ଭୁବନେଶ୍ୱର : ଓଡ଼ିଶାରେ ଦୀର୍ଘ ୩୦ ବର୍ଷ ହେବ ଆଦି ଶଙ୍କରାଚାର୍ଯ୍ୟଙ୍କ ବାର୍ତ୍ତା ଓ ଦର୍ଶନର ପ୍ରଚାର ପ୍ରସାର କରୁଥିବା, ଆଦିଶଙ୍କର ବେଦାନ୍ତ ପ୍ରତିଷ୍ଠାନମ୍ ପକ୍ଷରୁ ୨୫୨୯ତମ ଆଦିଶଙ୍କର ଜୟନ୍ତୀ ଶୁକ୍ରବାର ସନ୍ଧ୍ୟାରେ ବୁଦ୍ଧମନ୍ଦିର ସଭାଗୃହରେ ଅନୁଷ୍ଠାନର ସ୍ଥାୟୀ ଅଧ୍ୟକ୍ଷ, ପୂର୍ବତନ ପ୍ରଶାସକ ନରେନ୍ଦ୍ର କୁମାର ମିଶ୍ରଙ୍କ ପୌରହିତ୍ୟରେ ଅନୁଷ୍ଠିତ ହୋଇଯାଇଛି ।
ଶ୍ରୀ ଶ୍ରୀ ଆଦି ଶଙ୍କରଙ୍କ ଫଟୋଚିତ୍ରରେ ମାଲ୍ୟାର୍ପଣ ପରେ ପ୍ରଦୀପ ପ୍ରଜ୍ଜ୍ୱଳନ ପୂର୍ବକ କାର୍ଯ୍ୟକ୍ରମକୁ ଆନୁଷ୍ଠାନିକ ଭାବେ ଉଦ୍ଘାଟନ କରି ଦିବ୍ୟଜୀବନ ସଂଘର ସନ୍ଥ ସ୍ୱାମୀ ଜଗନ୍ନାଥାନନ୍ଦ ସରସ୍ୱତୀ କିହଲେ ଯେ, ଆଦି ଶଙ୍କରଙ୍କ ଜୀବନୀକୁ ଯଦି ସମ୍ୟକ ଭାବରେ ଆଲୋଚନା କରିବା ତେବେ ସେ ଜଣେ ଦିବ୍ୟଶକ୍ତିର ଅଧିକାରୀ ଥିଲେ, ଏଥିରେ ତିଳେମାତ୍ର ସନ୍ଦେହର ଅବକାଶ ନାହିଁ । ୨୦୦୦ ବର୍ଷ ତଳେ ଭାରତବର୍ଷରେ ଯେଉଁ ଅବସ୍ଥା ଥିବ, ସେହି ସମୟରେ ଜଣେ ୧୫/୧୬ ବର୍ଷର କିଶୋର ସାରା ଭାରତବର୍ଷ ଭ୍ରମଣ କରିବା ବିଶ୍ୱ ପାଇଁ ଏକ ଆଶ୍ଚର୍ଯ୍ୟର ବିଷୟ ଥିଲା।
ମୁଖ୍ୟବକ୍ତାଭାବେ ଯୋଗଦେଇ ଭାରତବର୍ଷର ବିଶିଷ୍ଟ ସଂସ୍କୃତ ବିଦ୍ୱାନ ଆଦି ଶଙ୍କରଙ୍କ ପ୍ରତି ଗଭୀର ଶ୍ରଦ୍ଧାସୁମନ ଜଣାଇ କହିଲେ ଯେ, ଶ୍ରୀ ଅରବିନ୍ଦଙ୍କ ଅତି ମାନସ ଶକ୍ତି ହିଁ ହେଉଛନ୍ତି ଆଦି ଶଙ୍କର । ଆଦି ଶଙ୍କରଙ୍କ ଜନ୍ମକୁ ନେଇ ବହୁ ବାଦ ବିବାଦ ଥିଲେ ମଧ୍ୟ ଭଗବାନ ବୁଦ୍ଧଙ୍କ ଜନ୍ମର ପରବର୍ତ୍ତୀ ସମୟରେ ତାଙ୍କର ଜନ୍ମ, ଏହାକୁ ଆମେ ମାନିବାକୁ ପଡ଼ିବ । ବ୍ୟାସଦେବ କବି, ନାରାୟଣଙ୍କ ଅବତାର ବୋଲି ଯଦି ଭାବିବା, ତେବେ ଆଦି ଶଙ୍କର, ଭଗବାନ ଶିବଙ୍କର ସାକ୍ଷାତ୍ ଅବତାର। ଭଗବାନ ଶିବଙ୍କ ଆଶୀର୍ବାଦରୁ ସେ ଶିବଗୁୁରୁଙ୍କ ଔରଷରୁ ଜନ୍ମ ନେଇଥିଲେ।
କାର୍ଯ୍ୟକ୍ରମ ପ୍ରାରମ୍ଭରେ ଅନୁଷ୍ଠାନର ସାଧାରଣ ସମ୍ପାଦକ ଡଃ ଆର୍ଯ୍ୟକୁମାର ଜ୍ଞାନେନ୍ଦ୍ର ସ୍ୱାଗତ ଭାଷଣ ଦେଇ ଆଦି ଶଙ୍କରଙ୍କୁ ହିନ୍ଦୁ ଧର୍ମର ସଂରକ୍ଷକ ବୋଲି କହିବା ସହ ଶ୍ରୀ ଜଗନ୍ନାଥଙ୍କ ପୁନଃ ପ୍ରତିଷ୍ଠାରେ ତାଙ୍କ ଅବଦାନକୁ ଓଡ଼ିଆ ଜାତି ଭୁଲିପାରିବ ନାହିଁ । ଏହି ଅବସରରେ ଆଦି ଶଙ୍କରଙ୍କ ପ୍ରତି ସମର୍ପିତ ବାସ୍ତୁବିତ ଡଃ ମନୋଜ ଲେଙ୍କାଙ୍କ ଲିଖିତ ବାସ୍ତୁବିଜ୍ଞାନ ପୁସ୍ତକକୁ ମୁଖ୍ୟ ଅତିଥି ସ୍ୱାମିଜୀ ମହାରାଜ ଉନ୍ମୋଚନ କରିବା ସହ ଡଃ ଲେଙ୍କାଙ୍କୁ ସମ୍ବର୍ଦ୍ଧିତ କରିଥିଲେ।
କୋଷାଧ୍ୟକ୍ଷ ଡଃ ବଦ୍ରୀନାଥ ପଟ୍ଟନାୟକ ପ୍ରାରମ୍ଭିକ ସୂଚନା ଓ କାର୍ଯ୍ୟକ୍ରମ ସୂଚନା ଏବଂ ଯୁଗ୍ମ ସମ୍ପାଦକ ପ୍ରଦୀପ ମହାପାତ୍ର ଧନ୍ୟବାଦ ଅର୍ପଣ କରିଥିଲେ । ଅନ୍ୟମାନଙ୍କ ମଧ୍ୟରେ ପ୍ରଫେସର ବୁଦ୍ଧଦେବ ମିଶ୍ର, ଇଂ ବିବେକାନନ୍ଦ ପାତ୍ର, ରୋଟାରିଆନ ଶାନ୍ତନୁ କୁମାର ସାହୁ ପ୍ରମୁଖ ଶ୍ରଦ୍ଧା ସୁମନ ଜଣାଇଥିଲେ ।