କେଦାର ମିଶ୍ର
ଏ ବାବୁ ତାଙ୍କ ଶ୍ଵଶୁରଙ୍କ ସହିତ ବିଶ୍ଵାସଘାତକତା କରିଥିଲେ ଓ ତାଙ୍କୁ ପିଠିରେ ଛୁରି ମାରିଥିଲେ। ଏ ବାବୁ ମୋଠୁ ବିଶ୍ଵାସଘାତକତାରେ ବେଶ ବରିଷ୍ଠ। – ଏହା କୌଣସି ନାଟକର ସଂଳାପ ନୁହେଁ। ଏ ଦେଶର ସମ୍ମାନନୀୟ ପ୍ରଧାନମନ୍ତ୍ରୀ ଆନ୍ଧ୍ରପ୍ରଦେଶର ସମ୍ମାନନୀୟ ମୁଖ୍ୟମନ୍ତ୍ରୀ ଏନ.ଚନ୍ଦ୍ରବାବୁ ନାଇଡୁଙ୍କ ବିଷୟରେ ଏମିତି କିଛି ବକ୍ତବ୍ୟ ରଖିଛନ୍ତି।
ତାହାର ଉତ୍ତରରେ ଚନ୍ଦ୍ରବାବୁ ନାଇଡୁ କହିଛନ୍ତି- ଯେଉଁ ଲୋକ ତିନ ତଲାକକୁ ନେଇ ଭାଷଣ ଦେଉଛି, ସେ ଲୋକ ନିଜ ସ୍ତ୍ରୀ କୁ ଛାଡପତ୍ର ନଦେଇ ଅଲଗା ରହୁଛି। ଯଶୋଦା ବେନଙ୍କ ବିଷୟରେ ମୋଦୀ କଣ କହିବେ?
ଯଦି ଦେଶର ପ୍ରଧାନମନ୍ତ୍ରୀ ଓ ଗୋଟେ ରାଜ୍ୟର ମୁଖ୍ୟମନ୍ତ୍ରୀଙ୍କ ଭିତରେ ବିତର୍କର ସ୍ତର ହେଉଛି ଏୟା, ସେଥିରେ ରାଜନୀତିରେ ମର୍ଯାଦା ବୋଲି ସତରେ କିଛି ଅଛି ନା ନାହିଁ, ସେ ପ୍ରଶ୍ନ ପଚାରିବାକୁ ପଡିବ। ଦେଶର ସାମ୍ବିଧାନିକ ପଦ ପଦବୀରେ ଥିବା ନେତା ରାସ୍ତାଘାଟର ଗୁଣ୍ଡାଙ୍କ ଭଳି ଯଦି ଗାଳିଗୁଲଜ କରନ୍ତି, ତାହେଲେ ସାଧାରଣ କର୍ମୀଙ୍କଠାରୁ ଆମେ ଆଉ କଣ ଆଶା କରିବା। ଯେତେବେଳେ ଫେସବୁକ ବା ଟୁଇଟରରେ ବିଭିନ୍ନ ଦଳର କର୍ମୀମାନେ ନିମ୍ନସ୍ତରର ବିତର୍କ କରନ୍ତି ଆମେ ସେମାନଙ୍କୁ ଟ୍ରୋଲ ବୋଲି କହି ଆଡେଇ ଯାଇଥାଉ, ହେଲେ ପ୍ରଧାନମନ୍ତ୍ରୀ ଯଦି ଟ୍ରୋଲ ଠୁ ତଳକୁ ଖସି ଯାନ୍ତି, ସେଠି କାହାକୁ ଦୋଷ ଦେବା?
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଯାହାଙ୍କୁ ଆଜି ବିଶ୍ଵାସଘାତକ ବୋଲି କହୁଛନ୍ତି ସେଇ ଚନ୍ଦ୍ରବାବୁ ନାଇଡ଼ୁ ତାଙ୍କ ସରକାରର ସହଯୋଗୀ ଥିଲେ। ୨୦୧୪ ରୁ ୨୦୧୮, ଚାରି ବର୍ଷ ଧରି ନାଇଡୁଙ୍କ ତେଲୁଗୁ ଦେଶମା ପାର୍ଟି ଏନଡିଏ ର ସହଯୋଗୀ ଥିଲା ଓ ବିଭିନ୍ନ ସମୟରେ ନାଇଡୁଙ୍କୁ ମୋଦୀ ଉଚ୍ଛ୍ଵସିତ ପ୍ରଶଂସା ମଧ୍ୟ କରିଛନ୍ତି। ସହଯୋଗୀ ଥିବାବେଳେ ଯାହାଙ୍କୁ ଆପଣ ପ୍ରଶଂସାରେ ପୋତି ପକାଉଥିଲେ, ସେ ହଠାତ ଏତେ ଗନ୍ଧାଇଲେ କାହିଁକି? ଚନ୍ଦ୍ରବାବୁ ନାଇଡ଼ୁ ତାଙ୍କ ଶ୍ଵଶୁର ଏନ.ଟି.ରାମାରାଓଙ୍କ ସହ ବିଶ୍ଵାସଘାତକତା କରିଥିଲେ ଯଦି ଏକଥା କଣ ୨୦୧୪ ରେ ମୋଦୀ ଜାଣିନଥିଲେ? ଆଜି ଯାହାଙ୍କର ବିଶ୍ଵାସଘାତକତା କୁ ନେଇ ସର୍ବ ସାଧାରଣରେ ନିନ୍ଦା ଗାନ କରୁଛନ୍ତି, ସେ ଲୋକ ସହିତ ଏତେ ଘନିଷ୍ଠ ମିତ୍ରତା ଥିଲା କେମିତି? ତାପରେ ଚନ୍ଦ୍ରବାବୁ ନାଇଡୁ ବାଜପାୟୀଙ୍କ ସମୟରୁ ଏନଡିଏର ସହଯୋଗୀ ରହିଆସିଛନ୍ତି। ସେତେବେଳେ ତାଙ୍କ ବିଶ୍ଵାସଘାତକତା ଉପରେ ମଖମଲ କନା ଢଙ୍କା ହୋଇଥିଲା କି?
ସେହିପରି ମୋଦୀ ତାଙ୍କ ସ୍ତ୍ରୀ ଯଶୋଦାବେନଙ୍କୁ ଅସହାୟ କରି ଛାଡି ଦେଇଛନ୍ତି ବୋଲି ଚନ୍ଦ୍ରବାବୁ ନାଇଡୁ ୨୦୧୪ରେ ଜାଣିନଥିଲେ କି? ବନ୍ଧୁ ହେବା ଓ ବନ୍ଧୁତା ଭାଙ୍ଗିବା ରାଜନୀତିରେ ସାଧାରଣ ଘଟଣା। ତେବେ ବନ୍ଧୁତା ଭାଙ୍ଗିଗଲେ ନିହାତି ନିମ୍ନ ସ୍ତରକୁ ଓହ୍ଲାଇ ଗାଳିଗୁଲଜ କରିବା କୌଣସି ଭଲ ମଣିଷର ଲକ୍ଷଣ ନୁହେଁ। ଏପ୍ରକାର ଘଟଣା ବିହାର ବିଧାନସଭା ନିର୍ବାଚନ ଆଗରୁ ମଧ୍ୟ ଦେଖିବାକୁ ମିଳିଥିଲା। ବିହାର ନିର୍ବାଚନ ପ୍ରଚାର ସମୟରେ ସେତେବେଳେ ବିଜେପିର ବିରୋଧୀଥିବା ନୀତିଶ କୁମାରଙ୍କ ବିରୋଧରେ ପ୍ରଧାନମନ୍ତ୍ରୀ ମୋଦୀ ଅତି ନିମ୍ନସ୍ତରର ସମାଲୋଚନା କରିଥିଲେ। ତେବେ ସେଇ ଡିଏନଏ ଖରାପ ଥିବା ନୀତିଶା କୁମାର ଏବେ ମୋଦୀଙ୍କର ପରମ ମିତ୍ର ହୋଇ ବସିଛନ୍ତି। ଲୋକଙ୍କ ଆଗରେ ଶତ୍ରୁତା ର ନାଟକ ଦେଖାଇ ରାଜନୈତିକ ଅଭିସନ୍ଧି ରଖି ଯେତେବେଳେ ରାଜନେତାମାନେ ପୁଣି ପରସ୍ପରକୁ କୋଳାଇ ନିଅନ୍ତି, ସେଠି ସେମାନଙ୍କୁ ତ ଲାଜ ଲାଗେନାହିଁ, କିମ୍ବା ରାଜନେତାଙ୍କ ଭକ୍ତମାନେ ମଧ୍ୟ ଲଜ୍ଜିତ ହୁଅନ୍ତି ନାହିଁ।
ଚନ୍ଦ୍ରବାବୁ ନାଇଡୁଙ୍କ ଶ୍ଵଶୁର ଏନ.ଟି.ରାମାରାଓ(୨୮,ମଇ,୧୯୨୩-୧୮,ଜାନୁଆରୀ,୧୯୯୬) ମରିବାର ୨୩ ବର୍ଷ ବିତି ଗଲାଣି। ଏନଟିଆର ନିଜର ବୃଦ୍ଧାବସ୍ଥାରେ ଲକ୍ଷ୍ମୀ ପାର୍ବତୀ ନାମ୍ନୀ ଜଣେ ତରୁଣୀଙ୍କୁ ବିବାହ କରିଥିଲେ। ତେଲୁଗୁ ଦେଶମ ପାର୍ଟି ର ନେତୃତ୍ୱ ଓ ଏନଟିଆର ପରିବାର ଏହି ବିବାହକୁ ଗ୍ରହଣ କରିପାରିନଥିଲେ। ଯାହାର ପରିଣତି ସ୍ଵରୂପ ଏନଟିଆରଙ୍କୁ ମୃତ୍ୟୁ ପୂର୍ବରୁ ଅପଦସ୍ତ ହେବାକୁ ପଡିଥିଲା। ଲକ୍ଷ୍ମୀ ପାର୍ବତୀ ଓ ରାଓ ପରିବାର ଭିତରେ ଚାଲିଥିବା ଝଗଡାରୁ ଶେଷରେ ତେଲୁଗୁ ଦେଶମର ନେତୃତ୍ୱ ଚନ୍ଦ୍ରବାବୁ ନାଇଡୁଙ୍କ ହାତକୁ ଆସିଥିଲା। ଏମିତି ଦେଖିଲେ ଏନଟିଆରଙ୍କ ସହିତ କେବଳ ଜୋଇଁ ଚନ୍ଦ୍ରବାବୁ ବିଶ୍ଵାସଘାତକତା କରିନଥିଲେ, ତାଙ୍କର ୮ ପୁଅ ଓ ୪ ଝିଅଙ୍କ ପରିବାର ଏନଟିଆରଙ୍କୁ ଛାଡିଥିଲେ।
ବିଜେପି ସହିତ ଏନଟିଆରଙ୍କ ଉତ୍ତରାଧିକାର ପ୍ରସଙ୍ଗରେ ବହୁ ରୋଚକ ଓ ମଜା ତଥ୍ୟ ବୋଧେ ନରେନ୍ଦ୍ର ମୋଦୀ ଜାଣିନାହାନ୍ତି। ୧୯୯୬ ରେ ଏନଟିଆର ମୃତ୍ୟୁବରଣ କଲାପରେ ତାଙ୍କର ତରୁଣୀ ବିଧବା ପତ୍ନୀ ଲକ୍ଷ୍ମୀ ପାର୍ବତୀ ବିଜେପି ସହାୟତାରେ ନିର୍ବାଚନ ଲଢି ହାରିଥିଲେ। ପରବର୍ତ୍ତୀ ସମୟରେ ବିଜେପି ଲକ୍ଷ୍ମୀ ପାର୍ବତୀଙ୍କୁ ଛାଡି ଚନ୍ଦ୍ରବାବୁ ନାଇଡୁଙ୍କ ସହାୟତାରେ କେନ୍ଦ୍ରରେ ସରକାର ଗଢିଥିଲା। ୧୯୯୬ ରୁ ନିରନ୍ତର ଭାବରେ ଚନ୍ଦ୍ରବାବୁ ବିଜେପିକୁ ସମର୍ଥନ କରି ଆସିଛନ୍ତି। ଆଜି ହଠାତ ତାଙ୍କର ବିଶ୍ଵାସଘାତକତାର କାହାଣୀ ମନେ ପଡିବାର କାରଣ କଣ ହୋଇପାରେ?
ଆମ ରାଜନୀତିରେ ଏଣିକି ନିମ୍ନ ରୁଚି ଓ ଅଶ୍ଳୀଳ ଭାଷାର ଭାଷଣ ଅତି ସାଧାରଣ ଘଟଣା ପାଲଟିଯିବ। ଦେଶର ପ୍ରଧାନମନ୍ତ୍ରୀ ଯଦି ବିରୋଧିଦଳନେତାଙ୍କ ବାପା, ଜେଜେବାପା, ମା, ଶ୍ଵଶୁର ଓ ସପ୍ତପୁରୁଷଙ୍କ କଥା ନିର୍ବାଚନ ସଭାରେ ଉଛାଳିବେ, ବିରୋଧୀ ତାଙ୍କ ସ୍ତ୍ରୀ ସହ ହୋଇଥିବା ବିଶ୍ଵାସଘାତକତା ର କାହାଣୀ ଉଠାଇବେ ନାଇଁ କାହିଁକି?
ଚନ୍ଦ୍ରବାବୁ ନାଇଡୁ ଓ ନରେନ୍ଦ୍ର ମୋଦୀଙ୍କ ଭିତରେ ଗତକାଲିର ବାକ୍ୟ ବିନିମୟକୁ ଆମେ ଆଗାମୀ ନିର୍ବାଚନର ଏକ ଟ୍ରେଲର ଭାବେ ନେଇପାରିବା। ଆଗକୁ ବୋଧହୁଏ ଆହୁରି କଦର୍ଜ୍ୟ ବାକ୍ୟ ସବୁ ଆମକୁ ଶୁଣିବାକୁ ମିଳିପାରେ। ଘୁଷୁରି ଲଢେଇ ଓ ନିର୍ବାଚନ ଲଢେଇର ସ୍ତର ବୋଧେ ଆମ ଦେଶରେ ଏକା କଥା ପାଲଟି ଯାଉଛି।
