ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କ୍ୟାବିନେଟ କମିଟି ବୈଠକରେ କେନ-ବେଟୱା ନଦୀ ସଂଯୋଗୀକରଣ ପ୍ରକଳ୍ପ ଅନୁମୋଦିଦ ହୋଇଛି।
୨୦୨୦-୨୧ ଆର୍ଥିକ ସ୍ଥିତି ଅନୁସାରେ କେନ-ବେଟୱା ସଂଯୋଗୀକରଣ ପ୍ରକଳ୍ପର ବ୍ୟୟ ଅଟକଳ ୪୪ହଜାର ୬୦୫କୋଟି ଟଙ୍କା ଆକଳନ କରାଯାଇଛି। କେନ୍ଦ୍ର କ୍ୟାବିନେଟ ଏ ବାବଦକୁ ୩୯ହଜାର ୩୧୭କୋଟି ଟଙ୍କା ଅନୁମୋଦନ କରିଛି। ସେଥିରୁ ୩୬ହଜାର ୨୯୦କୋଟି ଟଙ୍କା ମଞ୍ଜୁର କରାଯାଇଥିବାବେଳେ, ୩ହଜାର ୦୨୭କୋଟି ଟଙ୍କା ଋଣ ଆକାରରେ ରହିଛି।
ଏହି ପ୍ରକଳ୍ପ ଅନ୍ୟାନ୍ୟ ନଦୀ ସଂଯୋଗୀକରଣ ପ୍ରକଳ୍ପ ନିମନ୍ତେ ବାଟ ଖୋଲିବା ସହ ବିଶ୍ୱରେ ଆମର ଦୂରଦର୍ଶିତାର ପ୍ରମାଣ ଦେବ।
ଏହି ପ୍ରକଳ୍ପରେ କେନରୁ ବେଟୱା ନଦୀକୁ ଦାଉଧନ ଡ୍ୟାମ ଓ ଦୁଇ ନଦୀକୁ ସଂଯୋଗ କରୁଥିବା କେନାଲ ଜରିଆରେ ପାଣି ଯିବାଆସିବା କରିବ। ଏଥିରେ ତଳ ଓର ପ୍ରକଳ୍ପ, କୋଠା ନଦୀବନ୍ଧ ଓ ବିନା କମ୍ପେ୍ଲକ୍ସ ବହୁମୁଖୀ ପ୍ରକଳ୍ପ ରହିବ। ଏହି ପ୍ରକଳ୍ପ ଯୋଗୁଁ ବାର୍ଷିକ ୧୦.୬୨ଲକ୍ଷ ହେକ୍ଟର ଜମିକୁ ପାଣି ଯୋଗାଯିବା ସହ ପ୍ରାୟ ୬୨ଲକ୍ଷ ଲୋକଙ୍କୁ ପାନୀୟ ଜଳ ଯୋଗାଯିବ। ଏହାଛଡା ଏଥିରୁ ୧୦୩ ମେଗାୱାଟ୍ ଜଳବିଦ୍ୟୁତ ଓ ୨୭ମୋଗାୱାଟ ସୌରଶକ୍ତି ମଧ୍ୟ ଉତ୍ପାଦିତ ହେବ। ଦେଶୀୟ ଜ୍ଞାନକୌଶଳରେ ଏହି ପ୍ରକଳ୍ପ ଆଠବର୍ଷ ମଧ୍ୟରେ ତ୍ୱରାନ୍ୱିତ ହେବ।
ଜଳକଷ୍ଟ ଭୋଗୁଥିବା ବୁନ୍ଦେଲଖଣ୍ଡ ଅଞ୍ଚଳ ନିମନ୍ତେ ଏହି ପ୍ରକଳ୍ପ ବେଶ୍ ଲାଭଦାୟକ ହେବ। ମଧ୍ୟପ୍ରଦେଶ ରାଜ୍ୟର ପାନ୍ନା, ଟିକାମଗଡ, ଛତରପୁର, ସାଗର,ଦାମୋହ, ଡାଟିଆ, ବିଦିଶା, ଶିବପୁରୀ ଓ ରାଇସେନ ଅଂଚଳ ଓ ଉତ୍ତରପ୍ରଦେଶର ବାନ୍ଦା, ମହୋବା, ଝାନ୍ସୀ ଓ ଲଲିତପୁର ଅଞ୍ଚଳଗୁଡିକ ବେଶ ଉପକୃତ ହେବେ।
ଅଧିକ ଚାଷବାସ ଓ କର୍ମନିଯୁକ୍ତି ପାଇଁ ଏହି ପ୍ରକଳ୍ପ ଅନଗ୍ରସର ବୁନ୍ଦେଲଖଣ୍ଡ ଅଞ୍ଚଳରେ ଆର୍ଥିକ ସମୃଦ୍ଧି ଆଣିଦେବ । ଏହି ଅଞ୍ଚଳରୁ ବିଭିନ୍ନ ଅସୁବିଧା ମଧ୍ୟ ଦୂର ହୋଇପାରିବ।
ଦେଶର ପ୍ରଥମ ନଦୀସଂଯୋଗୀକରଣ ପ୍ରକଳ୍ପ ତ୍ୱରାନ୍ୱିତ କରିବା ପାଇଁ ୨୨ମାର୍ଚ୍ଚ, ୨୦୨୧ ଦିନ ଉତ୍ତରପ୍ରଦେଶ ଓ ମଧ୍ୟପ୍ରଦେଶ ମୁଖ୍ୟମନ୍ତ୍ରୀଙ୍କ ସହ କେନ୍ଦ୍ର ଜଳଶକ୍ତି ମନ୍ତ୍ରୀଙ୍କ ଏକ ରାଜିନାମା ସ୍ୱାକ୍ଷରିତ ହୋଇଥିଲା। ଏହି ରାଜିନାମା ଯୋଗୁଁ ଅଟଳବିହାରୀ ବାଜପେୟୀଙ୍କ ଦ୍ୱାରା ବଳକାପାଣି ଥିବା ଅଞ୍ଚଳରୁ ଜଳକଷ୍ଟ ଅଞ୍ଚଳକୁ ନଦୀ ସଂଯୋଗୀକରଣ ଦ୍ୱାରା ପାଣି ଯୋଗାଇବା ସ୍ୱପ୍ନ ସାର୍ଥକ ହୋଇଛି।
