଚଳରେ ଶିଳ୍ପ ବିକାଶକୁ ପ୍ରୋତ୍ସାହିତ କରିବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ।
ଆଧୁନିକ ଉତ୍ପାଦନ ପ୍ରକ୍ରିୟା ଉପରେ ଆଧାରିତ ଏହି କାରଖାନା, ବିଶେଷକରି ମହିଳାମାନଙ୍କ ପାଇଁ ନିଯୁକ୍ତିର ଉପଯୁକ୍ତ ସୁଯୋଗ ସୃଷ୍ଟି କରିବ ଏବଂ ସ୍ଥାନୀୟ ଅଞ୍ଚଳର ଆର୍ଥିକ ପ୍ରଗତିରେ ଯୋଗଦାନ ଦେବ। ଏହି ଉଦ୍ଘାଟନ ସହିତ ଶିଳ୍ପ ନିବେଶ ଏବଂ ଉତ୍ପାଦନ-ଭିତ୍ତିକ ବିକାଶ ପାଇଁ ଏକ କେନ୍ଦ୍ରସ୍ଥଳ ଭାବରେ ଉତ୍ତର ପ୍ରଦେଶର ସ୍ଥିତି ମଜବୁତ ହେବ। ବିଶ୍ୱବ୍ୟାପୀ ଗ୍ରାହକଙ୍କ ସଂଖ୍ୟାକୁ ଦୃଷ୍ଟିରେ ରଖି ବାରାଣସୀରେ ପ୍ରସ୍ତୁତ ସାମଗ୍ରୀ କିପରି ସମଗ୍ର ବିଶ୍ୱ ବଜାରରେ ପହଞ୍ଚିବ ସେ ଦିଗରେ ଏହି କାରଖାନା ପ୍ରମୁଖ ଭୂମିକା ଗ୍ରହଣ କରିବ । ମୁଖ୍ୟତଃ ମହିଳାମାନଙ୍କ ଦ୍ୱାରା ପରିଚାଳିତ ଏହି ଉଦ୍ୟୋଗ ‘ମହିଳା-ନେତୃତ୍ୱାଧୀନ ବିକାଶ’ର ଏକ ଶକ୍ତିଶାଳୀ ପ୍ରତୀକ ।
ପ୍ରଧାନମନ୍ତ୍ରୀ ବାରାଣସୀର ନମୋ ଘାଟ ଠାରେ ବାୟୁସେନା ଦିବସ ବିମାନ ପ୍ରଦର୍ଶନ-୨୦୨୬ ଦେଖିବେ। ଏହି କାର୍ଯ୍ୟକ୍ରମ ଭାରତୀୟ ବାୟୁସେନାର ୯୪ତମ ବାର୍ଷିକୀ ପାଳନ ଅବସରରେ ଆୟୋଜିତ ହେବ। ଏହା ‘‘ୱିଙ୍ଗସ୍ ଓଭର ଗଙ୍ଗେସ୍’’ ବାର୍ତ୍ତା ଉପରେ ଆଧାରିତ ହେବ।
ଏହି ବିମାନ ପ୍ରଦର୍ଶନରେ ତେଜସ୍, ଲାଇଟ୍ କମ୍ବାଟ୍ ହେଲିକପ୍ଟର (ଏଲସିଏଚ) ‘ପ୍ରଚଣ୍ଡ’, ଏସୟୁ-ଥାର୍ଟି ଏମକେଆଇ ଏବଂ ରାଫେଲ୍ ଭଳି ଯୁଦ୍ଧ ବିମାନ ସହିତ ପରିବହନ ବିମାନଗୁଡ଼ିକ ମଧ୍ୟ ସାମିଲ ହେବ। ଏଥିରେ ଭାରତୀୟ ନୌସେନା ଏବଂ ଭାରତୀୟ ସ୍ଥଳସେନାର ବିମାନଗୁଡ଼ିକ ମଧ୍ୟ ଅଂଶଗ୍ରହଣ କରିବେ, ଯାହା ବିଭିନ୍ନ ସେନାବାହିନୀ ମଧ୍ୟରେ ଥିବା ସମନ୍ୱୟ ଓ ମିଳିତ କାର୍ଯ୍ୟଦକ୍ଷତାକୁ ପ୍ରଦର୍ଶିତ କରିବ। ଭାରତୀୟ ବାୟୁସେନାର ପ୍ରମୁଖ ପ୍ରଦର୍ଶନ ଦଳ ଯଥା – ‘ସୂର୍ଯ୍ୟ କିରଣ ଏରୋବାଟିକ୍ ଟିମ୍’ ଏବଂ ‘ସାରଙ୍ଗ ହେଲିକପ୍ଟର ଡିସପ୍ଲେ ଟିମ୍’ ମଧ୍ୟ ଏହି କାର୍ଯ୍ୟକ୍ରମରେ ଭାଗ ନେବେ। ଏହି ପ୍ରଦର୍ଶନ ମାଧ୍ୟମରେ ସଠିକ୍ ଉଡ଼ାଣ କୌଶଳ, ଉତ୍ତମ ସମନ୍ୱୟ ଏବଂ କାର୍ଯ୍ୟକ୍ଷେତ୍ରରେ ଉତ୍କର୍ଷତା ପ୍ରଦର୍ଶିତ ହେବ।
ଭୁବନେଶ୍ୱରରେ ପ୍ରଧାନମନ୍ତ୍ରୀ
ପ୍ରଧାନମନ୍ତ୍ରୀ ଭୁବନେଶ୍ୱରରେ ଭାରତୀୟ ରିଜର୍ଭ ବ୍ୟାଙ୍କର ନୂତନ ଡାଟା ସେଣ୍ଟର ଏବଂ ସାଇବର ସୁରକ୍ଷା ପ୍ରଶିକ୍ଷଣ ପ୍ରତିଷ୍ଠାନକୁ ଉଦଘାଟନ କରିବେ । ଭାରତର ଆର୍ଥିକ ବ୍ୟବସ୍ଥାରେ ପ୍ରଯୁକ୍ତିର ଭିତ୍ତିଭୂମିକୁ ସୁଦୃଢ଼ କରିବାରେ ଏହା ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ। ଏଗୁଡ଼ିକ ବ୍ୟାଙ୍କର କମ୍ପ୍ୟୁଟିଂ ଆବଶ୍ୟକତା ପୂରଣ କରିବା ଏବଂ ବ୍ୟାଙ୍କ ଓ ବ୍ୟାପକ ଆର୍ଥିକ କ୍ଷେତ୍ର ପାଇଁ ଏକ ସୁରକ୍ଷିତ, ସ୍ଥିର, ବ୍ୟାପକ ଏବଂ ଭବିଷ୍ୟତ ପାଇଁ ପ୍ରସ୍ତୁତ କମ୍ପ୍ୟୁଟିଂ ଇକୋସିଷ୍ଟମ ପ୍ରଦାନ କରିବା ପାଇଁ ଡିଜାଇନ୍ କରାଯାଇଛି।
ଚାରୋଟି ଅତ୍ୟାଧୁନିକ ଡାଟା ସେଣ୍ଟର ଅନ୍ୟାନ୍ୟ ପ୍ରମୁଖ ପଦକ୍ଷେପ ସହିତ ମିଶନ-କ୍ରିଟିକାଲ୍ ପେମେଣ୍ଟ ଏବଂ ସେଟେଲମେଣ୍ଟ ସିଷ୍ଟମକୁ ପରିଚାଳନା କରିବ। ଏହି ସୁବିଧାକୁ ଅପଟାଇମ୍ ଇନଷ୍ଟିଚ୍ୟୁଟ୍ ଟାୟାର-୪ ମାନକ – ଡାଟା ସେଣ୍ଟର ଭିତ୍ତିଭୂମି ଲାଗି ବିଶ୍ୱ ମାନଦଣ୍ଡ – ପାଇଁ ପ୍ରମାଣିତ କରାଯାଇଛି। ଏହା ବିଶ୍ୱବ୍ୟାପୀ ବିଏଫଏସଆଇ (ବ୍ୟାଙ୍କିଂ, ଆର୍ଥିକ ସେବା ଏବଂ ବୀମା) କ୍ଷେତ୍ରରେ ସର୍ବବୃହତ ଟାୟାର -୪ ପ୍ରମାଣିତ ସୁବିଧା ମଧ୍ୟରୁ ଗୋଟିଏ। ଏହା ଡିଜିଟାଲ୍ ଆର୍ଥିକ ସେବାର ବିସ୍ତାର, ଦକ୍ଷତା ଏବଂ ନିର୍ଭରଯୋଗ୍ୟତାକୁ ବିସ୍ତାର କରିବାରେ ଯୋଗଦାନ କରିବ ଏବଂ ସୁରକ୍ଷିତ ଡିଜିଟାଲ୍ ଭିତ୍ତିଭୂମି ଗଠନ କରିବ ଯାହା ଉପରେ ଭାରତର ବର୍ଦ୍ଧିତ ପ୍ରଯୁକ୍ତି-ଚାଳିତ ଆର୍ଥିକ ଅର୍ଥବ୍ୟବସ୍ଥା ଅଭିବୃଦ୍ଧି କରିପାରିବ। ଏହା କେନ୍ଦ୍ରୀୟ ବ୍ୟାଙ୍କିଂ ସମ୍ପ୍ରଦାୟ ମଧ୍ୟରେ ଡିଜିଟାଲ୍ ଭିତ୍ତିଭୂମିରେ ଏକ ନେତୃତ୍ୱ ଭାବରେ ରିଜର୍ଭ ବ୍ୟାଙ୍କର ଅନନ୍ୟ ସ୍ଥିତିକୁ ମଜବୁତ କରିବାରେ ମଧ୍ୟ ସାହାଯ୍ୟ କରିବ।
ସାଇବର ସୁରକ୍ଷା ତାଲିମ ପ୍ରତିଷ୍ଠାନ କ୍ଷମତା ନିର୍ମାଣକୁ ବୃଦ୍ଧି କରିବ। ଏହା ସାଇବର ସୁରକ୍ଷା ଏବଂ ଉଦ୍ୟୋଗ-ପ୍ରଯୁକ୍ତିବିଦ୍ୟା ତାଲିମ ସହିତ ଗବେଷଣା ଏବଂ କ୍ଷେତ୍ରସ୍ତରୀୟ ଦକ୍ଷତା ବିକାଶ ପାଇଁ ଏକ ଉତ୍ସର୍ଗୀକୃତ ସଂସ୍ଥାଗତ ପ୍ଲାଟଫର୍ମ ପ୍ରଦାନ କରିବ। ଏହି ପ୍ରତିଷ୍ଠାନ କ୍ୱାଣ୍ଟମ୍ କମ୍ପ୍ୟୁଟିଂ, କୃତ୍ରିମ ବୁଦ୍ଧିମତ୍ତା ଏବଂ ଅନ୍ୟାନ୍ୟ ଆଗଧାଡ଼ିର ପ୍ରଯୁକ୍ତିବିଦ୍ୟା ସମେତ ବିଏଫଏସଆଇ କ୍ଷେତ୍ର ସହିତ ପ୍ରାସଙ୍ଗିକ ଅତ୍ୟାଧୁନିକ ପ୍ରଯୁକ୍ତି ଉପରେ ଧ୍ୟାନ ଦେବ।