ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ସବୁବେଳେ କିଛି ନୂଆ କରି ଦେଖାଇବାର ଆଶା ହିଁ ମଣିଷକୁ ସଫଳତାର ଶୀର୍ଷରେ ପହଞ୍ଚାଇଥାଏ। ସେ ସବୁବେଳେ କୁହନ୍ତି ଯେ ଉତ୍ତମ ଚିନ୍ତାଧାରା ଓ କଠିନ ପରିଶ୍ରମ ହିଁ ସଫଳତାର ଚାବିକାଠି। ପୂର୍ବରୁ ସେ ଅନେକ ହାତତିଆରି କଳାକୃତି କରି ଦେଶ ବିଦେଶରେ ସୁନାମ ଅର୍ଜନ କରିଥିବାବେଳେ ଏବେ ନିଜ କଳାକୃତି ମାଧ୍ୟମରେ କରୋନା ସଚେତନତାର ବାର୍ତ୍ତାଦେଇ ପୁଣି ଆସିଛନ୍ତି ଚର୍ଚ୍ଚାକୁ।
ଏବେ ଆମେ କହୁଛୁ ବ୍ରହ୍ମପୁରରୁ ବାଲୁକା ଶିଳ୍ପୀ ସତ୍ୟ ମହାରଣାଙ୍କ କଥା। ଯିଏକି ଦରକାରୀ ହେଉ କିମ୍ବା ଅଦରକାରୀ ସମସ୍ତ ଛୋଟଛୋଟ ସାମଗ୍ରୀରେ ତିଆରି କରିଥାନ୍ତି ବିଭିନ୍ନ କଳାକୃତି। ବର୍ତ୍ତମାନ ସେ କାଠରେ ବିରଳ ନାଗାର୍ଜୁନ ବେଶ ପ୍ରସ୍ତୁତ କରି କରୋନା ଦାଉରୁ ରକ୍ଷା ପାଇବା ପାଇଁ ସମସ୍ତେ ଏକାଠି ହୋଇ ଲଢ଼ିବାକୁ ସଚେତନତାର ବାର୍ତ୍ତା ପ୍ରଦାନ କରିଛନ୍ତି। ଏପାଖେ କାଳିଆ, ସେ ପାଖେ ବଳିଆ ଆଉ ମଝିରେ ଅଛନ୍ତି ଭଉଣୀ ସୁଭଦ୍ରା। ଗୋଟିଏ କାଠରେ ତିନିଠାକୁରଙ୍କୁ ବସାଇ ନାଗାର୍ଜୁନ ବେଶ ପ୍ରସ୍ତୁତ କରିଛନ୍ତି ସତ୍ୟ।
ଚଳିତବର୍ଷ କରୋନା କଟକଣା ଯୋଗୁଁ ଶ୍ରୀଜୀଉଙ୍କ ନାଗାର୍ଜୁନ ବେଶ ଦେଖିବାକୁ ଭକ୍ତମାନେ ବଂଚିତ ହୋଇଥିବାବେଳେ ତାକୁ ଦୃଷ୍ଟିରେ ରଖି ଏହି ହାତତିଆରି କଳାକୃତି ନିର୍ମାଣ କରିଛନ୍ତି ବାଲୁକା ଶିଳ୍ପୀ ସତ୍ୟ ମହାରଣା। ଏହି ନାଗାର୍ଜୁନ ବେଶର ଉଚ୍ଚତା ମାତ୍ର ୪ ଇଞ୍ଚ ରହିଛି। ସେହିପରି ଅନେକ ଦିନ ପରେ ମନ୍ଦିର ଖୋଲିଥିବାବେଳେ କାଠରେ ୩.୫୦ ଇଞ୍ଚର ମନ୍ଦିର କଳାକୃତି ନିର୍ମାଣ ସହ ନିକଟରେ ଏକ ଘର ପ୍ରସ୍ତୁତ କରିଛନ୍ତି। ଉକ୍ତ ଘରର ଉଚ୍ଚତା ୩ ଇଞ୍ଚ ରହିଛି ଏବଂ ଏହାର ଚାରିପାଖରେ ବିିଭିନ୍ନ ଜାତିଧର୍ମର ଲଗୋ ପ୍ରସ୍ତୁତ କରି ସର୍ବଧର୍ମ ସମନ୍ୱୟର ବାର୍ତ୍ତା ଦେଇଛନ୍ତି।
ଏହି ସଂପୂର୍ଣ୍ଣ କଳାକୃତି ସମାଜକୁ ଏହି ଦିଗ୍ଦର୍ଶନ ଦେଉଛି ଯେ ବର୍ତ୍ତମାନ ମଧ୍ୟ କରୋନାର ପ୍ରକୋପ କମିନଥିବାରୁ କୋଭିଡ଼୍ ଗାଇଡ଼୍ଲାଇନ୍ ମାନି ସାମାଜିକ ଦୂରତା ରକ୍ଷା କରିବା ସହ ବାହାରକୁ ଯିବା ସମୟରେ ମାସ୍କ ବ୍ୟବହାର କରିବା ଓ ଆବଶ୍ୟକ ନଥିବା ବେଳେ ଘରୁ ନ ବାହାରିବା। ଏହି କଳାକୃତିକୁ ନିର୍ମାଣ କରିବା ପାଇଁ ପାଖାପାଖି ଗୋଟିଏ ଦିନ ସମୟ ଲାଗିଥିବା କହିଛନ୍ତି ବାଲୁକା ଶିଳ୍ପୀ ସତ୍ୟ। ଏହା ପୂର୍ବରୁ ବୋଟମ୍ରେ ଗଂଜାମ ଜିଲ୍ଲା ସୋରଡ଼ାର ଅଧିଷ୍ଠାତ୍ରୀ ଦେବୀ ମା’ କନ୍ଧୁଣୀଙ୍କ ୧୮ ଇଞ୍ଚର ଫଟୋଚିତ୍ରକୁ ନିର୍ମାଣ କରିଥିଲେ ସତ୍ୟ। ଯାହା ଏସିଆ ବୁକ୍ ଅଫ୍ ରେକର୍ଡ଼ ଓ ଇଣ୍ଡିଆ ବୁକ୍ ଅଫ୍ ରେକର୍ଡ଼ରେ ସ୍ଥାନ ପାଇଥିଲା।
ଏଥିସହ ପଥର, କାଠ, ଚକ୍, ପେନସିଲ୍ରେ ବିଶ୍ୱର ସବୁଠାରୁ ଛଟୋ ଦୁର୍ଗାମୂର୍ତ୍ତି ଏବଂ ରଥଯାତ୍ରା ସମୟରେ ବିଶ୍ୱର ସବୁଠାରୁ ଛୋଟ ରଥ ନିର୍ମାଣ କରି ସେ ଅନେକ ରେକର୍ଡ଼ର ଅଧିକାରୀ ହୋଇଛନ୍ତି। ୱାରଲ୍ଡ ରେକର୍ଡ଼ ସେକ୍ଟର, ଏସିଆ ବୁକ୍ ଅଫ୍ ରେକର୍ଡ଼, ୟୁନିଭରସିଆଲ୍ ରେକର୍ଡ଼, କାଲାମ ବୁକ୍ ଅଫ୍ ରେକର୍ଡ଼, ୱାରଲ୍ଡ ରେକର୍ଡ଼ ଇଣ୍ଡିଆ, ଏକ୍ସକ୍ଲୁଜିଭ୍ ୱାରଲ୍ଡ ରେକର୍ଡ଼ ଭଳି ୨୫ରୁ ଉର୍ଦ୍ଧ୍ୱ ଜାତୀୟ ଓ ଆନ୍ତର୍ଜାତୀୟ ରେକର୍ଡ଼ ନିଜ ହାତତିଆରି କଳାକୃତି ମାଧ୍ୟମରେ ସେ ହାସଲ କରିପାରିଛନ୍ତି।
ଗଂଜାମ ଜିଲ୍ଲା ସୋରଡ଼ା ଗ୍ରାମରୁ ବ୍ରହ୍ମପୁର ସହରକୁ ଆସି ୨୦୧୦ ମସିହାରୁ ବାଲୁକାକଳା ଜରିଆରେ ସଫଳତା ପାଇ ଆସୁଥିବା ସତ୍ୟ ଏବେ ନିଜ ହାତତିଆରି ବିଭିନ୍ନ ପ୍ରକାର କଳାକୃତି ପାଇଁ ବେଶ୍ ଚର୍ଚ୍ଚାରେ। ଆଗକୁ ମଧ୍ୟ ନିଜ କଳା ମାଧ୍ୟମରେ କିଛି ନୂଆଁ କରିବାର ଆଶା ରଖିଥିବା ବାଲୁକାଶିଳ୍ପୀ ସତ୍ୟ ମହାରଣା କହିଛନ୍ତି।