ଭୁବନେଶ୍ୱର: ବିଜ୍ଞାନ ଓ କାରିଗରୀ ବିଭାଗର ସହଯୋଗ କ୍ରମେ ଭୁବନେଶ୍ୱର ସିଟି ନଲେଜ ଇନୋଭେସନ୍ କ୍ଲଷ୍ଟର ଫାଉଣ୍ଡେସନ୍ ଓ ଦିଳ୍ଲୀସ୍ଥିତ ଭାରତୀୟ ପେଟେଣ୍ଟ ଦପ୍ତରର ମିଳିତ ଆନୁକୂଲ୍ୟରେ ଆଜି ରମାଦେବୀ ମହିଳା ବିଶ୍ୱବିଦ୍ୟାଳୟ ଓ ଉତ୍କଳ ବିଶ୍ୱବିଦ୍ୟାଳୟରେ ବୌଦ୍ଧିକ ସଂପଦ ଉପରେ ଦୁଇଟି ସଚେତନତା ସଭା ଅନୁଷ୍ଠିତ ହୋଇଯାଇଛି। ବୌଦ୍ଧିକ ସଂପଦ ନେଇ ରାଜ୍ୟର ଛାତ୍ରଛାତ୍ରୀ, ଗବେଷକ ଓ ବୁଦ୍ଧିଜୀବୀମାନଙ୍କ ମଧ୍ୟରେ ବ୍ୟାପକ ସଚେତନତା ସୃଷ୍ଟି କରିବା ଉପରେ ଉଭୟ ସଭାରେ ଗୁରୁତ୍ୱ ଆରୋପ କରାଯାଇଛି।
ରାଜ୍ୟର ବିଭିନ୍ନ ଶିକ୍ଷାନୁଷ୍ଠାନରେ ବୌଦ୍ଧିକ ସଂପଦ ଉପରେ ଅଧିକ ଜ୍ଞାନ ଆହରଣ ଏବଂ ସଂପଦ ଅଧିକାର ଦିଗରେ ଆବେଦନ ତଥା ପଂଜୀକରଣ ପାଇଁ ସୁବିଧା ଉପଲବ୍ଧ ହେବ ବୋଲି ବିଜ୍ଞାନ ଓ କାରିଗରୀ ବିଭାଗ ପକ୍ଷରୁ କୁହାଯାଇଛି। ରମାଦେବୀ ମହିଳା ବିଶ୍ୱବିଦ୍ୟାଳୟ ଓ ଉତ୍କଳ ବିଶ୍ୱବିଦ୍ୟାଳୟରେ ଅନୁଷ୍ଠିତ ଉପରୋକ୍ତ ଦୁଇଟି କାର୍ଯ୍ୟକ୍ରମରେ ବିଜ୍ଞାନ ଓ କାରିଗରୀ ବିଭାଗର ଯୁଗ୍ମ ନିର୍ଦ୍ଦେଶକ ଶ୍ରୀମତୀ ପୂଜା ମିଶ୍ର, ରମାଦେବୀ ମହିଳା ବିଶ୍ୱବିିଦ୍ୟାଳୟ ପିଜି କାଉନ୍ସିଲ୍ ଅଧ୍ୟକ୍ଷ ପ୍ରଫେସର ଚଣ୍ଡୀଚରଣ ରଥ ବକ୍ତବ୍ୟ ରଖି ଏପରି ସୁବିଧାର ସୁଯୋଗ ନେବା ନିମନ୍ତେ ସମସ୍ତଙ୍କୁ ପରାମର୍ଶ ଦେଇଥିଲେ।
ଦିଲ୍ଲୀସ୍ଥିତ ଜାତୀୟ ବୌଦ୍ଧିକ ସଂପତ୍ତି ସଚେତନତା ମିଶନ (ନିପାମ୍)ର କାର୍ଯ୍ୟକର୍ତ୍ତା ତଥା ଭାରତୀୟ ପେଟେଣ୍ଟ ଦପ୍ତରର ପରୀକ୍ଷକ ଶ୍ରୀମତୀ ଛବି ଗର୍ଗ ଉଭୟ କାର୍ଯ୍ୟକ୍ରମରେ ଯୋଗଦେଇ ବିଭାଗର ଏପରି ଉଦ୍ୟମକୁ ପ୍ରଶଂସା କରିଥିଲେ।