ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ରାଜ୍ୟ କ୍ୟାବିନେଟ୍ର ନିଷ୍ପତ୍ତିକ୍ରମେ ଇଂଜିନିୟରିଂ, ମେଡ଼ିକାଲ୍ କଲେଜରେ ସରକାରୀ ସ୍କୁଲର ଛାତ୍ରଛାତ୍ରୀଙ୍କ ପାଇଁ ସିଟ୍ ସଂରକ୍ଷଣ ନେଇ ନିଷ୍ପତ୍ତିକୁ ଘରୋଇ ବିଦ୍ୟାଳୟ ମହାସଂଘ ବିରୋଧ କରିଛି। ତୁରନ୍ତ ଏହାକୁ ରାଜ୍ୟ ସରକାର ପ୍ରତ୍ୟାହାର କରିବାକୁ ସଂଘ ଦାବି କରିବା ସହ ନଚେତ୍ ଆଗାମୀ ଦିନରେ ସଂଘ ନ୍ୟାୟାଳୟର ଆଶ୍ରୟ ନେବେ ବୋଲି ଆଜି ଗୁରୁକୁଳ ଇଣ୍ଟରନ୍ୟାସନାଲ୍ ପବ୍ଲିକ୍ ସ୍କୁଲରେ ଅନୁଷ୍ଠିତ ରାଜ୍ୟ ଘରୋଇ ବିଦ୍ୟାଳୟ ଶିକ୍ଷକ ଓ କର୍ତ୍ତୃପକ୍ଷ ମହାସଂଘର ବାର୍ଷିକ ଉତ୍ସବରେ କୁହାଯାଇଥିଲା।
ରାଜ୍ୟ ସଭାପତି ରଘୁନାଥ ସାହୁଙ୍କ ସଭାପତିତ୍ୱରେ ଅନୁଷ୍ଠିତ ବୈଠକରେ ମୁଖ୍ୟଅତିଥି ଭାବେ ବିଧାୟକ ବିକ୍ରମ ପଣ୍ଡା ଯୋଗ ଦେଇଥିବାବେଳେ ମୁଖ୍ୟବକ୍ତା ଭାବେ ଗଂଜାମ ଜିଲ୍ଲା ବିଜେଡ଼ି ସଭାପତି ତଥା ପୂର୍ବତନ ବିଧାୟକ ଡା. ରମେଶ ଚନ୍ଦ୍ର ଚ୍ୟାଉ ପଟ୍ଟନାୟକ ଯୋଗଦେଇଥିଲେ। ସମ୍ମାନିତ ଅତିଥି ଭାବେ ପୂର୍ବତନ ବିଧାୟକ ସୀମାଞ୍ଚଳ ବେହେରା, ରଂଜନ କୁମାର ପୋଲାଇ, ଅରୁଣ କୁମାର ଷଡ଼ଙ୍ଗୀ, ଲକ୍ଷ୍ମଣ ରାଓ ଆଚାରୀ, ସୁରେନ୍ଦ୍ର କୁମାର ସାହୁ ପ୍ରମୁଖ ମଂଚାସୀନ ଥିଲେ।
ବୈଠକରେ ରାଜ୍ୟ ସଭାପତି କହିଥିଲେ ସରକାରଙ୍କ ଏହି ନିଷ୍ପତ୍ତି ଅସମ୍ବିଧାନିକ। ଛାତ୍ରଛାତ୍ରୀମାନେ କେଉଁଠି ପଢ଼ିବେ ଓ କିପରି ପଢ଼ିବେ ସେହି ନିଷ୍ପତ୍ତି ଅଭିଭାବକ ଉପରେ ଛାଡ଼ିବା ଉଚିତ। ସରକାର ଏଭଳି ପାତର ଅନ୍ତର ନୀତି ଅବଲମ୍ବନ କଲେ ବେସରକାରୀ ବିଦ୍ୟାଳୟରେ ପଢ଼ୁଥିବା ମେଧାବୀ ଛାତ୍ରଛାତ୍ରୀଙ୍କ ଭବିଷ୍ୟତ ଅନ୍ଧକାର ହେବ।
ତେଣୁ ଏହି ନିଷ୍ପତ୍ତିର ପୁନର୍ବିଚାର କରିବାକୁ ସଂଘ ଦାବି କରିଛି। ରାଜ୍ୟ ମହାସଂଘର ସଂପାଦକ ଆମ୍ରେଶ ମିଶ୍ର ବାର୍ଷିକ ବିବରଣୀ ପାଠ କରିଥିବାବେଳେ କାର୍ଯ୍ୟକ୍ରମକୁ କାର୍ଯ୍ୟକାରୀ ସଭାପତି ସୁଶାନ୍ତ କୁମାର ବେହେରା, ପ୍ରଜ୍ଞା ଭାଇ କାର୍ଯ୍ୟକ୍ରମକୁ ପରିଚାଳନା କରିଥିଲେ। ଶେଷରେ ସ୍କୁଲ ସଂପାଦିକା ଅନିତା କୁମାରୀ ପାଢ଼ୀ ଧନ୍ୟବାଦ ଅର୍ପଣ କରିଥିଲେ।