ନୂଆଦିଲ୍ଲୀ: ସମାଜ ବାଦୀ ପାର୍ଟି ପାଇଁ ଆଗ୍ରା ସର୍ବଦା ରାଜନୈତିକ ଦୃଷ୍ଟିରୁ ଦୁର୍ବଳ ରହିଆସିଛି। କିନ୍ତୁ ଏଥର ଫତେହାବାଦ ଆସନରୁ ଏସପି ବାହୁବଳୀଙ୍କ ଝିଅ ରୁପାଲି ଦୀକ୍ଷିତଙ୍କୁ ଟିକେଟ ଦେଇ ବିଜେପି ସହିତ ରାଜନୈତିକ ଯୁଦ୍ଧକୁ ଅତ୍ୟନ୍ତ ଆକର୍ଷଣୀୟ କରିପାରିଛି। ରୁପାଲି ବିଦେଶରୁ ପାଠ ପଢା ସାରି ସ୍ଵଦେଶ ଫେରି ଆସିଛନ୍ତି। ଦୁବାଇ ଚାକିରିରୁ ଇସ୍ତଫା ଦେବା ପରେ ସେ ୨୦୧୬ ମସିହାରେ ରାଜନୀତିରେ ପ୍ରବେଶ କରିଥିଲେ ଏବଂ ପରେ ୨୦୧୭ ରେ ବିଜେପିରେ ଯୋଗ ଦେଇଥିଲେ। କିନ୍ତୁ ବର୍ତ୍ତମାନ ସେ ସମାଜବାଦୀ ପାର୍ଟି ଟିକେଟରୁ ପ୍ରତିଦ୍ୱନ୍ଦ୍ୱିତା କରୁଛନ୍ତି।
ରୁପାଲି ପୁଣେର ସିମ୍ବାୟଓସିସ୍ ଇନଷ୍ଟିଚ୍ୟୁଟରୁ ସ୍ନାତକ ହାସଲ କରିଥିଲେ ଏବଂ ପରେ ୨୦୦୯ ମସିହାରେ ବିଦେଶ ଯାଇଥିଲେ। ସେ ବ୍ରିଟେନର କାର୍ଡିଫ୍ ୟୁନିଭରସିଟିରୁ ସ୍ନାତକୋତ୍ତର କରିଥିଲେ। ଏହା ପରେ ସେ ଦୁବାଇର ଏକ କମ୍ପାନୀରେ ଚାକିରି ପାଇଥିଲେ। ପରିବାର ଲୋକଙ୍କୁ କହିବା ପରେ ସେ ଚାକିରିରୁ ଇସ୍ତଫା ଦେଇ ଘରକୁ ଫେରିଥିଲେ। ଏସପି ପୂର୍ବରୁ ଫତେହାବାଦ ଆସନରୁ ରାଜେଶ ଶର୍ମାଙ୍କୁ ମନୋନୀତ କରିଥିଲା। କିନ୍ତୁ ସ୍ଥାନୀୟ ୟୁନିଟ୍ ଦେଇଥିବା ମତାମତ ପରେ ଦଳ ଏହାକୁ ବଦଳାଇ ରୁପାଲିଙ୍କୁ ଏହି ଆସନରୁ ଟିକେଟ ଦେଇଛି।
ରୁପାଲିଙ୍କ ପିତା ଅଶୋକ ଦୀକ୍ଷିତଙ୍କୁ ଏହି ଅଞ୍ଚଳର ବାହୁବଳୀ ଭାବରେ ବିବେଚନା କରାଯାଏ। ହତ୍ୟା ମାମଲାରେ ତାଙ୍କ ପିତାଙ୍କ ସମେତ ପରିବାରର ଚାରିଜଣ ସଦସ୍ୟ ଆଜୀବନ କାରାଦଣ୍ଡ ଭୋଗୁଛନ୍ତି। ଅଶୋକ ଦୀକ୍ଷିତ ଶିକ୍ଷକ ସୁମନ ଯାଦବଙ୍କୁ ହତ୍ୟା କରିଥିଲେ। ଏହା ବ୍ୟତୀତ ତାଙ୍କ ବିରୋଧରେ ପ୍ରାୟ ୭୦ରୁ ଅଧିକ ମାମଲା ରୁଜୁ ହୋଇଛି। ଯେଉଁଥିରୁ ୩ ଟି ମାମଲା ହତ୍ୟା ସହ ଜଡିତ। ଅଶୋକ ଦୀକ୍ଷିତ ଫିରୋଜାବାଦର ବାସିନ୍ଦା। କିନ୍ତୁ ପରେ ତାଙ୍କ ପରିବାର ବ୍ୟବସାୟ ଯୋଗୁଁ ଆଗ୍ରାରେ ସ୍ଥାୟୀ ଭାବେ ରହୁଛନ୍ତି। ୨୦୧୫ରେ ତାଙ୍କୁ ସୁମନ ଯାଦବ ହତ୍ୟା ମାମଲାରେ ଆଜୀବନ କାରାଦଣ୍ଡରେ ଦଣ୍ଡିତ କରାଯାଇଥିଲା।
ରୁପାଲିଙ୍କୁ କହିଛନ୍ତି ଯେ, ପୂର୍ବରୁ ଏହି ଘଟଣା ବିଷୟରେ ତାଙ୍କୁ କେହି କହି ନଥିଲେ। ବହୁତ ସମୟ ପରେ, ସେ ଏହା ବିଷୟରେ ଜାଣିବାକୁ ପାଇଲେ। ପରିବାରରେ ପ୍ରତିକୂଳ ପରିସ୍ଥିତି ହେତୁ ସେ ଚାକିରୀ ଛାଡି ଘରକୁ ଫେରିଥିଲେ ଏବଂ ଏହା ପରେ ସେ ୨୦୧୭ରେ ବିଜେପିରେ ଯୋଗ ଦେଇଥିଲେ। ଦୁଇ ବର୍ଷ ପରେ ରୁପାଲି ବିଜେପି ଛାଡି ସମାଜବାଦୀ ପାର୍ଟିରେ ଯୋଗ ଦେଇଥିଲେ ଏବଂ ବର୍ତ୍ତମାନ ସେ ଫତେହାବାଦରୁ ଏସପି ପ୍ରାର୍ଥୀ ହୋଇଛନ୍ତି। ଛୋଟେଲାଲ ବର୍ମାଙ୍କୁ ବିଜେପି ଏହି ଆସନ ପାଇଁ ପ୍ରାର୍ଥୀ କରିଛି। ଯିଏକି ତାଙ୍କ ପିତାଙ୍କ ଉପରେ ଏକ ବିବାଦୀୟ ବିବୃତ୍ତି ମଧ୍ୟ ଦେଇଛନ୍ତି।