ନୂଆଦିଲ୍ଲୀ, ପ୍ରଥମ ଥର ପାଇଁ ଦେଶ ଏବର୍ଷ ଅଗଷ୍ଟ 15ରେ ଦେଖିବ ଭିନ୍ନ ଧରଣର ସ୍ବାଧୀନତା ଦିବସ ସମାରୋହ। ଦେଶର ଇତିହାସରେ ଐତିହାସିକ ଲାଲକିଲ୍ଲାରେ ସମ୍ପୂର୍ଣ୍ଣ ଭିନ୍ନ ଢଙ୍ଗରେ ପାଳନ ହେବ ସ୍ବାଧୀନତା ଦିବସ ସମାରୋହ। କୋଭିଡ-19 ମହାମାରୀ ଦୃଷ୍ଟିରୁ ଦେଶର ଜାତୀୟ ରାଜଧାନୀରେ ଆଗାମୀ ସ୍ବାଧୀନତା ଦିବସ ସମାରୋହକୁ କାଣ୍ଟଛାଣ୍ଟ କରାଯିବାକୁ ଆପାତତଃ ସ୍ଥିର ହୋଇଥିବା ଜଣାଯାଇଛି।
ବିଗତ ବର୍ଷ ତୁଳନାରେ ଏବର୍ଷ ମାତ୍ର 20 ପ୍ରତିଶତ ଭିଭିଆଇପି ଏବଂ ଅନ୍ୟାନ୍ୟ ଅତିଥି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଭାଷଣ ଶୁଣିବାକୁ ଲାଲକିଲ୍ଲାରେ ଉପସ୍ଥିତ ରହିବେ।
ପ୍ରତିରକ୍ଷା ସଚିବ ଅଜୟ କୁମାର ଏବଂ ଏଏସଆଇ ମହା ନିର୍ଦେଶକ ସ୍ଥିତି ସମ୍ପର୍କରେ ଅବଗତ ହେବା ପାଇଁ ଗତ ସପ୍ତାହରେ ଲାଲକିଲ୍ଲା ପରିଦର୍ଶନ କରିଥିଲେ। ସାମାଜିକ ଦୂରତାକୁ ଦୃଷ୍ଟିରେ ରଖି ବ୍ୟବସ୍ଥା ଗ୍ରହଣ କରିବାକୁ ପ୍ରତିରକ୍ଷା ସଚିବ ସମ୍ପୃକ୍ତ ଅଧିକାରୀମାନଙ୍କୁ ପରାମର୍ଶ ଦେଇଛନ୍ତି।
କରୋନା କାରଣରୁ ଏବର୍ଷ ସମାରୋହରେ ସବୁ କିଛି କାର୍ଯ୍ୟକ୍ରମରେ ପରିବର୍ତ୍ତନ କରାଯାଇଛି। ଲାଲକିଲ୍ଲା ସମାରୋହରେ କୌଣସି ଛାତ୍ରଛାତ୍ରୀ, ଏନସିସି କ୍ୟାଡେଟ ଯୋଗ ଦେବେନାହିଁ। ଭିଭିଆଇପି ମାନେ ସବୁବର୍ଷ ପରି ଲାଲକିଲ୍ଲାର ସମ୍ମୁଖ ଭାଗରେ, ଯେଉଁଠି ପ୍ରଧାନମନ୍ତ୍ରୀ ଭାଷଣ ଦେବେ ସେଠି ବସି ପାରିବେ ନାହିଁ। ପ୍ରାୟ 900 ଭିଭିଆଇପି ଆଗରୁ ଲାଲକିଲ୍ଲା ଉପରେ ଦୁଇ ପାର୍ଶ୍ବରେ ବସୁଥିଲେ। ଏଥର କଟକଣା ଯୋଗୁଁ ସେମାନଙ୍କୁ ତଳେ ବସିବାକୁ ପଡିବ। 900 ବଦଳରେ ମାତ୍ର 100 ଜଣ ଭିଭିଆଇପିଙ୍କୁ ଅନୁମତି ମିଳିବ।
ସବୁଠାରୁ ଉଲ୍ଲେଖନୀୟ ବିଷୟ ହେଲା କରୋନା ରୋଗରୁ ସୁ୍ସ୍ଥ ହୋଇଥିବା 1500 ଯୋଦ୍ଧା ଏଥର ସମାରୋହରେ ଯୋଗଦେବେ। ଏମାନଙ୍କ ମଧ୍ୟରୁ 500 ସ୍ଥାନୀୟ ପୋଲିସ ଏବଂ ଅନ୍ୟ ହଜାରେ ଜଣ ଦେଶର ବିଭିନ୍ନ ଭାଗରୁ ଆସିବେ। ପ୍ରତିବର୍ଷ ଅତି କମରେ 10 ହଜାର ଲୋକ ପ୍ରଧାନମନ୍ତ୍ରୀଙ୍କ ଭାଷଣ ଶୁଣିବାକୁ ସ୍ବାଧୀନତା ସମାରୋହରେ ଯୋଗ ଦେଇ ଆସୁଥିଲେ। ସାଧାରଣ ଲୋକଙ୍କ ସ୍ଥାନରେ 1500 କରୋନା ଯୋଦ୍ଧା ଏଥର ସମାରୋହରେ ଯୋଗଦେବେ।
