ଭୁବନେଶ୍ବର: ପୂର୍ବତଟ ରେଳପଥ ମହାପ୍ରବନ୍ଧକ ରୂପ ନାରାୟଣ ସୁନକରଙ୍କ ଉପସ୍ଥିତିରେ ରେଳପଥର ମୁଖ୍ୟାଳୟ ରେଳ ସଦନରେ ପୂର୍ବ ତଟ ରେଳପଥ ଏବଂ ଅନୁଗୁଳ-ସୁକିନ୍ଦା ରେଳ ଲିମିଟେଡ୍ (ଏଏସଆରଏଲ) ମଧ୍ୟରେ ଅନୁଗୁଳ-ସୁକିନ୍ଦା ରେଳ ଲାଇନ ପ୍ରକଳ୍ପର ପରିଚାଳନା ଏବଂ ରକ୍ଷଣାବେକ୍ଷଣ (ଅପରେସନ୍ ଆଣ୍ଡମେଣ୍ଟେନାନ୍ସ O&M) ଚୁକ୍ତିନାମା ସ୍ୱାକ୍ଷରିତ ହୋଇଛି।
ଏହି ସ୍ମାରକପତ୍ରରେ ଏଏସଆରଏଲର ପରିଚାଳନା ନିର୍ଦ୍ଦେଶକ ଦିଲୀପ କୁମାର ସାମନ୍ତରାୟ ଏବଂ ପୂର୍ବତଟ ରେଳପଥର ମୁଖ୍ୟ ବାଣିଜ୍ୟିକ ପ୍ରବନ୍ଧକ (ପଣ୍ୟ) ଏଚ୍ ଏଲ. ଲୁଆଙ୍ଗଙ୍କ ଦ୍ୱାରା ସ୍ୱାକ୍ଷରିତ କରାଯାଇଅଛି। ଏହି କାର୍ଯ୍ୟକ୍ରମରେ ରେଳପଥର ଅତିରିକ୍ତ ମହାପ୍ରବନ୍ଧକ ଶରଦ କୁମାର ଶ୍ରୀବାସ୍ତବ ଏବଂ ପ୍ରମୁଖ ବିଭାଗୀୟ ଅଧିକାରୀ ମାନଙ୍କ ସହିତ ଭାଗିଦାରୀ ମାନେ ଉପସ୍ଥିତ ଥିଲେ।
ଓଡ଼ିଶାର ଅନୁଗୁଳ ଜିଲ୍ଲାର ବୁଢ଼ାପଙ୍କ ଷ୍ଟେସନ ଓ ଯାଜପୁର ଜିଲ୍ଲାର ବାଘୁଆପାଳ ରେଳ ଷ୍ଟେସନ ମଧ୍ୟରେ ୯୮.୭୦ କି.ମି. ବ୍ରଡ ଗେଜ୍ ରେଳ ଲାଇନର ପରିଚାଳନା ଏବଂ ରକ୍ଷଣାବେକ୍ଷଣ ପାଇଁ ଅନୁଗୁଳ-ସୁକିନ୍ଦା ରେଲୱେ ଲିମିଟେଡ୍ କୁ ରେଳ ବିକାଶ ନିଗମ ଲିମିଟେଡ୍ (RVNL) ମାଧ୍ୟମରେ ରେଳ ମନ୍ତ୍ରଣାଳୟ ଦ୍ୱାରା ଏକ ଏସପିଭିରେ ଅନ୍ତର୍ଭୁକ୍ତ କରାଯାଇଛି।
ଏହି ନୂତନ ରେଳ ଲାଇନ ଓଡ଼ିଶାର ଲୌହ ପଥର ସମୃଦ୍ଧ ଅଞ୍ଚଳ (ଜୋଡା-ବଡ଼ବିଲ) ମଧ୍ୟରେ ଅନୁଗୁଳ ଅଞ୍ଚଳର ଇସ୍ପାତ ଏବଂ ସ୍ପଞ୍ଜ ଲୁହା ଶିଳ୍ପ ମଧ୍ୟରେ ସିଧାସଳଖ ସଂଯୋଗ ଯୋଗାଇବ। ଏହା ମଧ୍ୟ ସୁକିନ୍ଦା ଅଞ୍ଚଳର କଳିଙ୍ଗ ନଗର ଶିଳ୍ପାଞ୍ଚଳ ସହିତ କୋଇଲା ଭିତ୍ତିକ ଥର୍ମାଲ୍ ପାୱାର୍ ପ୍ଲାଣ୍ଟ ପର୍ଯ୍ୟନ୍ତ ତାଲଚରର କୋଇଲା ଖଣି ବେଲ୍ଟ ମଧ୍ୟରେ ଏକ କ୍ଷୁଦ୍ର ଏବଂ ଗମନାଗମନ ମୁକ୍ତ ବିକଳ୍ପ ମାର୍ଗ ଯୋଗାଇ ପାରିବ। ଏହି ନୂତନ ଲାଇନ ଅନୁଗୁଳ ଅଞ୍ଚଳର ଇସ୍ପାତ କାରଖାନା, ନାଲକୋ ଏବଂ ଓଡିଶାର କଳିଙ୍ଗ ନଗର ଅଞ୍ଚଳରେ ଅବସ୍ଥିତ ଇଣ୍ଡଷ୍ଟ୍ରିଜ୍ କ୍ଲଷ୍ଟର ନିକଟବର୍ତ୍ତୀ ହେବ।
ଏହି ପ୍ରକଳ୍ପ ମଧ୍ୟ ରାଉରକେଲା ଷ୍ଟିଲ୍ ପ୍ଲାଣ୍ଟ ଏବଂ ଧାମରା/ପାରାଦୀପ ବନ୍ଦର ମଧ୍ୟରେ ଦୂରତା ମଧ୍ୟ ହ୍ରାସ କରିବ। ଦୂର ଓ ବ୍ୟୟ ବହୁଳ ଖଡ଼ଗ୍ପୁର ମାର୍ଗ ପରିବର୍ତ୍ତେ ତାଳଚେର-ସମ୍ବଲପୁର-ଝାରସୁଗୁଡା ମାର୍ଗ ମାଧ୍ୟମରେ କଳିଙ୍ଗ ନଗର କମ୍ପ୍ଲେକ୍ସରୁ ମୁମ୍ବାଇ ଏବଂ ଦିଲ୍ଲୀ ଇତ୍ୟାଦି ଗନ୍ତବ୍ୟସ୍ଥଳକୁ ଇସ୍ପାତ କାରଖାନାର ପ୍ରସ୍ତୁତ ଉତ୍ପାଦ ପଠାଇବା ମଧ୍ୟ ସମୟ ଉପଯୋଗୀ ଏବଂ ଶସ୍ତା ହେବ।
୧୯୯୮-୯୯ ମସିହାରେ ୯୮.୭୦ କିଲୋମିଟର ଦୈର୍ଘ୍ୟ ପ୍ରକଳ୍ପକୁ ଅନୁମୋଦନ କରାଯାଇଥିଲା ଏବଂ ୨୦୦୯ ରେ ଏହାକୁ କାର୍ଯ୍ୟକାରିତା ପାଇଁ ଅନ୍ତର୍ଭୁକ୍ତ କରାଯାଇଥିଲା। ଜମି ଅଧିଗ୍ରହଣ ଏବଂ ଅନ୍ୟାନ୍ୟ ବୈଷୟିକ ସମାଧାନ ପ୍ରକ୍ରିୟା ପରେ ଆସନ୍ତା ଡିସେମ୍ବର ୨୦୨୨ ସୁଦ୍ଧା ୨୪୪୦ କୋଟି ଟଙ୍କାର ରେଳପ୍ରକଳ୍ପର କାର୍ଯ୍ୟ ଶେଷ କରିବାକୁ ଲକ୍ଷ୍ୟ ରଖାଯାଇଛି।