କ୍ଷମତାକୁ ଆସିଲେ ଆନ୍ଧ୍ରକୁ ସ୍ବତନ୍ତ୍ର ରାଜ୍ୟ ପାହ୍ୟା : ମାୟାବତୀ

ବିଏସ୍‌ପି ସୁପ୍ରିମୋ ତଥା ପୂର୍ବତନ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ମାୟାବତୀ ବୁଧବାର ଦିନ ଆନ୍ଧ୍ରପ୍ରଦେଶରେ ଜନସେନା ପାର୍ଟିର ମୁଖ୍ୟ ପଓ୍ବନ୍‌ କଲ୍ୟାଣଙ୍କ ସହିତ ସାଇ ପ୍ରିୟା ରିସୋର୍ଟରେ ଏକ ନିର୍ବାଚନୀ ପ୍ରଚାର କାର୍ଯ୍ୟକ୍ରମରେ ଭାଗ ନେଇଥିଲେ । ଏହି ଅବସରରେ ମାୟାବତୀ କହିଥିଲେ ଚଳିତ ବର୍ଷ ମହାମେଣ୍ଟ ସରକାର ଗଠନ କଲେ ମୁଁ ଆନ୍ଧ୍ରପ୍ରଦେଶକୁ ସ୍ବତନ୍ତ୍ର ରାଜ୍ୟ ପାହ୍ୟା ପ୍ରଦାନ କରିବି ଯେଉଁଥିରେ ପୂର୍ବରୁ ଉଭୟ କଂଗ୍ରେସ ଏବଂ ବିଜେପି ବିଫଳ ହୋଇଛନ୍ତି । ମାୟାବତୀ କହିଛନ୍ତି କଂଗ୍ରେସ ସରକାର ସ୍ବତନ୍ତ୍ର ପାହ୍ୟା ନେଇ ରାଜ୍ୟକୁ ଦୁଇ ଭାଗ କରିଥିବା ବେଳେ ସ୍ବତନ୍ତ୍ର ପାହ୍ୟା ପ୍ରଦାନ କରିନଥିଲା ଏହାପରେ ମୋଦି ମଧ୍ୟ ୨୦୧୪ରେ ସମାନ ପ୍ରତିଜ୍ଞା କରି ଜନସାଧାରଣଙ୍କୁ ଧୋକା ଦେଇଛନ୍ତି । ମାତ୍ର ଆମେ କ୍ଷମତାକୁ ଆସିଲେ ଆନ୍ଧ୍ରକୁ ସ୍ବତନ୍ତ୍ର ରାଜ୍ୟ ପାହ୍ୟା ନିଶ୍ଚିତ ଭାବରେ ପ୍ରଦାନ କରାଯିବ। ପ୍ରଧାନମନ୍ତ୍ରୀ ଦୌଡରେ ଅଛନ୍ତି କି ନାହିଁ ବୋଲି ଏକ ପ୍ରଶ୍ନର ଉତ୍ତର ଦେବାକୁ ଯାଇ ମାୟା କହିଛନ୍ତି ଏହା ନିର୍ବାଚନ ପରବର୍ତ୍ତୀ ସମୀକରଣ ଉପରେ ନିର୍ଭର କରିବ, ମାତ୍ର ଯଦି ମୁଁ ପ୍ରଧାନମନ୍ତ୍ରୀ ହୁଏ ତେବେ ୟୁପି ମଡେଲ୍‌ ମୁଁ କେନ୍ଦ୍ରରେ ପ୍ରଚଳନ କରି ଦେଶର ବିକାଶ କରିବି । ସେହିପରି ଆନ୍ଧ୍ରପ୍ରଦେଶରେ ବିଏସ୍‌ପି, ଜନସେନା ପାର୍ଟି, ସିପିଆଇ ଏବଂ ସିପିଆଇ (ଏମ୍‌)ର ମହାମେଣ୍ଟ ସରକାର ଗଠନ କରିବ ବୋଲି ଦୃଢୋକ୍ତି ପ୍ରକାଶ କରିଛନ୍ତି ମାୟା । ପଓ୍ବନ୍‌ଙ୍କୁ ଆନ୍ଧ୍ରର ଆଗାମୀ ମୁଖ୍ୟମନ୍ତ୍ରୀ ଭାବରେ ମଧ୍ୟ ଅଭିହିତ କରିଥିଲେ ମାୟାବତୀ । ପଓ୍ବନ୍‌ ଜଣେ ଯୁବନେତା ଯିଏକି ସଦାସର୍ବଦା ତଳସ୍ତରରୁ ଲୋକଙ୍କ ସହାୟତା କରିବାରେ ଆଗ୍ରହ ପ୍ରକାଶ କରିଥାନ୍ତି ତେଣୁ ମହାମେଣ୍ଟରୁ ପଓ୍ବନ୍‌ ମୁଖ୍ୟମନ୍ତ୍ରୀ ହେବା ନେଇ ଦୃଢୋକ୍ତି ପ୍ରକାଶ କରିଛନ୍ତି ମାୟା । ଟିଡିପି ଏବଂ ଓ୍ବାଇଏସ୍‌ଆର କଂଗ୍ରେସ ମଧ୍ୟରେ ବିଭାଜନ ମହାମେଣ୍ଟ ପାଇଁ ସରକାର ଗଠନର ବାଟ ପ୍ରଶସ୍ତ କରିବ ବୋଲି କହିଛନ୍ତି ମାୟାବତୀ ।