ନୂଆଦିଲ୍ଲୀ: କ୍ରମାଗତ ତୃତୀୟ ସପ୍ତାହ ପାଇଁ ଭାରତରେ କରୋନା ସଂକ୍ରମଣର ମାମଲା ବୃଦ୍ଧି ପାଇଛି, କିନ୍ତୁ ଗତ ସପ୍ତାହରେ ଏହି ରୋଗରେ ମୃତ୍ୟୁ ସଂଖ୍ୟାରେ କୌଣସି ବୃଦ୍ଧି ଘଟି ନ ଥିବାରୁ ଏହା ଲୋକମାନଙ୍କ ପାଇଁ ଆଶ୍ଵସ୍ତି ଆଣିଛି।
ଗତ ସପ୍ତାହରେ ଭାରତର ୨୨,୨୦୦ ଲୋକଙ୍କ ମଧ୍ୟରେ କରୋନା ନିଶ୍ଚିତ କରାଯାଇଥିଲା। ଏହାର ପୂର୍ବ ସପ୍ତାହରେ ମିଳିଥିବା ୧୫,୮୦୦ ସଂକ୍ରମିତ ତୁଳନାରେ ଏହା ୪୧% ଅଧିକ। ସେହି ସପ୍ତାହରେ କରୋନା ମାମଲାରେ ୯୬% ବୃଦ୍ଧି ଦେଖିବାକୁ ମିଳିଥିଲା। ଅଧିକାଂଶ ସଂକ୍ରମିତ ଦିଲ୍ଲୀ, ହରିୟାଣା ଏବଂ ୟୁପିରେ ଦେଖିବାକୁ ମିଳିଥିଲା। ସମୁଦାୟ ସଂକ୍ରମିତଙ୍କ ମଧ୍ୟରୁ ଏହା ୬୮% ଅଟେ। ରବିବାର ଶେଷ ହୋଇଥିବା ସପ୍ତାହରେ ଦେଶର ୨୦ ଟି ରାଜ୍ୟ / କେନ୍ଦ୍ରଶାସିତ ଅଞ୍ଚଳରେ କରୋନା ରୋଗର ବୃଦ୍ଧି ଘଟିଛି, ଯାହା ସୂଚାଇ ଦେଉଛି ଯେ ଏହି ସଂକ୍ରମଣ ଦେଶରେ ବିସ୍ତାର କରିବାରେ ଲାଗିଛି। ତେବେ ଅଧିକାଂଶ ରାଜ୍ୟରେ ଗୋଟିଏ ସପ୍ତାହରେ ହାରାହାରି ରୋଗୀଙ୍କ ସଂଖ୍ୟା ୧ ହଜାରରୁ କମ୍ ରହିଛି।
ଦିଲ୍ଲୀ ଶୀର୍ଷରେ ରହିଛି:
ନୂତନ ଆକ୍ରାନ୍ତ ପାଇବାରେ ଦିଲ୍ଲୀ ଏହି ସପ୍ତାହରେ ଶୀର୍ଷରେ ରହିଛି। ଏପ୍ରିଲ ୨୫ ତାରିଖରୁ ମଇ ୧ ତାରିଖ ମଧ୍ୟରେ ଦିଲ୍ଲୀରେ ୯ ହଜାର ୬୮୪ଟି ନୂଆ କରୋନା ମାମଲା ଦେଖିବାକୁ ମିଳିଥିଲା, ଯାହା ଗତ ସପ୍ତାହରେ ୬ ହଜାର ୩୨୬ ସଂଖ୍ୟା ତୁଳନାରେ ୫୩% ଅଧିକ। ଏହି ସମୟ ମଧ୍ୟରେ ଦେଶରେ ଚିହ୍ନଟ ହୋଇଥିବା ନୂତନ ମାମଲା ଦିଲ୍ଲୀରେ ୪୩% ବୃଦ୍ଧି ପାଇଥିଲା।