ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ବିଜୟର ଶୁଭକାମନା ଜଣାଇଛନ୍ତି ଶତ୍ରୁଘ୍ନ ସିହ୍ନା । ପାଟନା ସାହିବ ଆସନରୁ କଂଗ୍ରେସ ପ୍ରାର୍ଥୀ ଭାବରେ ପ୍ରତିଦ୍ବନ୍ଦିତା କରୁଥିବା ଶତ୍ରୁଘ୍ନ ବିଜେପି ପ୍ରାର୍ଥୀ ରବି ଶଙ୍କର ପ୍ରସାଦଙ୍କ ନିକଟରୁ ପରାଜିତ ହୋଇଛନ୍ତି । ନିଜ ପରାଜୟ ପରେ ଶତ୍ରୁଘ୍ନ ରବିଶଙ୍କର ପ୍ରସାଦ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହଙ୍କୁ ଧନ୍ୟବାଦ ଜଣାଇଛନ୍ତି । ନିର୍ବାଚନ ଫଳାଫଳ ଆସିବା ପରେ ଏକ ପ୍ରେସ୍ ମିଟ୍ ଜରିଆରେ ମୋଦିଙ୍କୁ ଶୁଭେଚ୍ଛା ଜଣାଇଛନ୍ତି ବଲିଉଡ୍ ଅଭିନେତା ତଥା ପୂର୍ବତନ ବିଜେପି ନେତା ଶତ୍ରୁଘ୍ନ ସିହ୍ନା । ପ୍ରେସ୍ମିଟ୍ରେ ଶତ୍ରୁ ମୋଦିଙ୍କୁ ନିଜର ବନ୍ଧୁ, ଶାହାଙ୍କୁ ବିଜେପିର ଚାଣକ୍ୟ ଏବଂ ରବିଶଙ୍କର ପ୍ରସାଦଙ୍କୁ ନିଜ ଭାଇ ବୋଲି ସମ୍ବୋଧନ କରିଥିଲେ । ମୁଁ ପରାଜିତ ହେଲେ ମଧ୍ୟ ମୋ ଭାଇ ବିଜୟୀ ହୋଇଛନ୍ତି ଏବଂ ଜନସାଧାରଣଙ୍କ ସେବାରେ ସେ ନିଜକୁ ନିୟୋଜିତ କରିବେ ବୋଲି ମୁଁ ଆଶା କରୁଛି । ସେହିପରି ବିଜେପିକୁ ପ୍ରତ୍ୟାବର୍ତ୍ତନ କରିବେ କି ବୋଲି ଏକ ପ୍ରଶ୍ନର ଉତ୍ତର ଦେଇ ଶତ୍ରୁ କହିଥିଲେ ବିଜେପିକୁ ଫେରିବାର ପ୍ରଶ୍ନ ଉଠୁନାହିଁ ।
