ବିଜେପି ନେତା ସାଧ୍ବୀ ପ୍ରଜ୍ଞା ଗଡ୍ସେଙ୍କୁ ଦେଶଭକ୍ତ କହି ବିବାଦୀୟ ବୟାନ ଦେଇଥିବାବେଳେ ଏହାକୁ ନେଇ ପ୍ରତିକ୍ରିୟା ରଖିଛନ୍ତି ନୋବେଲ୍ ପୁରସ୍କାର ବିଜେତା ତଥା ସମାଜସେବକ କୈଳାଶ ସତ୍ୟାର୍ଥୀ । କୈଳାସ ପ୍ରଜ୍ଞାଙ୍କୁ କଡ଼ା ସମାଲୋଚନା କରି ପ୍ରଜ୍ଞା ଗାନ୍ଧିଜୀଙ୍କ ଆତ୍ମାକୁ ହତ୍ୟା କରିଛନ୍ତି ବୋଲି କହିଛନ୍ତି । ଭାରତୀୟ ଜନତା ପାର୍ଟି ଏପରି ବିବାଦୀୟ ବୟାନ ଦେଇଥିବା ପ୍ରଜ୍ଞାଙ୍କୁ ନିଜ ଦଳରୁ ବାହାର କରି ରାଜଧର୍ମ ନିଭାଇବା ଉଚିତ୍ ବୋଲି କୈଳାସ ନିଜ ବୟାନରେ କହିଛନ୍ତି । କୈଳାସ ଆହୁରି ମଧ୍ୟ କହିଛନ୍ତି ଯେ, ଗଡ୍ସେ ଗାନ୍ଧିଙ୍କର ଶରୀରକୁ ହତ୍ୟା କରିଥିଲେ, କିନ୍ତୁ ପ୍ରଜ୍ଞାଙ୍କ ଭଳି ଲୋକମାନେ ତାଙ୍କ ଆତ୍ମାକୁ ହତ୍ୟା କରୁଛନ୍ତି । ଅହିଂସା, ଶାନ୍ତି, ସହିଷ୍ଣୁତା ଓ ଭାରତର ଆତ୍ମାକୁ ହତ୍ୟା କରୁଛନ୍ତି । ଗାନ୍ଧିଜୀ ସବୁ ସତ୍ତା ଓ ରାଜନୀତିଠାରୁ ବହୁ ଉର୍ଦ୍ଧ୍ବରେ । ବିଜେପି ଏପରି ବୟାନବାଜି କରିଥିବା ପ୍ରଜ୍ଞାଙ୍କୁ ଦଳରୁ ନିଲମ୍ବିତ କରି ନିଜର ରାଜ ଧର୍ମ ନିଭାଇବା ଉଚିତ୍ ବୋଲି କୈଳାସ କହିଛନ୍ତି । ଚଳିତ ଲୋକସଭା ନିର୍ବାଚନରେ ବିଜେପି ଭୋପାଳର ଲୋକସଭା ଆସନରେ ସାଧ୍ବୀ ପ୍ରଜ୍ଞାଙ୍କୁ ନିର୍ବାଚନରେ ଠିଆ କରାଯାଇଛି । ସକ୍ରିୟ ରାଜନୀତିରେ ଯୋଗଦାନ ଦେବାଠାରୁ ପ୍ରଜ୍ଞା ବିବାଦୀୟ ବୟାନ ଦେଇ ଆସୁଥିଲେ । ତେବେ କମଲ ହାସନଙ୍କ ଗଡ୍ସେଙ୍କୁ ପ୍ରଥମ ହିନ୍ଦୁ ଆତଙ୍କବାଦୀ ବୟାନବାଜି ପରେ ପ୍ରଜ୍ଞା ତାଙ୍କୁ କଟାକ୍ଷ କରି ଗଡ୍ସେଙ୍କୁ ଦେଶଭକ୍ତ କହିବା ସହିତ ତାଙ୍କୁ ଯେଉଁମାନେ ଆତଙ୍କବାଦୀ ବୋଲି କହୁଛନ୍ତି ପ୍ରଥମେ ସେମାନେ ନିଜକୁ ଝାଙ୍କି ଦେଖିବା ଦରକାର ବୋଲି କହିଥିଲେ । ତେବେ ପ୍ରଜ୍ଞାଙ୍କ ଏପରି ବିବାଦୀୟ ବୟାନ ପରେ ବିଜେପି ପ୍ରଜ୍ଞାଙ୍କୁ କ୍ଷମା ମାଗିବାକୁ କହିଥିଲେ । ପରେ ପ୍ରଜ୍ଞା ଏହି ମାମଲା ପାଇଁ କ୍ଷମା ଯାଚନା କରିଥିଲେ ।
BJP leadership must immediately remove Prangya from the party and follow raj dharma : Kalisha styarthi