ଭୁବନେଶ୍ବର: ଆଜିଠାରୁ ଖରମାସ ଆରମ୍ଭ ହୋଇଛି। ଏହି ମାସରେ କୌଣସି ମାଙ୍ଗଳିକ ଅଥବା ଶୁଭକାର୍ଯ୍ୟ କରାଯାଏ ନାହିଁ। ଏହି ମାସରେ ଶୁଭ କାର୍ଯ୍ୟ କରିବାକୁ ବାରଣ କରାଯାଇଥାଏ। ଜ୍ୟୋତିଷ ଶାସ୍ତ୍ର ଅନୁସାରେ ସୂର୍ଯ୍ୟ ରାଶି ପରିବର୍ତ୍ତନ କରିଥାନ୍ତି। ଯେବେ ସେ ଧନୁ ରାଶିରେ ପ୍ରବେଶ କରିଥା’ନ୍ତି ସେବେଠାରୁ ଖରମାସ ଲାଗୁ ହୋଇଥାଏ। ସୂର୍ଯ୍ୟ ଧନୁ ରାଶିରୁ ବାହାରି ମକର ରାଶିରେ ପ୍ରବେଶ କଲେ ଖର ମାସର ଶେଷ ହୋଇଥାଏ। ଏହି ମାସଟି ଆଧ୍ୟାତ୍ମିକ ରୂପରେ ବିଶେଷ ମହତ୍ତ୍ବ ରଖିଥାଏ। ଏହି ମାସରେ ଜପ-ତପ ବା ଦାନ କରିବା ଦ୍ବାରା ବିଶେଷ ଫଳ ପ୍ରାପ୍ତି ହୋଇଥାଏ। ସେହିପରି ଏହି ମାସରେ କିଛି ବିଶେଷ ଉପାୟ କରିବା ଦ୍ବାରା ଐଶ୍ବର୍ଯ୍ୟ ପ୍ରାପ୍ତି ହେବା ସହ ଧନ ସମ୍ବନ୍ଧୀୟ ସମସ୍ୟାର ଅନ୍ତ ହୋଇଥାଏ।
ଜାଣନ୍ତୁ ଜ୍ୟୋତିଷ ଶାସ୍ତ୍ରରେ ବର୍ଣ୍ଣିତ ହୋଇଥିବା ଏହି ଉପାୟଗୁଡିକ କ’ଣ
ଏକାଦଶୀ ବ୍ରତ ପାଳନ
ଖରମାସରେ ପଡୁଥିବା ଏକାଦଶୀ ବ୍ରତ ପାଳନ କରିବା ଉଚିତ୍। ଭଗବାନ ବିଷ୍ଣୁଙ୍କୁ ତୁଳସୀ ପକାଇ ଭୋଗ ଲଗାଇବା ଦରକାର। ଏହି ମାସରେ ପଡୁଥିବା ଏକାଦଶୀ ବ୍ରତ ପାଳନ କଲେ ଭଗବାନ ବିଷ୍ଣୁଙ୍କର ବିଶେଷ କୃପା ମିଳିବା ସହିତ ବୈକୁଣ୍ଠ ପ୍ରାପ୍ତି ହୋଇଥାଏ। ଏହି ବ୍ରତ କରିବା ଦ୍ବାରା ସମସ୍ତ ପାପରୁ ମୁକ୍ତି ମିଳିଥାଏ।
ତୁଳସୀ ବୃକ୍ଷ ପୂଜନ
ଖରମାସରେ ପ୍ରତ୍ୟହ ତୁଳସୀ ବୃକ୍ଷ ପୂଜନ କରିବା ଉଚିତ୍। ତୁଳସୀ ବୃକ୍ଷ ପୂଜା କରିବା ସହିତ ଶୁଦ୍ଧ ଘିଅର ଦୀପ ଲଗାଇବା ଉଚିତ୍। ଏହା ସହିତ ୧୧ ଥର ଓମ୍ ନମଃ ଭଗବତେ ବାସୁଦେବାୟ କହି ତୁଳସୀ ବୃକ୍ଷଙ୍କୁ ପରିକ୍ରମା କରିବା ଦ୍ବାରା ତୁଳସୀ ମାତା ପ୍ରସନ୍ନ ହୋଇଥାନ୍ତି। ଏହା ଦ୍ବାରା ଯଶ ଓ ଐଶ୍ବର୍ଯ୍ୟ ପ୍ରାପ୍ତି ହୋଇଥାଏ। ତୁଳସୀ ବୃକ୍ଷଙ୍କୁ ପୂଜା କରିବା ଦ୍ବାରା ସମସ୍ତ ଗ୍ରହ-ନକ୍ଷତ୍ର ଶୁଭ ଫଳ ପ୍ରଦାନ କରିଥା’ନ୍ତି।
ଲକ୍ଷ୍ମୀ ସ୍ତ୍ରୋତ ପଠନ
ଏହି ମାସରେ ଲକ୍ଷ୍ମୀ ମାତାଙ୍କର ସ୍ତ୍ରୋତ ପଠନ କରିବା ଆବଶ୍ୟକ। ଏହି ସ୍ତ୍ରୋତ ପଠନ କରିବାଦ୍ବାରା ଧନ ଧାନ୍ୟର ଅଭାବ ହୋଇନଥାଏ। ମାତାଲକ୍ଷ୍ମୀଙ୍କର ଆଶୀର୍ବାଦ ପ୍ରାପ୍ତ ହୋଇଥାଏ। ଏହାର ନିୟମିତ ପାଠ ଦ୍ବାରା ଘରେ ବୈଭବ ଓ ସୁଖ ପ୍ରାପ୍ତି ହୋଇଥାଏ। ପରିବାର ସଦସ୍ୟଙ୍କ ମଧ୍ୟରେ ପ୍ରେମ ସମ୍ପର୍କ ସୁଦୃଢ ହୋଇଥାଏ। ଲକ୍ଷ୍ମୀ ସ୍ତ୍ରୋତ ପଠନ ଦ୍ବାରା ଶତ୍ରୁ ବିନାଶ ହେବା ସହିତ ପ୍ରତ୍ୟେକ କ୍ଷେତ୍ରରେ ସଫଳତା ମିଳିଥାଏ।
ଅଶ୍ବତ୍ଥ ବୃକ୍ଷ ପୂଜନ
ଯେଉଁ ଲୋକେ କରଜ ସମସ୍ୟାରେ ପୀଡିତ ଅଛନ୍ତି ଅଥବା ଯେତେ ଉପାର୍ଜନ କଲେ ଧନ ରହିପାରୁନାହିଁ ସେମାନେ ଏହି ମାସରେ ପ୍ରତ୍ୟେକ ଦିନ ଅଶ୍ବତ୍ଥ ବୃକ୍ଷରେ ଜଳ ଦେବା ସହିତ ପୂଜା ପାଠ କରିବା ଉଚିତ୍। ସନ୍ଧ୍ୟାକାଳରେ ଦୀପ ଜଳାଇବା ଦ୍ବାରା ଋଣମୁକ୍ତି ମିଳିବା ସହିତ ଜୀବନର ସମସ୍ତ ସମସ୍ୟା ଶେଷ ହୋଇଥାଏ।
ଲକ୍ଷ୍ମୀନାରାୟଣ ପୂଜନ
ଏହି ମାସରେ ମାତା ଲକ୍ଷ୍ମୀ ଓ ପ୍ରଭୁ ନାରାୟଣଙ୍କର ପୂଜା କରିବା ଦ୍ବାରା ବିଶେଷ ଫଳ ମିଳିଥାଏ। ନିୟମିତ ପୂଜା କରିବା ଦ୍ବାରା ଆର୍ଥିକ ସମସ୍ୟାରୁ ମୁକ୍ତି ମିଳିଥାଏ।
ଏହି ମନ୍ତ୍ରର କରନ୍ତୁ ଉଚ୍ଚାରଣ
ଏହି ମାସରେ ଗୋବର୍ଦ୍ଧନଧରବନ୍ଦେଗାପାଳଂ ଗୋପରୁପିଣମ୍ ଗୋକୁଳୋତ୍ସବମୀଶାନଂ ଗୋବିନ୍ଦଂ ଗୋପିକାପ୍ରିୟମ୍’ ମନ୍ତ୍ରର ଜପ କରିବା ଦ୍ବାରା ଲାଭ ମିଳିଥାଏ। ଏହି ମନ୍ତ୍ର ସମୟରେ ହଳଦିଆ ପୋଷାକ ଧାରଣ ଅତ୍ୟନ୍ତ ଶୁଭ ହୋଇଥାଏ। ସେହିପରି ଏହି ମାସରେ କିଛି ଦାନ କରିବା ଅତ୍ୟନ୍ତ ଶୁଭ ହୋଇଥାଏ।
