କେଦାର ମିଶ୍ର
ନିଜ ବିରୋଧୀଙ୍କୁ ପାକିସ୍ତାନ ସପକ୍ଷବାଦୀ ବୋଲି କହି ଆକ୍ରମଣ କରିବାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କର ପୁରୁଣା ଅଭିଜ୍ଞତା ଅଛି। ଗୁଜରାଟ ବିଧାନସଭା ନିର୍ବାଚନ ସମୟରେ ସେ ଦେଶର ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂଙ୍କୁ ମଧ୍ୟ ଏ ପ୍ରକାର ସମାଲୋଚନା କରିଥିଲେ ଓ ସଂସଦରେ କଥାକୁ ବଦଳାଇ ଦେଇଥିଲେ। ଯେହେତୁ ପ୍ରଧାନମନ୍ତ୍ରୀ ଓ ତାଙ୍କର ପ୍ରଧାନ ସେନାପତି ଏ ପ୍ରକାର ଭାଷା ପ୍ରୟୋଗ କରନ୍ତି, ସେହି କାରଣରୁ ତାଙ୍କର ଭକ୍ତ ଓ ବିଜେପିର ଟ୍ରୋଲ ବାହିନୀ ସେଇ କଥାକୁ ବଢେଇ ଚଢେଇ ପ୍ରଚାର କରନ୍ତି। ପୁଲବାମା ରେ ହୋଇଥିବା ଆତ୍ମଘାତି ଆକ୍ରମଣର ୧୧ଦିନ ପରେ ଏହି ଘଟଣାକୁ ନେଇ ନିଜର ବିଫଳତା ସ୍ଵୀକାର କରିବା ପରିବର୍ତ୍ତେ ପ୍ରଧାନମନ୍ତ୍ରୀ ଏହାର ପୃଷ୍ଟଭୂମିରେ ନିଜର ବିରୋଧୀମାନଙ୍କୁ ଆକ୍ରମଣ କରିବା ଆରମ୍ଭ କରିଛନ୍ତି। ବିଜେପିର ଜାତୀୟ ସଭାପତି ଚିରାଚରିତ ଢଙ୍ଗରେ ଏଥିଲାଗି ଦେଶର ପ୍ରଥମ ପ୍ରଧାନମନ୍ତ୍ରୀ ନେହେରୁଙ୍କୁ ଦାୟୀ ବୋଲି କହିବାକୁ ଲଜ୍ଜା ଅନୁଭବ କରିନାହାନ୍ତି। ତେବେ ବିଜେପିର ରଣନୀତି ହେଉଛି ସବୁବେଳେ ସେୟା। ଇଂରାଜୀରେ ଗୋଟେ କଥା ଅଛି, Offense is the best policy to defense । ଏକଥା ବିଜେପି ନିଜର ରଣନୀତିରେ ସବୁବେଳେ କାର୍ଯ୍ୟକାରୀ କରିଆସିଛି। କ୍ଷମତାରେ ନିଜେ ରହି ଦେଶର ସୁରକ୍ଷା କ୍ଷେତ୍ରରେ ହୋଇଥିବା ଭୁଲ ର ଉତ୍ତର ଦାୟିତ୍ଵ ବିରୋଧୀଙ୍କ ମୁଣ୍ଡରେ ଗଡାଇଦେବାର ଚମତ୍କାର କୌଶଳ ବିଜେପି ଜାଣିଛି। ଏହି କୌଶଳରେ ବିଜେପି ନିଜର ଭକ୍ତ ମାନଙ୍କୁ ବେଶ ଭଲ ଭାବରେ ବ୍ୟବହାର କରେ। ଭକ୍ତ ମାନେ ଦିନ କୁ ରାତି ଓ ରାତିକୁ ଦିନ ବୋଲି ମାନିନେବାରେ କୁଣ୍ଠିତ ହୁଅନ୍ତି ନାଇଁ। ହେଲେ ଦେଶର ପ୍ରମୁଖ ଗଣମାଧ୍ୟମ ଗୁଡିକ ଯଦି ଭକ୍ତଙ୍କ ପରି ବ୍ୟବହାର ପ୍ରଦର୍ଶନ କରନ୍ତି, ତାହେଲେ ସେଠି ଦେଶର ଗଣତନ୍ତ୍ର ବିପନ୍ନ ହୋଇଥାଏ।
ତେବେ କିଛି ଗଣମାଧ୍ୟମ ଏ ଭାବପ୍ରବଣତା ଓ ଭକ୍ତିର ପ୍ରବାହରୁ ଆଜି ମଧ୍ୟ ନିଜକୁ ମୁକ୍ତ ରଖି ଆସିଛନ୍ତି। ବିଜେପି ଭକ୍ତ ଓ ସରକାରୀ ଦଳର ପ୍ରବଳ ଚାପ ସତ୍ତ୍ୱେ ଆଜି ମଧ୍ୟ କିଛି ଇଂରାଜୀ ସଂବାଦପତ୍ର ଓ ଗୋଟେ ଦୁଇଟି ଟେଲିଭିଜନ ଚ୍ୟାନେଲ ସରକାର ତଥା ପ୍ରଧାନମନ୍ତ୍ରୀଙ୍କୁ କଠୋର ପ୍ରଶ୍ନ ପଚାରି ଚାଲିଛନ୍ତି। ଏ ପ୍ରକାର ନିଷ୍ଠାପର ଗଣମାଧ୍ୟମ ଭିତରେ ସବୁଠୁ ଆଗରେ ଅଛି କଲିକତାରୁ ପ୍ରକାଶ ପାଉଥିବା ‘ଦି ଟେଲିଗ୍ରାଫ’ ସଂବାଦପତ୍ର। ସରକାରକୁ କାଠଗଡାରେ ଠିଆ କରୁଥିବା ଭଳି ଶୀର୍ଷକ ଛାପିବାରେ ଦି ଟେଲିଗ୍ରାଫର ଅଗ୍ରଣୀ ଭୂମିକା ରହିଛି। ଗତ ୨୩, ଫେବୃୟାରୀ ୨୦୧୯ ଦି ଟେଲିଗ୍ରାଫର ର ସକାଳ ସଂସ୍କରଣରେ ଗୋଟେ ଚମତ୍କାର ଫଟୋ ଫିଚର ପ୍ରକାଶ ପାଇଛି। ଖବର କାଗଜର ଶୀର୍ଷରେ ଥିବା ଏ ଫୋଟୋ ଫିଚରର ଶିରୋନାମା ଟିକେ ଲମ୍ବା। “ଧିକ, ତମକୁ ହେ ଦେଶଦ୍ରୋହୀମାନେ! ଫେବୃଆରୀ ୧୪ ପରଠୁ ପ୍ରଧାନମନ୍ତ୍ରୀଙ୍କ ଶୋକକୁ ନେଇ ତମେ ସନ୍ଦେହ କରିପାରୁଛ କେମିତି? ଦେଖ, ସେଦିନଠୁ ସେ ପ୍ରତିଦିନ କେବଳ କଳା ପୋଷାକ ଇ ପିନ୍ଧୁଛନ୍ତି” । “ ( Shame on you anti nationals! How can you question PM’s sense of grief since February 14? Almost every single day since then, he has been wearing black.)
ଏହି ଶୀର୍ଷକ ତଳକୁ ରହିଛି ପ୍ରଧାନମନ୍ତ୍ରୀଙ୍କ ବିଭିନ୍ନ ପୋଷାକରେ ଓ ପ୍ରଚୁର ଆନନ୍ଦମୟ ବଦନରେ ୯ ଟି ଫଟୋଗ୍ରାଫ। ୧୫ ଫେବ୍ରୁଆରି ରୁ କ୍ରମାନ୍ଵୟରେ ଫେବ୍ରୁଆରି ୨୩ ତାରିଖ ପର୍ୟନ୍ତ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବିଭିନ୍ନ ସାଧାରଣ ସଭା ଓ ସରକାରୀ କାର୍ଯ୍ୟକ୍ରମରେ ଭଳିକି ଭଳି ପୋଷାକ ପିନ୍ଧିବା ସହିତ ବେଶ ହସ ହସ ଲାଗୁଛନ୍ତି। ତାଙ୍କ ମୁହଁରେ ଦୁଃଖର କୌଣସି ଚିହ୍ନ ନାଇଁ। ଏହାକୁ ନେଇ ଦି ଟେଲିଗ୍ରାଫ ବେଶ କଟାକ୍ଷ କରିଛି। ଅନ୍ୟମାନଙ୍କ ଶୋକପ୍ରକାଶ କରିବାର ଢଙ୍ଗକୁ ନେଇ ପ୍ରଶ୍ନଚିହ୍ନ ଲଗାଉଥିବା ବିଜେପି ନିଜର ମୁଖ୍ୟ ନେତାଙ୍କ ଏ ଛବି ସବୁକୁ ନେଇ କଣ ବା ଉତ୍ତର ରଖିବ? ପ୍ରଧାନମନ୍ତ୍ରୀ ତାଙ୍କ ଅନ୍ତରର ନିଆଁ ଓ କ୍ରୋଧକୁ ଜ୍ବାଳାମୟୀ ଭାଷଣ ମାଧ୍ୟମରେ ବ୍ୟକ୍ତ କରୁଛନ୍ତି, ହେଲେ ତାଙ୍କ ବ୍ୟକ୍ତିଗତ ସଉକୀ ତାହା ଦ୍ୱାରା ପ୍ରଭାବିତ ହେଉନାହିଁ। ମୋଦୀ ନିଜର ଷ୍ଟାଇଲ ଷ୍ଟେଟମେଣ୍ଟ ଓ ଫେସନ କୁ ନେଇ ପୁଲବାମା ପରବର୍ତ୍ତୀ ସମୟରେ ଟିକେ ବି ବଦଳି ନାହାନ୍ତି। ତେବେ ଏହା ଯେ ରାଜନୀତିର ଏକ ବଡ ପ୍ରସଙ୍ଗ ତାହା ନୁହେଁ। କିନ୍ତୁ ବିଜେପିର ନିଜସ୍ଵ ରାଜନୈତିକ ଅଭିରୁଚି ଅନୁସାରେ ଏହା ଆଦୌ ଦେଶପ୍ରେମୀର ଲକ୍ଷଣ ନୁହେଁ। ଦେଶର ବୀର ଯବାନ ଶହୀଦ ହେଉଥିବାବେଳେ ପ୍ରଧାନମନ୍ତ୍ରୀ ଫେସନରେ ମାତିବାଟା ବିଜେପିର ନିଜସ୍ଵ ଯୁକ୍ତିରେ ଏକ ପ୍ରକାର ଦେଶଦ୍ରୋହ। (ବେଚାରା ଶିବରାଜ ପାଟିଲ, ମୁମ୍ବାଇ ଆକ୍ରମଣ ଘଟନା ପରେ ପୋଷାକ ବଦଳେଇଥିଲେ ବୋଲି ତାଙ୍କର ମନ୍ତ୍ରୀ ପଦ ଚାଲି ଯାଇଥିଲା।) ହେଲେ ମୋଦୀ ଏ ଦେଶର ଏକମାତ୍ର ପ୍ରଧାନମନ୍ତ୍ରୀ ଯିଏ ଭଗବାନଙ୍କ ସହ ସମକକ୍ଷ ! ଅନ୍ୟ ପ୍ରଧାନମନ୍ତ୍ରୀଙ୍କର ଅନୁଗାମୀ ଓ ସହଯୋଗୀ ବହୁତ ଥିଲେ ହେଲେ ମୋଦୀଙ୍କର ଭକ୍ତ ସଂଖ୍ୟା ପ୍ରବଳ। ଏମାନଙ୍କ ସଂଖ୍ୟା ଯଦିଓ ଗାଣିତିକ ଭାବରେ ଦେଶର ଲୋକସଂଖ୍ୟାରୁ ୨-୩% ହେବ, ତଥାପି ଏମାନେ ନିଜକୁ ଭାରତ ବୋଲି ମନେ କରନ୍ତି। ଅନ୍ୟ କେହି କେମିତି ବସୁଛି, କେମିତି ହସୁଛି, କଣ ପିନ୍ଧ୍ହୁଛି, କଣ ଖାଉଛି ର ଆକଳନ କରି ତାର ଦେଶପ୍ରେମୀ ହେବାର ପ୍ରମାଣ ମୋଦିଭକ୍ତ/ଭାଟମାନେ ଖୋଜନ୍ତି, ହେଲେ ତାଙ୍କ ନିଜ ମହାପ୍ରଭୁ ଯେ ଶହୀଦଙ୍କ ଶୋକ ପାଳନ ବେଳେ କେମିତି ଆସନ୍ତି, ସେତକ କହିଦେଲେ ଭକ୍ତମାନେ ଆପଣଙ୍କ ତଣ୍ଟି ଉପରେ ବସିପଡିବେ।
ତେବେ ଏ ଲେଖାଟିରେ ଯାହା ଆମେ ଲେଖିଛୁ, ତାହା କେବଳ ଦି ଟେଲିଗ୍ରାଫ ନାମକ ଖବର କାଗଜର ବିବରଣୀ ମାତ୍ର। ତେଣୁ ଆମ୍ଭ ଉପରେ ଆକ୍ରମଣ କରିବାକୁ ଚାହୁଁଥିବା ଭକ୍ତଙ୍କୁ ଅନୁରୋଧ ସେମାନେ କୋଲକାତା ଯାଇ ଆନନ୍ଦ ବଜାର ପତ୍ରିକା ଅଫିସ ଆଗରେ ନିଜର ଭକ୍ତି ଓ ଭାବ ପ୍ରବଣତା ପ୍ରଦର୍ଶନ କରନ୍ତୁ। ଆମ୍ଭେ ଦି ଟେଲିଗ୍ରାଫ ର ଲେଖାକୁ ଉଦ୍ଧାର କରିଛୁ ମାତ୍ର!!
