ସମୀକ୍ଷା ବ୍ୟୁରୋ
ମହାରାଷ୍ଟ୍ର ମୁଖ୍ୟମନ୍ତ୍ରୀ ଭାବରେ ଦେବେନ୍ଦ୍ର ଫଡନବିସ ଯେମିତି ଲୁଚା ଚୋରାରେ ଶପଥ ନେଇଥିଲେ, ମାତ୍ର ଅଶି ଘଣ୍ଟା ଭିତରେ ସେମିତି ତରବରିଆ ଭାବରେ ଇସ୍ତଫା ଦେଇଛନ୍ତି। ଫଡନବିସଙ୍କ ପୂର୍ବରୁ ଏହି ସବୁ ଘଟଣାର ମୁଖ୍ୟ ସୂତ୍ରଧର ଅଜିତ ପାୱାର ମଧ୍ୟ ଇସ୍ତଫା ଦେଇଥିଲେ। ଅଶି ଘଣ୍ଟା ଭିତରେ ବିଜେପିର ଯେଉଁ ଦାବି ଥିଲା, ତାହା ଫୁସ କରି ଯାଇଛି। ଆମେ ବିଧାନସଭାରେ ନିଶ୍ଚୟ ବହୁମତ ହାସଲ କରିବୁ ବୋଲି ଫୁଟାଣି ମାରୁଥିବା ବିଜେପି ନେତାମାନେ ହଠାତ ପଛଘୁଞ୍ଚା ଦେବାର କାରଣ କଣ? ମାନ୍ୟବର ସୁପ୍ରିମ କୋର୍ଟ ଯେତେବେଳେ ଆସନ୍ତାକାଲି ଅପରାହ୍ନ ପାଞ୍ଚଟା ସୁଦ୍ଧା ବହୁମତ ସାବ୍ୟସ୍ତ କରିବାକୁ କହିଲେ, ସେଥିରେ ଭୟଭୀତ ହୋଇ ବିଜେପି ମଇଦାନ ଛାଡି ପଳାଇଲା କେମିତି?
ମହାରାଷ୍ଟ୍ର ରାଜନୀତିରେ ଶରଦ ପାୱାର ନିଜର ପ୍ରଚଣ୍ଡ ପ୍ରଭାବକୁ ପୁଣିଥରେ ସାବ୍ୟସ୍ତ କରିଛନ୍ତି। ଏହି ବର୍ଷିଆନ ନେତାଙ୍କୁ ଚକ୍ରବ୍ୟୁହରେ ପକାଇବା ସହଜ ନୁହେଁ ଓ ବିଜେପିର ଆକ୍ରମଣକୁ ଥଣ୍ଡା ମିଜାଜରେ ପ୍ରତିହତ କରିବାର କଳା ତାଙ୍କୁ ଜଣା ବୋଲି ସେ ପ୍ରମାଣିତ କରିଛନ୍ତି। ଶିବସେନା ମଧ୍ୟ ଏ କ୍ଷେତ୍ରରେ ଅତ୍ୟନ୍ତ ପରିପକ୍ଵ ରାଜନୀତି କରିଛି। ବିଜେପି ଅଜିତ ପାୱାରଙ୍କୁ କିଣି ଗୋଟିଏ ଗୁଳିରେ ଦୁଇଟି ଶିକାର କରିବାକୁ ଚାହିଁଥିଲା। ଏନସିପିରେ ଫାଟ କରିବାର ଉଦ୍ଦେଶ୍ୟ ତ ବୁଝି ହେଉଥିଲା। ଏହାର ଭିତିରି ଉଦ୍ଦେଶ୍ୟ ଥିଲା ଶରଦ ପାୱାର ଓ ଶିବସେନା ଭିତରେ ଅବିଶ୍ଵାସ ସୃଷ୍ଟି କରିବା। ସେଥିପାଇଁ ଏନସିପି କୁ ରାଜ୍ୟସଭାରେ ପ୍ରଧାନମନ୍ତ୍ରୀଙ୍କ ପ୍ରଶଂସା, ସଂସଦରେ ମୋଦୀଙ୍କ ସହ ଶରଦ ପାୱାରଙ୍କ ସାକ୍ଷତ୍କାରର ପୃଷ୍ଠଭୂମି ତିଆରି କରା ଯାଇଥିଲା। ବିଜେପି ଅତ୍ୟନ୍ତ ଚତୁରତାର ସହିତ ଏ ବାର୍ତ୍ତା ଦେବାକୁ ଚାହୁଁଥିଲା ଯେ, ଶରଦ ପାୱାର ହିଁ ଅଜିତ ପାୱାରଙ୍କୁ ବିଜେପି ସହ “ଡିଲ” କରିବାକୁ ଗୋପନରେ ଦାୟିତ୍ଵ ଦେଇଛନ୍ତି।
ଶିବସେନା ଏହି ଜାଲରେ ଧରା ନ ପଡି ଶେଷ ପର୍ୟନ୍ତ ପାୱାରଙ୍କ ଉପରେ ଭରସା ରଖିଲା। ଏପରିକି ଅଜିତ ପାୱାରଙ୍କ ବିଶ୍ଵାସଘାତକତା ସତ୍ତ୍ୱେ ତାଙ୍କ ବିରୋଧରେ ଶିବସେନା ସଂଯତ ଭାବରେ ବୟାନ ରଖିଥିଲା। ବିଜେପିର ସବୁ ରଣନୀତି କୁ ଚତୁରତାର ସହିତ ବିଫଳ କରାଇବାରେ ଶରଦ ପାୱାର ପ୍ରମୁଖ ଭୂମିକା ନେଇଛନ୍ତି।
