ସମୀକ୍ଷା ବ୍ୟୁରୋ
ମହାରାଷ୍ଟ୍ର ମହାନାଟକରେ ଯବନିକା ପଡ଼ିବାର ନାଁ ଧରୁନାହିଁ। କୁହାଯାଏ ଶତ୍ରୁର ଶତ୍ରୁ ମିତ୍ର ହୋଇଥା’ନ୍ତି। ସେହିପରି ରାଜନୀତିରେ କେହି ଶତ୍ରୁ ନୁହଁନ୍ତି କି କେହି ମିତ୍ର ନୁହଁନ୍ତି। ଏକଥାକୁ ପ୍ରମାଣିତ କରିଛି ଶିବସେନା । ମହାରାଷ୍ଟ୍ରରେ ସରକାରକୁ ନେଇ ଚାଲିଥିବା ମହାନାଟକ ଭିତରେ ଶିବସେନା ଆଜି ଭାରତୀୟ ଜାତୀୟ କଂଗ୍ରେସ ଦଳକୁ ନେଇ ନିଜର ଅଭିମତ ବଦଳାଇଛି। କଂଗ୍ରେସ ଶତ୍ରୁ ନୁହେଁ ବୋଲି କହିଛି ଶିବସେନା।ଇତିମଧ୍ୟରେ ମହାରାଷ୍ଟ୍ର ବିଧାନସଭାର କାର୍ଯ୍ୟକାଳ ସମାପ୍ତ ହୋଇଯାଇଛି। ଶିବସେନା ଓ ବିଜେପି ମଧ୍ୟରେ ଅଢେଇ ବର୍ଷିଆ ମୁଖ୍ୟମନ୍ତ୍ରୀତ୍ବକୁ ନେଇ ଝଗଡ଼ାର ଅବସାନ ଘଟିନଥିବାବେଳେ ଆଜି ଶିବସେନା ନିଜର ଆଭିମୁଖ୍ୟ ସ୍ପଷ୍ଟ କରିଛି । ଶିବସେନାର ନେତା ସଞ୍ଜୟ ରାଉତ ବିଜେପିକୁ ଟାର୍ଗେଟ୍ କରି କହିଛନ୍ତି ଯେ, ଶିବସେନା ସରକାର ଗଢିବାର ଦାୟିତ୍ବ ନେବାକୁ ପ୍ରସ୍ତୁତ ଅଛି। ଏତଦ୍ବ୍ୟତୀତ ଶିବସେନା କଂଗ୍ରେସ ପ୍ରତି ନିଜର ବିଚାରଧାରାକୁ ମଧ୍ୟ ସ୍ପଷ୍ଟ କରି କହିଛି ଯେ, କଂଗ୍ରେସ ସହିତ ରାଜନୈତିକ ମତଭେଦ ରହିଛି, କିନ୍ତୁ କଂଗ୍ରେସ ଶତ୍ରୁ ନୁହେଁ । ମହାରାଷ୍ଟ୍ରରେ ଚାଲିଥିବା ରାଜନୈତିକ ସମୀକରଣ ବେଶ୍ ଜଟିଳ ପରିସ୍ଥିତିରେ ପହଞ୍ଚିଛି। ଶିବସେନା ବିଜେପି ସହିତ ମେଣ୍ଟ ତୁଟାଇନଥିବାବେଳେ ଅନ୍ୟ ପଟେ କଂଗ୍ରେସ ଓ ଏନ୍ସିପି ସହ ମେଣ୍ଟ କରିବାକୁ ନେଇ ନିଜର ଆଭିମୁଖ୍ୟ ରଖୁଛି, ଅପରପକ୍ଷରେ ଏନ୍ସିପି ନିଜକୁ ବିରୋଧୀ କହୁଥିବାବେଳେ ତୃତୀୟ ବିକଳ୍ପ ପାଇଁ ରାଜି ଅଛି ବୋଲି କହିଛି। ଏପରିସ୍ଥିତିରେ ମହାରାଷ୍ଟ୍ରରେ ବିଜେପି କିପରି ସରକାର ଗଠନ କରିବ, ତାହା ଚର୍ଚ୍ଚାର ବିଷୟ। ଯଦିଓ ଏବେ ରାଜ୍ୟରେ ବିଜେପି ଏକକ ସଂଖ୍ୟା ଗରିଷ୍ଠ ଦଳ, ସରକାର ଗଠନ ଲାଗି ସଂଖ୍ୟା ଏହା ପାଖରେ ନାହିଁ ।
ଗତକାଲି ମହାରାଷ୍ଟ୍ର ରାଜ୍ୟପାଳ ବିଜେପି ଦଳକୁ ସରକାର ଗଠନ କରିବା ପାଇଁ ଆମନ୍ତ୍ରଣ କରିଛନ୍ତି। ଯେହେତୁ ବିଜେପି ବର୍ତ୍ତମାନ ଏକକ ସଂଖ୍ୟା ଗରିଷ୍ଠ ଦଳ ସେଥିପାଇଁ ତାଙ୍କୁ ସରକାର ଗଠନ ପାଇଁ ନିମନ୍ତ୍ରଣ କରାଯାଇଛି । ଗତ ଅକ୍ଟୋବର ୨୪ ତାରିଖରେ ନିର୍ବାଚନ ଫଳାଫଳ ପ୍ରକାଶ ପାଇଥିଲେ ମଧ୍ୟ ବିଜେପି ଓ ଶିବସେନା ମେଣ୍ଟ ମଧ୍ୟରେ ଫାଟ ଯୋଗୁଁ ସରକାର ଗଠନ ହୋଇପାରୁ ନାହିଁ। ଯଦି ଶିବସେନା କଂଗ୍ରେସ ସହିତ ମେଣ୍ଟ କରିବ, ତେବେ ରାଜନୀତିର ଇତିହାସରେ ଦୁଇ ପରସ୍ପର ବିଚାରକୁ ବିରୋଧ କରୁଥିବା ଦଳକୁ ଏକାଠି ଦେଖିବାକୁ ମିଳିବ। ଦୁହେଁ ପୂର୍ବ ପଶ୍ଚିମ ପରି । ରାଜନୈତିକ ଦୃଷ୍ଟିକୋଣରୁ ଦୁହିଁଙ୍କ ବିଚାରଧାରା ସମ୍ପୂର୍ଣ୍ଣ ଭିନ୍ନ। ତେବେ ବିରୋଧଭାବ ନେଇ ଏକାଠି ମେଣ୍ଟ ସରକାର ଗଢିବାରେ ଦୁହେଁ କେତେଦୂର ସଫଳ ହୋଇପାରିବେ, ତାହା ଚିନ୍ତାର ବିଷୟ।
ମହାରାଷ୍ଟ୍ର ରାଜନୀତିର ଜଟିଳ ସମୀକରଣର ପରିଣତି କ’ଣ ହେବ, ଏଥିରେ ଦୁଇ ବିରୋଧୀ ଏକାଠି ହେବେ, ନା ବିଜେପି ପୁଣି ଥରେ ନୂଆ ଚାଲ୍ ଚଲାଇ କ୍ଷମତା ଦଖଲ କରିବ, ତାହା ଦେଖିବା ଏବେ ରୋମାଞ୍ଚକର ହେବ। ଜନାଦେଶ ପାଇ ସରକାର ଗଠନ କରି ନ ପାରିବାର ଅସନ୍ତୋଷ ଭିତରେ ମହାରାଷ୍ଟ୍ର ରାଜନୀତିରେ କ’ଣ ପ୍ରଭାବ ପଡ଼ିବ, ତାହା ଆଗାମୀ ସମୟ କହିବ। ତେବେ ଏତିକି କୁହାଯାଇପାରେ ଭାରତୀୟ ରାଜନୀତିର କ୍ଷମତା ଯୁଦ୍ଧରେ କେବଳ କୂଟନୀତିର ବିଜୟ ହୋଇଛି।
