କାନପୁର : କାନପୁରରୁ ତିନି ଯୁବତୀଙ୍କ ଅଜବ ପ୍ରେମ କାହାଣୀ ସାମ୍ନାକୁ ଆସିଛି । ଜଣେ ଅନ୍ୟଜଣଙ୍କ ପ୍ରେମରେ ପାଗଳ ହୋଇ ତିନିଜଣ ଯୁବତୀ ଘର ପରିବାର ଛାଡି ଫେରାର ହୋଇଛନ୍ତି । ତେବେ ତିନି ଯୁବତୀଙ୍କୁ ପୋଲିସ୍ ଗାଜିଆବାଦରୁ ଉଦ୍ଧାର କରିଥିବାବେଳେ ଦୁଇଜଣ ବିବାହ କରିବାକୁ ଜିଦ୍ରେ ରହିଛନ୍ତି ।
ମିଳିଥିବା ସୂଚନା ଅନୁସାରେ ଚକେରୀ ଥାନା ଅଞ୍ଚଳରେ 20 ବର୍ଷୀୟ ଯୁବତୀ ସେପ୍ଟେମ୍ବର 2 ତାରିଖରେ ନିଖୋଜ ରହିଥିଲେ । ଏନେଇ ତାଙ୍କ ପରିବାର ଲୋକେ ପୋଲିସ୍ରେ ଅଭିଯୋଗ କରିଥିଲେ । ପୋଲିସ୍ ଏହି ଘଟଣାର ଯାଞ୍ଚ କରି ନିଖୋଜ ଯୁବତୀଙ୍କୁ ଖୋଜିଥିଲା । ଗାଜିଆବାଦଠାରୁ ପୋଲିସ୍ ଯୁବତୀଙ୍କ ଲୋକେସନ୍ ପାଇଥିଲା । ପୋଲିସ୍ ସେଠାରୁ ଏକା ସାଙ୍ଗରେ ତିନି ଯୁବତୀଙ୍କୁ ଉଦ୍ଧାର କରିଥିଲା । ତିନି ଯୁବତୀଙ୍କୁ ନେଇ ଚକେରୀ ଥାନା ଆଣିଥିଲେ । ତିନି ଯୁବତୀଙ୍କ ମଧ୍ୟରୁ ଦୁଇଜଣ କାନପୁରର ହୋଇଥିବାବେଳେ ଅନ୍ୟ ଜଣେ ଲକ୍ଷ୍ନୌର ବୋଲି ସୂଚନା ରହିଛି । ତିନି ଯୁବତୀଙ୍କ ମଧ୍ୟରୁ ଜଣେ ଯୁବତୀଙ୍କୁ ତାଙ୍କ ପରିବାର ଲୋକେ ବୁଝାଇଶୁଝାଇ ଘରକୁ ନେଇଥିବାବେଳେ ଅନ୍ୟ ଦୁଇ ଯୁବତୀ ଏକାଠି ରହିବାକୁ ଜିଦ୍ ଧରିଥିଲେ । ଏନେଇ ଥାନାରେ ବେଶ୍ ହାଇଡ୍ରାମା ଚାଲିଥିଲା ।
ୟୁପିରେ ଯୁବତୀଙ୍କ ମଧ୍ୟରେ ପ୍ରେମ ପ୍ରସଙ୍ଗ ମାମଲା ଏହା ପ୍ରଥମ ନୁହେଁ । ଅଗଷ୍ଟ ମାସରେ ମଧ୍ୟ ଠିକ୍ ଏହିପରି ଏକ ମାମଲା ଅଯୋଧ୍ୟାରୁ ଆସିଥିଲା । (ଏଜେନ୍ସି)