ସମୀକ୍ଷା ବ୍ୟୁରୋ
ତଥାକଥିତ ୟୁରୋପୀୟ ସାଂସଦ ଦଳ ତାଙ୍କର କାଶ୍ମୀର ଗସ୍ତ ସାରିବା ପରେ ଯେଉଁ ସାମ୍ବାଦିକ ସମ୍ମିଳନୀ କଲେ, ସେଥିରେ ସେମାନେ ଦୁଇଟି କଥା କହିଲେ- ୧. କାଶ୍ମୀରର ଲୋକେ ନିଜକୁ ଭାରତୀୟ ବୋଲି ଭାବନ୍ତି ଓ ୨. ଏଠାରେ ପାକିସ୍ତାନ ପ୍ରାୟୋଜିତ ଆତଙ୍କବାଦ ଚାଲିଛି। ଏତକ ଜାଣିବା ଲାଗି ଆମକୁ ୟୁରୋପରୁ ଲୋକ ଆଣିବାକୁ ପଡୁଛି କି? ଆମେ ତ ବାରମ୍ବାର କହି ଆସିଛୁ, ଜାମୁ କାଶ୍ମୀର ହେଉଛି ଭାରତର ଅଭିନ୍ନ ଅଙ୍ଗ ଓ ପ୍ରତ୍ୟେକ କାଶ୍ମୀରବାସୀ ଆମ ନିଜଲୋକ। ଆମେ ଭାରତୀୟ ମାନେ ଯେଉଁ ଗଣତାନ୍ତ୍ରିକ ଅଧିକାର ଓ ସାମ୍ବିଧାନିକ ସୁରକ୍ଷା ପାଇଛୁ, ସମାନ ଅଧିକାର ଓ ସୁରକ୍ଷା କାଶ୍ମୀରବାସୀଙ୍କୁ ମଧ୍ୟ ମିଳୁ- ଏହାହିଁ ଆଜିର ମୂଳ ବିତର୍କ। ସେଥିରେ ଅନଧିକାର ଭାବରେ ଆସିଥିବା ୟୁରୋପୀୟ ସାଂସଦଙ୍କର ପ୍ରମାଣପତ୍ର କାହାକୁ ଦରକାର ପଡୁଛି? କାଶ୍ମୀରରେ ସରକାରୀ ଆତିଥ୍ୟ ପାଇ ଫେରିଥିବା ଓ ସରକାରଙ୍କ ଘେରାବନ୍ଦୀ ଭିତରେ ଗଣତନ୍ତ୍ରର ଅନୁଭବ ପାଇଥିବା ଏହି ସାଂସଦମାନଙ୍କୁ ଭାରତ ସରକାର ନିମନ୍ତ୍ରଣ କରି ନଥିଲେ। ଏମାନେ ୟୁରୋପୀୟ ୟୁନିଅନର ପ୍ରତିନିଧି ମଧ୍ୟ ନଥିଲେ। ଘରୋଇ ଭାବରେ ଏମାନଙ୍କୁ କେହି ଜଣେ ମାଦି ଶର୍ମା ନିମନ୍ତ୍ରଣ କରିଥିଲେ ବୋଲି ଜଣା ପଡିଛି।
ଏବେ ସବୁଠୁ ବଡ ପ୍ରଶ୍ନ ହେଉଛି କିଏ ଏହି ମାଦି ଶର୍ମା? ଭାରତ ସରକାରଙ୍କ ସହ ୟାଙ୍କର ସମ୍ପର୍କ କଣ? ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ତରଫରୁ ୟୁରୋପର ସାଂସଦମାନଙ୍କୁ କାଶ୍ମୀର ଭ୍ରମଣ ପାଇଁ ଆମନ୍ତ୍ରଣ ଜଣାଇବାକୁ ଏହାଙ୍କୁ ଅଧିକାର ଦେଲା କିଏ? ସବୁଠୁ ବଡ ପ୍ରଶ୍ନ ହେଉଛି ନିଜକୁ ଜଣେ ଆନ୍ତର୍ଜାତିକ ବ୍ୟବସାୟୀ ଦଲାଲ ବୋଲି ପରିଚୟ ଦେଉଥିବା ମାଦି ଶର୍ମାଙ୍କ ପ୍ରଧାନମନ୍ତ୍ରୀ କାର୍ୟାଳୟରେ ଏତେ ପ୍ରବେଶ କାହିଁପାଇଁ। ମାଦି ଶର୍ମାଙ୍କ କାମ କରିବାର ଶୈଳୀ ଓ ମୋଦୀ ସରକାରର ଅନ୍ଦର ମହଲରେ ତାଙ୍କର ଯାତାୟାତ ଦେଖି ୟୁପିଏ ଅମଳରେ ନୀରା ରାଡିଆଙ୍କ କଥା ମନେ ପଡୁଛି।ସେତେବେଳେ ନୀରା ରାଡିଆ ମନମୋହନ ସରକାରକୁ ନିଜର ଦୋକାନ ବୋଲି କହୁଥିଲେ। ଏବେ ମାଦି ଶର୍ମାଙ୍କ ଲାଗି ମୋଦୀ ସରକାର ହେଉଛି ତାଙ୍କର ଦୋକାନ।
କାଶ୍ମୀରକୁ କୌଣସି ଭାରତୀୟ ରାଜନେତା ଓ ମାନବାଧିକାର କର୍ମୀଙ୍କୁ ପ୍ରବେଶ ଅଧିକାର ମିଳୁନାହିଁ।କାଶ୍ମୀର ର ଜନ ସାଧାରଣ କାଶ୍ମୀର ବାହାରକୁ ବା ବିଦେଶ ଯିବାଲାଗି ଅନୁମତି ପାଉନାହାନ୍ତି। ପ୍ରବଳ ସେନାବାହିନୀର ଉପସ୍ଥିତି ସତ୍ତ୍ୱେ ନିରୀହ ଲୋକଙ୍କର ହତ୍ୟା ବନ୍ଦ ହେଉନାହିଁ। କାଲି ୟୁରୋପୀୟ ପ୍ରତିନିଧିମାନେ ଶ୍ରୀନଗରର ଖାଲି ରାସ୍ତାରେ “ସ୍ଵାଭାବିକତା” ପରଖୁଥିବା ବେଳେ ଆତଙ୍କବାଦୀଙ୍କ ଗୁଳିରେ ପାଞ୍ଚଜଣ ଶ୍ରମିକ ପ୍ରାଣ ହରାଇଛନ୍ତି। ଇତି ମଧ୍ୟରେ ତିନିମାସ ହେଲାଣି କାଶ୍ମୀର ଏକ ଜେଲଖାନା ପାଲଟିଥିବା ବେଳେ, ବିଭିନ୍ନ ଦଲାଲଙ୍କୁ ନେଇ କାଶ୍ମୀରରେ ଜମି ଦଲାଲି ଲାଗି ପଥ ପରିଷ୍କାର କରାଯାଉଛି।
